किन किन्ने फोन ?

हेलो शुक्रबार

 मोबाइलको बिक्री घट्नुको कारण के होला ? धेरैको विश्वास छ, मोबाइलमा नयाँ चीजको अभाव हुँदै गएको छ  । बजारमा जुनसुकै मोबाइल आओस्, त्यसको क्यामेराको सुधार र स्क्रिन साइजको आकारबाहेक धेरै कुरा समान हुन थालेका छन्  ।

र, जुन मोबाइल आफ्नो ब्रान्डको सबैभन्दा राम्रो भनेर बजारमा सार्वजनिक गरिन्छन्, तिनको मूल्य सामान्य मानिसले छुनै नसक्ने गरी बढेको छ ।

पट्याउन मिल्ने फोन, यति ब्याट्री टिक्ने फोन, यस्तो स्क्रिनको फोन । हरेक महिनाजसो केही न केही विशेषतासहितको फोनहरू बजारमा आइरहेका छन् । मोबाइल उत्पादक कम्पनीका आकार र उनीहरूले सार्वजनिक गर्ने विविधतायुक्त स्मार्टफोनहरूको संख्या हेर्दा बर्सेनि मोबाइल बजार बढ्दो देखिन्छ । मोबाइल बिक्रीको विश्वव्यापी तथ्यांक हेर्दा भने यो धारणा गलत सावित हुन्छ ।


सन् २०१९ को पहिलो त्रैमासिकमा मात्रै कोरियाली ब्रान्ड सामसङले आफ्नो सञ्चालन नाफामा ६० प्रतिशतले गिरावट आएको तथ्यांक सार्वजनिक गर्यो । चीनमा बिक्री घटेको भन्दै अमेरिकी कम्पनी एप्पलले सन् २०१९ मा बिक्री हुने अनुमान गरेको आइफोनको संख्या घटाइसकेको छ । बरु, यसले आफ्नो ध्यान टेलिभिजन बिक्री, म्युजिक र भिडियो स्ट्रिमिङ सेवा र पेमेन्ट सर्भिसतिर लगाइरहेको छ । फेब्रुअरीसम्मको तथ्यांक हेर्दा सबैभन्दा ठूलो मोबाइल बजार चीनमा स्मार्टफोनको बिक्री अघिल्लो वर्षको तुलनामा २० प्रतिशतले घटेको छ । चीनको चाइना एकेडेमी अफ इन्फर्मेसन एन्ड कम्युनिकेसन टेक्नोलोजीले सार्वजनिक गरेको तथ्यांकअनुसार चीनमा स्मार्टफोनको बिक्री ६ वर्षयताकै सबैभन्दा कम छ ।


युरोपमा पनि स्मार्टफोन बिक्रीमा उल्लेख्य कमी आएको विभिन्न अनुसन्धान कम्पनीको तथ्यांकले देखाएको छ । सन् २०१३ र २०१८ को बीचमा युरोपमा स्मार्टफोनको बिक्री २३ प्रतिशतले घटेको अमेरिकी रिसर्च कम्पनी सीसीएसइन्साइटले जनाएको छ । भारत र अफ्रिकी मुलुकको अपवाद छाड्ने हो भने संसारभर नै मोबाइलको बिक्री घटिरहेको यो कम्पनीको तथ्यांक छ । तर, मोबाइल बजारका हिसाबले आशा गर्ने ठाउँ भारत मात्र बाँकी छ । उसका ठूलो जनसंख्या अझैं मोबाइल सेवामा जोडिनै बाँकी छ, यसले मोबाइल उत्पादकहरूलाई आशा त देखाएको छ तर मूल्यसहित । अहिले भारतमा कम्पनी स्थापना गर्न मोबाइल उत्पादकहरूबीच तँछाडमछाड नै छ ।


मोबाइलको बिक्री घट्नुको कारण के होला ? धेरैको विश्वास छ, मोबाइलमा नयाँ चीजको अभाव हुँदै गएको छ । बजारमा जुनसुकै मोबाइल आओस्, त्यसको क्यामेराको सुधार र स्क्रिन साइजको आकारबाहेक धेरै कुरा समान हुन थालेका छन् । र, जुन मोबाइल आफ्नो ब्रान्डको सबैभन्दा राम्रो भनेर बजारमा सार्वजनिक गरिन्छन्, तिनको मूल्य सामान्य मानिसले छुनै नसक्ने गरी बढेको छ । धेरै राम्रो भनेर महँगो मूल्य राखिएको स्मार्टफोनमा त्यस्तो फिचर केही जुन जसको प्रभाव मानिसको दैनिक जीवनमा व्यापक परोस् र मानिसले मूल्य माया मारेरै भए पनि किनुन् । मानिसको दैनिक जीवनमा प्रभाव पार्ने खालका फिचरहरू मध्यम मूल्यका फोनमा पनि छँदैछन् । यसको पछिल्लो उदाहरण हेरौं । केही महिना अघि मात्रै सामसङ र चिनियाँ कम्पनी हुवावेले लामो समयको प्रतीक्षा तोड्दै पट्याउन मिल्ने स्मार्टफोन सार्वजनिक गरे । पछिल्ला दसमा आएका स्मार्टफोनभन्दा फरक विशेषता भएका यिनका मूल्य २ हजार डलर बढी तय गरिएको थियो । पट्याउन मिल्नेबाहेक यी स्मार्टफोनमा अन्य के विशेषता थिए र प्रयोगकर्ताले यत्रो मूल्य तिर्ने ?


धेरै विश्लेषकको अनुमान छ, फाइभी प्रविधिको द्विविधाका कारण पनि मानिसहरू महँगा मूल्य तिरेर अहिले फोन किन्न चाहिरहेका छैनन् । अहिले गरिएको चर्चाअनुसार फाइभी नेटवर्क यति तीव्र हुनेछ कि १५ मिनेटको भिडियो एक सेकेन्डमा डाउनलोड हुनेछ । आफ्नो फोनबाटै घरमा वा कार्यालयमा भएका स्मार्ट डिभाइसहरू नियन्त्रण गर्न सकिन्छ । यति तीव्र गतिको नेटवर्क सन् २०१९ मा केही सहरहरूमा परीक्षणका रूपमा सुरु हुने अनुमान गरिएको थियो । तर, फाइभी नेटवर्कको विस्तार सोचेभन्दा धेरै धिमा गतिमा भइरहेको छ । न त यसको कतै परीक्षण भएको न त कुनै कम्पनीले फाइभी रेडी डिभाइसहरू नै बजारमा ल्याएका छन् ।


कुनै समय नयाँ स्मार्टफोन किनेर त्यसैमा घन्टौं भुल्दा गर्व गर्ने ग्राहक मनोविज्ञानमा अहिले परिवर्तन आएको धेरै विश्लेषकको बुझाइ छ । प्रविधि कम्पनीको नेतृत्व गरेर नाम कमाएकाहरू नै सकेसम्म कम समय फोनमा भुल्नमा सुझाव दिइरहेका छन् । स्मार्टफोन निर्माता आफैंले फोन कम चलाउन सहयोग गर्ने गरी विभिन्न फिचरहरू सार्वजनिक गरिरहेका छन् जसले प्रयोगकर्ताले आफूले कतिबेर कुन प्रयोजनका लागि स्मार्टफोन गरे, थाहा होस् । यस्तै अभियानका कारण पनि धेरैमा नयाँ–नयाँ स्मार्टफोन किनिहाल्न हतार नगर्ने चलन बढेको छ ।


सीसीएसइन्साइटले भर्खरै सार्वजनिक गरेको एक अध्ययन प्रतिवेदनको निष्कर्षले पनि यही भन्छन् । युरोपमा गरिएको सर्वेक्षणका क्रममा ३५ प्रतिशतले उत्तरदाताले आफूले यसअघि प्रयोग गरेको स्मार्टफोनभन्दा अहिले हातमा रहेको स्मार्टनफोन बढी समय चलाउने मनसाय रहेको बताएका थिए ।
–एजेन्सीको सहयोगमा

hellosukrabar@gmail.com

प्रकाशित : वैशाख २७, २०७६ १२:१७
प्रतिक्रिया
पठाउनुहोस्

मध्यम मूल्यमा हस्तक्षेप

हेलो शुक्रबार

 सामसुङको ए थर्टी र ए फिप्टीले नेपाली बजारमा हुवावेको वाई नाइन, साओमीको नोट एट लाइटजस्ता फोनसँग मूल्यका हिसाबले प्रतिस्पर्धा गर्नेछ  ।

हरेक कम्पनीका लागि सफलताको मानक मध्यम मूल्यका स्मार्टफोनहरू हुन् किनकि अधिकांश प्रयोगकर्ताले मध्यम मूल्यकै फोन खोज्छन् । नेपाली मोबाइल बजारमा मध्यम मूल्यका फोन भनेर २५ देखि ४० हजार रुपैयाँसम्मका फोनलाई बढी चिनिन्छ । यही मूल्यमा जसले राम्रो फोन दिन सक्छ, उसकै फोन बिक्छ ।


सामसुङले मध्यम मूल्यको मोबाइल बजारमा आफ्नो पकड राख्न नेपालमा दुई मोडल भित्र्याएको छ– ए थर्टी र ए फिप्टी । दुवै फोनको विशेषता मध्यम मूल्यमा हाई एन्ड फोनका अनुभूति हो । दुवै फोनले नेपाली बजारमा सामसुङको उपस्थिति बलियो बनाउनेछ । ६.४ इन्चको स्क्रिन भएका दुवै स्मार्टफोन एक हातमा चलाउँदा पनि सहज छ । ए थर्टीमा १६ र ५ मेगापिक्सेलका दुई क्यामेरा छन् जुन यो मूल्यमा प्राप्त हुने अन्य स्मार्टफोनसँग तुलना गर्दा कमजोर देखिन्नन् । ए फिप्टीमा भने २५, ८ र ५ पिक्सेलका तीन क्यामेरा छन् जुन अहिले चल्तीमा रहेका स्मार्टफोनको ट्रेन्ड बनेको छ । क्यामेराको हिसाबले हेर्दा अलि बढी मूल्य तिर्दा प्रयोगकर्ताले ए फिप्टीबाट बढी अनुभव गर्न पाउनेछन् । तर, थोरै मूल्य तिर्दा पनि ए थर्टीले निराश बनाउने छैन । ए थर्टीमा १६ मेगापिक्सेल र ए फिप्टीमा २५ मेगापिक्सेलको फ्रन्ट क्यामेरा राखिएको छ ।


एन्ड्रोइडको पछिल्लो संस्करण एन्ड्रोइड पाईमा उपलब्ध हुने दुवै फोनमा दुई–दुई सिम लाग्छन् र दुवैमा भ्वाइस ओभर एलटीईको सुविधा हुनेछ । भ्वाइस ओभर एलटीई सेवाको अनुभूति गर्न नेपाली प्रयोगकर्ताले अझै केही समय कुर्नुपर्नेछ किनकि अहिले कुनै पनि टेलिकम सेवा प्रदायकले यो सेवा सुरु गरिसकेका छैनन् ।आकार, प्रकार र उचाइसहित धेरै हिसाबले ए थर्टी र ए फिप्टी उस्तै लाग्छन् । ए थर्टीमा १.८ र ए फिप्टीमा २.३ गिगाहर्जको अक्टाकोर प्रोसेसर प्रयोग गरिएको छ । प्रयोगका हिसाबले दुई फोनको गतिमा यसले पनि केही फरक पार्नेछ । दुवै फोनमा ४ जीबीको र्‍याम प्रयोग गरिएको छ । दुवैमा सामसुङको एक्सिनोस चिपसेट रहेको छ ।


ए थर्टीको पछाडि फिंगर प्रिन्ट सेन्सर राखिएको छ । ए फिप्टीको अनस्क्रिन फिंगर प्रिन्ट सेन्सर छ । दुवै फोनमा ४ हजार एमएएचको ब्याट्रीको छ जुन प्रयोगकर्ताका लागि दिनभरिका लागि काम गर्छ । दुवैमा फास्ट चार्जिङको सुविधा छ । दुवै फोनले नेपाली बजारमा हुवावेको वाई नाइन, साओमीको नोट एट लाइटजस्ता फोनसँग मूल्यका हिसाबले प्रतिस्पर्धा गर्नेछ ।

सस्तो फोनमा विकल्प
चिनियाँ कम्पनी साओमीले गुगलको गो प्रोजेक्टसँगको सहकार्यमा तयार पारेको रेडमी गो फोन पनि नेपालमा उपलब्ध छ । मूल्यका हिसाबले सस्तो यो फोन सामान्य स्मार्टफोन प्रयोगकर्ताका लागि निकै राम्रो विकल्प हो । स्मार्टफोनको सबै आधारभूत फिचर रहेको यसमा मूल्य र क्षमताका हिसाबले गुनासो गर्ने ठाउँ रहन्न ।आधारभूत स्मार्टफोनमा पनि आफ्ना सबै एप र प्रोडक्टहरू अटाउन् भनेर गुगलले गो प्रोजेक्ट सुरु गरेको हो । यसमा गुगलका सबै एपहरू उपलब्ध गराउन छुट्टै डिजाइन तयार पारिएको हुन्छ । कम डाटा खर्च हुने र राम्रो क्षमता हुने कम मूल्यका स्मार्टफोनलाई लक्षित गरी यो सुरु भएको हो । यही प्रोजेक्टअन्तर्गत निर्माण भएको रेडमी गोमा ५ इन्चको स्क्रिन छ र ८ जीबीको स्टोरेज छ । यसलाई अरू मेमोरी चिप राखेर बढाउन पनि सकिन्छ । यसमा १ जीबीको र्‍याम र ३ हजार एमएचको ब्याट्री राखिएको छ । आधारभूत फिचर मात्रै भएकाले यसको ब्याट्री एक दिनभन्दा बढी प्रयोग गर्न पनि उपयोगी छ । एन्ड्रोइड ओरियो अपरेटिङ सिस्टम प्रयोग गरिएको फोनले दुई सिम सपोर्ट गर्छ । यसले फोरजीसहित थ्रीजी र टुजी नेटवर्क सपोर्ट गर्न सक्छ । क्वालकम स्न्यापड्र्यागन ४२५ चिपसेट प्रयोग भएको फोनले पर्फमेन्सको हिसाबले पनि गुनासो गर्न दिन्न । यसमा ८ मेगापिक्सेलको रेअर र ५ मेगापिक्सेलको फ्रन्ट क्यामेरा छ ।

hellosukrabar@gmail.com

प्रकाशित : वैशाख १३, २०७६ १२:३८
पूरा पढ्नुहोस्
प्रतिक्रिया
पठाउनुहोस्