छालमा उछाल

वैशाख २०, २०७६कान्तिपुर संवाददाता

पानीको तीव्र बहावका कारण नेपालका नदीहरू साहसिक यात्राका लागि विश्वमै आकर्षक गन्तव्य मानिन्छन्  । नेपालका नदीहरूमा सन् १९८० को दशकबाट व्यावसायिक र्‍याफ्टिङ सुरु भएको थियो  ।

नदीहरूमा बनाइएका बाँधले साहसिक जलयात्रालाई कठिन बनाउँदै लगेको छ । सुरुमा खुबै चलेको माथिल्लो भोटेकोसीमा बाँधकै कारण र्‍याफ्टिङ असम्भव भइसकेको छ ।

हरेक वर्ष मार्चदेखि मे र सेप्टेम्बरदेखि नोभेम्बरसम्म यहाँका नदीहरूमा र्‍याफ्टिङ गर्न हजारौं पर्यटक आउने गर्छन् । अन्य समयमा भने र्‍याफ्टिङ गर्नेहरू कमै भेटिन्छन् । जलयात्रा गर्ने स्वदेशीको संख्या पनि बढिरहेको छ । यहाँ एक–दुई दिनमै पूरा गर्न सकिने चल्तीका र्‍याफ्टिङ रुट धेरै छन्, जहाँ गर्मी सुरु भएसँगै भीडभाड बढ्ने गरेको छ । साहसिक बनाउने बहानामा हप्तौंसम्म र्‍याफ्ट हाँक्नेहरू पनि बढिरहेका छन् । जलयात्रा गराउने रिभरगाइडमा पनि नेपालीकै माग विश्वमै उच्च रहेको छ । खेलका रूपमा भने औपचारिक रूपमा बल्ल नेपाली टिम दोस्रोपल्ट विश्व च्याम्पियनसिपमा प्रतिस्पर्धा गर्ने अवस्थामा आइपुगेको छ ।