कन्सर्टमै व्यस्त

कान्तिपुर संवाददाता

काठमाडौँ — हरेक चाडपर्वको अवसरमा सांगीतिक कार्यक्रमहरु पनि बढ्ने गरेको छ । दसैंमा कन्सर्ट नबढ्ने कुरै छैन । त्यसैले दसैंको अघिपछि गायक–गायिकाहरु निकै व्यस्त हुने गर्छन् । कन्सर्ट भ्याएरै भए पनि संगीतकर्मीहरु सबैले आ–आफ्नै योजना बनाउने गर्छन् ।

पाँच संगीतकर्मीका दसैं योजनाबारे सुनीता साखकर्मी लेख्छिन् :


राजु लामा, गायक
दसैंमा टीका लगाउने चलन छैन, गायक राजु लामाको घरतिर । तैपनि सानैदेखि दसैंमा चङ्गा उडाउने, आफन्तकहाँ जाने भने गर्थे । ‘पहिले त दसैं आउनेबित्तिकै आकाशै छोपिने गरी चङ्गा उडेको देखिन्थ्यो, उडाइन्थ्यो,’ उनले भने, ‘अहिले एउटा पनि उडेको देखिँदैन ।’
मंगोलियन हर्टका ‘फ्रन्टम्यान’ राजु दसैंमा प्राय: घर बाहिरै हुन्छन् । परिवारबाट टाढा । यस वर्ष पनि नेपालभित्रै ब्यान्डसहित दमक, बिर्तामोड, इनरुवा, काभ्रेको तिमालमा कन्सर्ट गर्ने तयारीमा छन् । मंगोलियन हार्टले २५ वर्ष भएको अवसरमा देशका २५ ठाउँमा कन्सर्ट गर्ने योजनामामा छन् उनी ।

Yamaha

तृष्णा गुरुङ, गायिका
कभर सङ गाएर चर्चा कमाएकी तृष्णा बौद्ध धर्मावलम्बी भएकीले दसैं मनाउँदिनन् । तर नजिकका साथीले घरमा बोलाउँदा भने उनी गएर टीका लगाउँथिन्, खेल्थिन् अनि खानेकुरा खान्थिन् । चार वर्षयता उनी दसैंका सांगीतिक कार्यक्रमहरूमा व्यस्त भइरहेकी छन् । यसपालि पनि संखुवासभा, चितवन, पोखरालगायत आठ ठाउँमा कन्सर्ट गर्न पुग्दैछिन् । दसैंमा धेरै कार्यक्रम हुन्छ भन्ने उनलाई लाग्दैन । उनले भनिन्, ‘नेपाल चाडपर्वमा धनी छ । स–साना चाड पनि धुमधामसँग मनाउने भएकाले प्राय: सबै पर्वको अवसरमा कार्यक्रम हुन्छन् । दसैं भनेर धेरै बढ्ने भन्ने हुन्न ।’


आस्था राउत,गायिका
दसैंको अवसर पारेर म्युजिक भिडियो ल्याएकी छन् आस्थाले । आस्थाले घटस्थापनामा पोखरा गाएपछि फूलपातीमा रौतहटको चन्द्रनिगाहपुर र नवमीमा धनुषाको कन्सर्टमा गाउँदैछिन् । ‘अहिले नयाँ ठाउँलाई प्राथमिकता दिइरहेकी छु,’ उनले भनिन् । त्यसपछि उनी दसंै मनाउनचाहिँ घर (काठमाडौं) फर्किने योजनामा छिन् । कहिले कार्यक्रममा जाँदा त कहिले हजुरबुबा, हजुरआमाहरू बितेकाले उनले घरमा दसैं नमनाएको पनि पाँच वर्ष भइसक्यो ।


दसैंमा बच्चा छँदा जस्तो उनलाई अचेल रमाइलो लाग्दैन । बानेश्वरमा हुर्किएकी आस्था दसैं मनाउन पुरानो घर दोलखा चरिकोट पुगेको सम्झन्छिन् । निधारको वल्लो छेउदेखि पल्लो छेउसम्म टीका लाउन नपाएर रोएको सम्झिँदा अहिले आफैं हाँस्ने गर्छिन् । हजुरबुबाको हातबाट टीका लगाउनै पनि पालो कुर्नुपर्दाको समय अहिले धेरै ‘मिस’ हुने उनी बताउँछिन् ।
‘हजुरबुबा प्रधानपञ्च हुनुहुन्थ्यो । गाउँका सबै मानिस हाम्रो घरमा टीका लगाउन आउनुहुन्थ्यो,’ उनले भनिन्, ‘कुर्दाकुर्दा पालै आउँदैनथ्यो । हामीलाई वास्ता नगरेजस्तो लाग्थ्यो अनि रोइदिन्थें ।’ टीका लगाउने रोलक्रम कुर्दाको मज्जा अहिले बुझ्दै गएको उनी सुनाउँछिन् । दसैंका बेलामा सहरबाट गाउँ जाने भएकाले गाउँमा उनको फूर्ति नै बेग्लै हुन्थ्यो । ‘कसले कति पैसा पायो भन्नेमा दाजुभाइसँग प्रतिस्पर्धा नै चल्थ्यो । पैसा कम दिनेलाई लोभी भनिन्थ्यो,’ उनले भनिन्, ‘अहिलेमात्रै पैसाभन्दा नि आशीर्वाद ठूलो हो भन्ने बुझियो ।’


कालीप्रसाद बास्कोटा,संगीतकार
उनले घरमा दसैं मनाउन नपाएको दुई वर्ष भयो । दसैंको अवसरमा चार ठाउँमा कन्सर्ट सकाएर नवमीदेखि घरमै बस्ने योजनामा छन् उनी । ‘परिवारसँगको दसैं मिस गर्छु,’ उनले भने, ‘धेरै ठाउँबाट दसैंको कार्यक्रमका लागि निम्तो आए पनि धेरै दौडधुप गर्दिनँ । नेपाल आइडलको काम पनि गर्नुपर्छ ।’

मनोजकुमार केसी,गिटारिस्ट
उनी दसैं भन्नेबित्तिकै बिहानको शीत सम्झिन्छन् । उनलाई दसैं आउने बेला बिहानीपख घाँसमा देखिने शीतले निकै रमाइलो महसुस गराइदिन्थ्यो । ‘पहिले त वातावरणले नै दसैं आएको संकेत गथ्र्यो,’ उनले भने, ‘अहिले शीत पर्न छोड्यो । शीत नपर्ने भएकाले दसैं आएको गएको केही महसुस नै हुन्न ।’


दसैं आउँदै गर्दा घरमा मालश्री धुन बजाउन थाल्छन् मनोज । पोहोर साल बुबा बितेपछि दसैं मनाउन नपाएका उनी यस वर्ष तीनवर्षे छोरालाई सपिङ गरिदिने र नगरकोट वा धुलिखेल ड्राइभमा लिएर जाने योजनामा छन् । सदस्यहरूको व्यस्तताले १९७४ एडी ब्यान्ड हाल सक्रिय छैन । यस ब्यान्डलाई उनी फेरि सक्रिय बनाउने तयारीमा छन् । ‘हामी ब्यान्डबाटै दसैंमा कन्सर्ट गर्ने योजनामा छौं । अब ब्यान्डलाई निरन्तरता दिने सोच छ’ उनले भने ।

प्रकाशित : आश्विन २६, २०७५ ११:४१
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

आउँदै छ फिल्म

कान्तिपुर संवाददाता

काठमाडौँ — आफ्ना आफन्तहरु दसैं मनाउन र टीका थाप्नका लागि घर फिर्ने क्रम चुलिएको छ । दसैंले सबैमा हर्षोल्लास र कामको थकान मेट्ने अवसर जुटाइदिने गर्छ । त्यसैले यस्ता बेला धेरैका मन पुस्तक पढ्न वा फिल्म हेर्न लालायित हुने गर्छ । कतिपय घरमै बसेर पुराना फिल्म हेर्न रूचाउँछन् भने नयाँ रिलिजका लागि पनि यसपालिको दसैंमा उल्लेख्य फिल्म आउनेछन् । रिलिजअघि चर्चामा रहेका केही फिल्म :


छक्का पञ्जा ३
घटस्थापनाको दिन बुधबारदेखि नै छक्का पञ्जा ३ ले आफ्नो प्रदर्शनी थालिसकेको छ । टेलिभिजनमा तीतो सत्य सिरियल बन्द गरेर फिल्म निर्माणमा होमिएका दीपकराज गिरी र दीपाश्री निरौलाको जुगलबन्दी यति बेला फिल्ममा पनि फस्टाएको छ । फिल्म पनि कमेडी शैलीमा नै बनाएर दर्शक हँसाउन सफल यो जोडीका फिल्म एकपछि अर्को ब्लकबस्टर्स बनिरहेका छन् ।


एक्सन र लभस्टोरी फिल्मको बाहुल्य रहेका बेला कमेडी फिल्मको लहर ल्याउने श्रेय पनि दीपक–दीपालाई नै जान्छ । त्यसअघि मदनकृष्ण श्रेष्ठ र हरिवंश आचार्यका कमेडी फिल्म नै पनि फ्लप थिए । अचेल छक्का पन्जाको कमेडी ह्याङ अधिकांश फिल्ममा देखिन्छ । फिल्मको विधा नै नभए पनि ट्रेलर कमेडी बनाएर भए पनि दर्शक तान्ने प्रयास गरिन्छ । दैनिक जीवनको थकान र तनावलाई बिर्सेर केवल दुई घण्टा मज्जाले हाँस्नका लागि पनि यसपालिको दसैंमा छक्का पञ्जा ३ उपयुक्त खुराक हुन सक्छ ।


अनुप्रास मिलेका संवाद र चुट्किला शैलीलाई दर्शक हँसाउने मुख्य हतियार बनाएको छक्का पञ्जा टिमले यसपटक केही फरक दिन खोजेको छ । अर्थात् विषयवस्तु केन्द्रित हुन खोजेको छ । शिक्षामा हुने चरम राजनीतिको गाउँ स्तरमा देखिएको प्रभावलाई हास्यरसमा घोलेर दर्शकलाई पस्केको छ । दीपकराज गिरीले राजाकै भूमिका निर्वाह गरेका छन् भने ग्याङमा जितु नेपाल, केदार घिमिरे, शिवहरि पौडेल छुट्ने कुरै भएन । यसपटक यो टिममा नायिका दीपिका प्रसाईंको प्रवेशले नयाँपन दिन खोजेकी छन् । उनकै इन्ट्रीले राजाको हैकम डगमगाउँछ ।


हेलिकप्टर एला
आज शुक्रबार रिलिज भएको बलिउड फिल्म हेलिकप्टर एला पनि दर्शकका लागि विकल्प हुन सक्छ । परिणिता हुँदै बलिउडमा निर्देशकका रूपमा जबर्जस्त डेब्यु गरेका प्रदीप सरकार अक्सर महिला केन्द्रित भूमिकामा फिल्म बनाउन रुचाउँछन् । लगाचुनरी मेंदाग, मर्दानी उदाहरण हुन् ।


यसपटक पनि काजोललाई मुख्य भूमिकामा पस्केर उनले हेलिकप्टर एला लिएर आएका छन् । काजोलले पेसाले गायिका र अवस्थाले एकल आमाको भूमिका निर्वाह गरेकी छन् । तीन वर्षअघि शाहरुख खानसँग दिलवालेमा पुनरागमन गरे पनि त्यसपछि काजोलका लागि बलिउड खासै जम्न सकेन । यतिबेला उनी गुजराती नाटक बेटामा आधारित हेलिकप्टर एलाबाट पुन:स्थापित हुनेमा आशावादी छिन् ।


अ स्टार इज बर्न
ओस्कर अवार्डमा चार–चार पटक मनोनयनमा परेका ब्राड्ली कुपर गतिला अभिनेता हुन् । ह्याङओभरका अभिनेता ब्राड्ली आफूलाई उत्तिकै गतिलो निर्देशक पनि भएको प्रमाणित गर्न अ स्टार इज बर्न लिएर आएका छन् । म्युजिक रोमान्टिक यो फिल्म पनि शुक्रबार नै रिलिज भयो ।


सन् १९३७ मा यही नाममा बनेको फिल्मलाई रिमेक गरेका ब्राड्ली फिल्मको मुख्य अभिनेता आफैं छन् भने अपोजिटमा विख्यात गायिका लेडी गागा । प्रि–प्रोडक्सनमा लामो समय खर्चिएको यस फिल्ममा पहिले वियोन्सेदेखि लियोनार्दो डी क्याप्रिओ, विल स्मिथ, टम क्रुजसम्मलाई खेल्ने प्रस्ताव गरिएको थियो । अ स्टार इज बर्नलाई यसपटकको ७५ औं भेनिस इन्टरनेसनल फिल्म फेस्टिभलमा गरिएको प्रिमियरबाट राम्रो प्रशंसा मिलेको थियो भने यहींबाट नै ब्राड्लीले आफूलाई क्षमतावान निर्देशकका रूपमा उभ्याएको पनि टिप्पणी आए ।


फ्राई डे
केही साताअघि गोविन्दा नेपाल आउँदा उनले फ्राई डेको प्रचार पनि गर्न भ्याएका थिए । नेपाली चेली विवाह गरेकाले पनि गोविन्दालाई आफ्ना फिल्म नेपालमा राम्रै हेरिन्छ भन्ने विश्वास रहेछ ।


कुनै बेला लगभग एकै समयमा ७५ फिल्ममा साइन गरेको बताउने गोविन्दा अचेल प्राय: फुर्सदिला छन् । त्यसैले उनको करिअरका लागि पनि फ्राई डे चल्नु आवश्यक छ । अभिषेक दोग्राको निर्देशन रहेको फ्राई डे स्वदेशी फिल्मको कमेडी चाखेका दर्शकका लागि स्वाद फेर्ने अवसर पनि हुन सक्नेछ ।

जय भोले
कुनै बेला नेपालमा विदेशी फिल्मको हालिमुहाली थियो भने स्वदेशी फिल्म दर्शकले सान्त्वनाका लागि मात्रै हेर्थे । तर अहिले अवस्था उल्टिएको छ । नेपाली फिल्मले पनि मल्टिप्लेक्स कब्जा जमाउन थालेका छन् भने छानिएका विदेशी फिल्म मात्रै चल्न थालेका छन् । विदेशी फिल्म ल्याएर यहाँ चलाउने वितरक पनि पछिल्लो समय ठूला नेपाली फिल्म रिलिज हुँदा हच्किन थालेका छन् । त्यसैले पनि यो दसैंको घटस्थापनामा छक्का पन्जा ३ र फूलपातीदेखि जय भोले प्रदर्शनमा आउने पक्का गरेपछि विदेशी फिल्म खासै आउन सकेन ।


दुई साथी जय र भोलेको मित्रताको कथा बोकेको जय भोले यसपालि दसैंमा छक्का पन्जा ३ हेरिसकेका दर्शकका लागि पनि मनोरञ्जनको बोनस हुन सक्छ । कम्तीमा फिल्मको ट्रेलरले त्यही छनक दिन्छ । तर फिल्मका लेखक तथा मुख्य अभिनेता खगेन्द्र लामिछाने भने दर्शकलाई ट्रेलरमा मात्रै सीमित रहेर नसोच्न आग्रह गर्छन् । उनका अनुसार, फिल्मको गुदी त अर्कै छ । कमेडी त केवल फिल्मको बोक्रा मात्रै हो । हुन पनि खगेन्द्रका कोर फ्यानले उनीबाट गुदी कुराकै आशा बढी गर्छन् ।


अशोक शर्मा एक दशकपछि फेरि निर्देशनसहित जय भोलेमार्फत फर्किएका छन् । उनी पनि विश्वस्त हुँदै भन्छन्, ‘फिल्म हेर्ने दर्शकले आँखा झिमिक्क गर्न पाउने छैन । हामीले कतै पनि अल्छी लाग्ने ठाउँ छोडेका छैनौं ।’ दुई विपरीत स्वभावका दुई साथीको भूमिकामा खगेन्द्र र सौगात मल्ल अभिनीत छन् भने फिल्ममा बुद्धि तामाङ, स्वस्तिमा खड्का, सलोन बस्नेतसहित कमेडी कलाकारको ठूलै डफ्फा रहेको छ । सम्भवत: छक्का पन्जा ३ र जय भोलेले नै तिहारसम्मका लागि हल छोड्ने छैनन् भने यस अवधिमा आशा गरिएका अन्य कुनै नेपाली फिल्म पनि रिलिज हुने छैनन् ।


र, अरू
दसैंको टीकाकै दिन शुक्रबार पारेर बलिउड फिल्म भैया जी सुपरहिट, बधाई हो, नमस्ते इंग्ल्यान्ड रिलिज हुँदैछन् । नीरराज पाठकको निर्देशन रहेको एक्सन कमेडी फिल्म भैया जी सुपरहिटमा सनी देवल, प्रिटी जिन्टा, अमिसा पटेल, अरसद वारसीलगायतको अभिनय रहेको छ । बनारसी डनको भूमिकामा रहेका सनी फिल्म खेल्न चाहन्छन् । फिल्ममा प्रिटीले सनीको पत्नीको भूमिका निर्वाह गरेकी छन् भने अमिसा हिरोइन र अरसद निर्देशकका रूपमा देखिनेछन् ।


नमस्ते लन्डनको सिक्वेल भनिएको नमस्ते इंग्ल्यान्ड पनि रोमान्टिक फिल्म नै हो । आँखे, वक्त, नमस्ते लन्डन, लन्डन ड्रिम्सजस्ता हिट फिल्म दिइसकेका विपुल शाहको निर्देशन रहेको यस फिल्ममा अर्जुन कपुर र परिणीति चोपडाको मुख्य भूमिका रहेको छ । आफ्नी पत्नीको खोजीमा लन्डन पुगेको पति र सपनाको खोजीमा लन्डन पुगेकी पत्नीबीचको कथालाई फिल्ममा बुनिएको छ ।


रोमान्टिक कमेडी फिल्म बधाई हो अमित रवीन्द्रनाथ शर्माले निर्देशन गरेका हुन् । आयुष्मान खुराना र सान्या मल्होत्राले यसमा अभिनय गरेका छन् ।

प्रकाशित : आश्विन २६, २०७५ ११:३६
पूरा पढ्नुहोस्
प्रतिक्रिया
पठाउनुहोस्
ADVERTISEMENT