आईपीएलका अनौठो र विवादास्पद घटनाहरू

कान्तिपुर संवाददाता

 हैदराबादको राजीव गान्धी अन्तर्राष्ट्रिय क्रिकेट मैदानमा १२ औं संस्करणको आईपीएल फाइनलको अन्तिम बलमा लसिथ मालिङ्गाले चेन्नईका शार्दूल ठाकुरको विकेट लिएसँगै मुम्बईले चौथो पटक उपाधि उचाल्यो  ।

समग्रमा हेर्दा अघिल्ला संस्करणभन्दा यो संस्करणमा बढी प्रतिस्पर्धात्मक खेलहरू भए । प्रतिस्पर्धात्मक खेलका अलावा यस संस्करणमा विभिन्न विवादास्पद तथा अनौठा घटनाहरू पनि घटे ।

अश्विन–बटलर माङकडिङ विवाद
सम्भवतः यस आईपीएल सिजनकै सबैभन्दा बढी चर्चामा आएको विवाद हो यो । आईपीएल इतिहासमै पहिलोपटक कुनै खेलाडी यसरी आउट भए । आउट हुने ब्याट्सम्यान थिए, राजस्थान रोयल्सका जस बटलर । निकै राम्रो लयमा देखिइरहेका बटलरको विकेट पतनसँगै राजस्थानको इनिङ्स धर्मराउन थाल्यो र अन्त्यमा १४ रनले खेल पञ्जाबलाई सुम्पियो । क्याचले म्याच जिताउँछभनेझैं बटलरको त्यो विकेटपश्चात् पञ्जाबले खेल आफ्नो पक्षमा पार्दै माङकडिङले पनि म्याच जिताउन सक्छ भन्ने सावित गर्‍यो ।


क्रिकेटको नियम हेर्ने हो भने पनि बलर
आफ्नोडेलिभरी स्ट्राइडमाजानु अगाडि नै रनरले आफ्नो क्रिज छोडेको खण्डमा बलरले विकेटमा बलले हानेर आउट गर्न पाउने प्रावधान छ । अश्विनको सन्दर्भमा हेर्दा विकेटमा बलले हान्नुभन्दा अगाडि अश्विन एकछिन रोकिएको देखिएको थियो जुन अवस्थामा बटलर आउट नहुनुपर्ने थियो । यस घटनाले सामाजिक सञ्चालमा ठूलै बहस सिर्जना गरेको थियो । एमसीसीले अन्ततः अश्विनको सो कार्य खेल भावनाविपरीत भएको भन्ने प्रतिक्रिया दियो । यस घटनालाई मध्यनजर गर्ने हो भने क्रिकेटमा माङकडिङका लागि नियम नै अझ स्पष्ट पार्नुपर्ने देखिन्छ ।

अम्पायरसँग बहस गर्न धोनी मैदानमा
चेन्नई सुपर किंग्सका कप्तान महेन्द्रसिंह धोनी सामान्यतः मैदानमा शान्त स्वभावका लागि चिनिने गर्छन् । त्यसैले त उनलाई ‘क्याप्टेन कुल’ पनि भनिन्छ । राजस्थान रोयल्सविरुद्धको खेलमा धोनी विपरीत देखिए । आउट भएर पवेलियन फर्किसकेका धोनी अम्पायरले नोबल नदिएको विषयलाई लिएर अम्पायरसँग बहस गर्न मैदान प्रवेश गरे । अम्पायरले गलत निर्णय नै दिएको खण्डमा पनि कुनै खेलाडी मैदानभित्र प्रवेश गरेर अम्पायरसँग बहस गर्नु हरेक कोणबाट खेल भावनाविपरीत नै हो । त्यसमाथि धोनीजस्तो शान्त स्वभावको छवि बनाएका अनुभवी खेलाडीबाट यस्तो कार्य हुनुलाई धेरैले नकारात्मक कार्यको संज्ञा दिए । खेल भावनाविपरीतको यस कार्यका लागि धोनीलाई म्याच फिको ५० प्रतिशत जरिवाना लगाइएको थियो ।

मालिङ्गाले अन्तिम बलमा गरेको नोबल
सिजनको सातौं खेलमा आमनेसामने थिए रोयल च्यालेन्जर्स बैंगलोर र मुम्बई । १ सय ८८ रनको विजयी लक्ष्य पछ्याएको बैंगलोरलाई जितका लागि अन्तिम बलमा ७ रनको जरुरत थियो । मालिङ्गाले गरेको सो बलमा बैंगलोरका शिवम दुवेले मात्र १ रन जोड्न सके र मुम्बईले ६ रनले खेल आफ्नो पक्षमा पार्‍यो । खेल यतिकैमा सकिए तापनि बहसचाहिँ तब सुरु भयो जब रिप्लेमा मालिङ्गाको सो बल नोबल भएको देखियो । जितका लागि ७ रन आवश्यक भएको अवस्थामा सो नोबल दिइएको र अर्को बलमा छक्का हानेको भए खेल बैंगलोरको पक्षमा जाने थियो । सो नोबल अम्पायरले दिएको भए मालिङ्गाको अन्तिम ओभरको पहिलो बलमा एउटा छक्का प्रहार गरिसकेका शिवम दुवेले अर्को बाउन्ड्री प्रहार गर्ने मौका प्राप्त गर्ने थिए । खेलपश्चात् बैंगलोरका कप्तान विराट कोहलीले आईपीएल जस्तो अन्तर्राष्ट्रियस्तरको प्रतियोगितामा अम्पायरबाट यस्ता गल्ती हुन नहुने प्रतिक्रिया दिए ।

अश्विनले एक ओभरमा ७ बल गर्दा
बटलरसँगको माङकडिङ विवादलाई लिएर मात्र अश्विनको चर्चा भएन यस सिजनमा । मुम्बईविरुद्धको खेलमा एक ओभरमा ७ बल गरेर अर्को अनौठो घटनामा पनि मुख्य पात्र बन्न पुगे अश्विन । मुम्बईसँगको खेलको पहिलो ओभर पञ्जाबका कप्तान अश्विनले गरेका थिए र उनका सामु थिए मुम्बईका ओपनर रोहित शर्मा तथा क्विन्टन डी कक । खेलको पहिलो ओभरमै अश्विनले ७ बल फालेका थिए । ती ७ बलमध्ये कुनै पनि बल वाइड, नोबल वा कुनै पनि अतिरिक्त बल थिएन । अन्ततः शर्माले खेलेको अश्विनको पहिलो बललाई डेड बल दिइएको थियो । ख्याल गर्नुपर्ने के हो भने, अश्विनले गरेको अतिरिक्त सातौं बलमा डी ककले चौका प्रहार गरेका थिए भने रोहितले खेलेको पहिलो बलमा कुनै पनि रन बनेको थिएन ।

जब अम्पायरले ढोका भत्काए
बैंगलोरको चिन्नास्वामी रंगशालामा रोयल च्यालेन्जर्स बैंगलोर र सनराइजर्स हैदराबादबीचको खेलमा अम्पायर नाइजल लोङले गलत नोबल दिए । टीभी रिप्ले हेर्दा बैंगलोरका उमेश यादवको गोडाको पछिल्लो भाग क्रिजमै थियो तर अम्पायर लोङले त्यसलाई नोबल दिएपछि कप्तान विराट र बलर उमेश दुवैले मैदानमै यसको विरोध गरे पनि अम्पायरले निर्णय फिर्ता लिएनन् । हैदराबादको इनिङ सकिएपछि लोङ अर्का अम्पायरका साथ पेभिलियन आए र रिसको सुरमा अम्पायर रूमको ढोका भत्काए । पछि लोङले कर्नाटक क्रिकेट एसोसिएसनलाई क्षतिपूर्तिस्वरूप पाँच हजार भारु तिरे ।
बैंगलोर र चेन्नईबीचको पहिलो खेलमा पिचको अवस्था
१२ औं संस्करणको पहिलो खेलमा बैंगलोर र चेन्नई आमनेसामने हुँदा पहिले ब्याटिङ गरेको बैंगलोर मात्र ७० रनमा समेटियो । ब्याटिङ बलियो मानिएको बैंगलोर सस्तोमै आउट भएको यस खेलमा पिचले स्पिनरलाई ज्यादा नै सहायता दिएको देखिन्थ्यो । आईपीएलको इतिहासमा एक स्पिनरले औसतमा एक बलमा २.७ डिग्री टर्न प्राप्त गर्छन् । तर यो खेलमा भने बलरले औसतमा नै ७.२ डिग्री टर्न प्राप्त गरिरहेका थिए । सामान्य लक्ष्य पछ्याएको चेन्नईले पनि खेल जित्न ३ विकेट गुमाएको थियो । खेलपश्चात् दुवै टोलीका कप्तान कोहली र धोनीले पिचको आलोचना गरे । चेन्नईको गृह मैदान भए तापनि धोनीले पिचको सो अवस्था सही नभएको प्रतिक्रिया दिए ।

उतारचढावले भरिएको फाइनल खेल
मुम्बई तथा चेन्नईबीच हैदराबादमा भएको फाइनल खेल पनि उतारचढावले भरिपूर्ण थियो । ब्राभोले गरेको बल अम्पायरले वाइड नदिएपछि पोलार्डले देखाएको असन्तुष्टिका लागि उनलाई म्याच फिको २५ प्रतिशत जरिवाना लगाइयो । त्यस्तै अम्पायरले धोनीलाई रनआउट दिएको विषयले पनि राम्रै चर्चा पायो ।

रीतेश घिमिरे
Twitter : @ReeteshJee

प्रकाशित : जेष्ठ ३, २०७६ ११:४५
ADVERTISEMENT
प्रतिक्रिया
पठाउनुहोस्
ADVERTISEMENT

“बाङताङ ब्वाइज” को बाटो

के–पपको सेन्सेसन बीटीएस र प्रख्यात अमेरिकी गायक एवं गीतकार खालिदले सहकार्य गर्ने भएका छन् । यसबारे लामो समययता विझिन्न अड्कलबाजी हुँदै आएका थिए ।
सजना बराल

 यसपालि के–पप ब्यान्डले यसबारे निश्चित गरिदिएको छ  । आफूहरूको नयाँ प्रोजेक्टमा खालिद मिसिने पक्का भएको र उक्त प्रोजेक्ट चाँडै बजारमा आउन लागेको ब्यान्डको अभिव्यक्ति छ  ।

अमेरिकास्थित एक रेडियोसँगको अन्तर्वार्तामा ब्यान्डले हालै यसबारे बताएको थियो । ‘हाम्रो साथी खालिदबारे मैले भन्नै पर्छ,’ बीटीएसका आरएमले भनेका थिए, ‘हाम्रो सहकार्य साँच्चै हुँदैछ । त्यसका लागि प्रतीक्षा गर्नुहोला ।’ लस एन्जलसमा हालै आयोजित रोज बाउल कन्सर्टमा खालिदले बीटीएसलाई ब्याकस्टेज भेटेर तस्बिर खिचेका थिए । उक्त तस्बिर सामाजिक सञ्जालमा आएपछि यी दुईको सहकार्य हुने विषय थप चर्चामा आएको थियो । बीटीएससँग सहकार्य गर्ने खालिद पछिल्लो अमेरिकी संगीतकर्मी हुन् । यसअघि निकी मिनाज, एड सिरन र हल्सीले कोरियन ब्यान्डसँग काम गरिसकेका छन् ।
बीटीएससँग जो पनि काम गर्न लालायित हुने गरेका छन् । यसले विश्व संगीतमा आफ्नो चम्किलो उपस्थिति जनाउँदै आएको छ । संगीतका काउन्टडाउनहरूमा सधैं अग्रस्थानमा पर्छ । हालै मात्र पनि यसले बिलबोर्ड चार्टमा इतिहास निर्माण गरेको थियो । ब्यान्डको पछिल्लो एल्बम ‘म्याप अफ द सोल ः पर्सोना’ ले उत्कृष्ट २ सय एल्बमको सूचीमा आठौं स्थान हासिल गरेको बिलबोर्डले जनाएको छ । अझ रोचक कुरा त के भने अप्रिलमा यसले बिलबोर्डको एल्बम काउन्टडाउनमा सिधै पहिलो नम्बरबाट प्रवेश गरेको थियो ।


हाल यो ब्यान्ड ‘लभ योरसेल्फ ः स्पिक योरसेल्फ’ शीर्षकको विश्व भ्रमण कार्यक्रमअन्तर्गत सिकागो पुगेको छ । एक साता त्यहीं रहनेछ । बीटीएसको कन्सर्टका लागि उसका आर्मी (फ्यान) हरू हप्तौंदेखि तयारी गर्दै आएको सिकागो ट्रिब्युनले जनाएको छ । पत्रिकाका अनुसार कन्सर्टमा भाग लिन ओहायो, न्युयोर्क, टेक्सास, क्यानडा र मेक्सिकोदेखि पनि प्रशंसकहरू सिकागो आइरहेका छन् । दक्षिण कोरियाली पावरहाउस बीटीएसको ख्याति तत्काल थामिनेवाला नरहेको संगीत विश्लेषकहरूले बताउँदै आएका छन् ।
सन् २०२० बाट भने ब्यान्डले चुनौती झेल्नुपर्ने पक्का छ । यसले ब्यान्ड, उसका आर्मी मात्रै नभएर समग्र कोरियाली संगीत उद्योगलाई प्रभाव पार्नेवाला छ । कोरियाली संसारबारे अनभिज्ञहरूलाई के थाहा नहुन सक्छ भने ब्यान्डसँग धेरै समय बाँकी छैन । झन्डै छ वर्षसम्म ब्यान्डका सात सदस्य– आरएम, जीन, सुगा, जे–होप, जिनमिन, भी र जंगकुकले बडो ऊर्जावान तरिकाले सक्रियताका साथ के–पपमा लागेर यसलाई विश्व संगीतमै पहिचान दिलाउन सफल भए । अब भने उनीहरू अनिवार्य सैन्य सेवामा जानुपर्ने हुन्छ ।


दक्षिण कोरियाली संविधानअनुसार हरेक पुरुषले कम्तीमा दुई वर्षका लागि सैनिकमा भर्ती हुनैपर्छ । उनीहरू १८ वर्षका भएपछि यसका लागि योग्य मानिन्छन् । उत्तर कोरियाबाट हुन सक्ने सम्भावित भयलाई छेक्न यो नियम लगाइएको बताइन्छ । गएको अगस्टमा यससम्बन्धी नियम संशोधन गरेर भर्ती भइसक्नुपर्ने उमेर हद ३० बाट घटाएर २८ मा झारिएको छ । ओलिम्पक खेलाडी, शास्त्रीय संगीतकर्मी, ब्यालेट डान्सरहरूलाई सैन्य सेवा अनिवार्य नगरिए पनि के–पप आर्टिस्टलाई त्यो छुट छैन । यही कारण सन् २०१३ देखि बीटीएस निरन्तर रूपमा सक्रिय हुँदै आएको छ ।


जम्मा छ वर्षको अवधिमा ब्यान्डले एघार वटा फुल लेन्थ एल्बम र संयुक्त एल्बम सावर्जनिक गरिसकेको छ । पाँच वटा एपी निकालेको छ भने आधा दर्जन सोलो कन्सर्ट टुरमा निस्किसकेको छ । यही अवधिमा अंग्रेजी पप ब्यान्ड ‘वान डिरेक्सन’ ले पाँच वटा एल्बम र चार वटा मात्रै सांगीतिक भ्रमण गरेको थियो । बीटीएसका सबैभन्दा जेठा सदस्य, जीन २६ वर्षका भए । उनी सम्भवतः आउँदो साल सेनामा भर्ती हुन्छन् । ‘कोरियाली भएको हुनाले यो स्वाभाविक हो,’ उनले भनेका छन्, ‘कुनै दिन जब सेनाले बोलाउँछ, हामी तयार हुनुपर्छ र सक्दो राम्रो गर्नुपर्छ ।’ सबैभन्दा कान्छो उमेरका जंगकुक (२१) भने तत्काल यसबारे सोच्न चाहँदैनन् ।


भर्ती हुनैपर्ने बाध्यकारी परिस्थितिसँग के–पप उद्योग लामो समयदेखि जुध्दै आएको छ । दुई वर्ष गायब हुँदा आर्टिस्टले आफ्नो लोकप्रियता गुमाइसक्ने डर हुन्छ । यही कारण म्यानेजमेन्ट कम्पनीहरूले सकेसम्म कम उमेरका सदस्य राखेर सांगीतिक समूह निर्माण गर्ने गरेका छन् । उनीहरू फटाफट गीत सार्वजनिक गर्ने, कार्यक्रम, अन्तर्वार्ता, यताउति सबैमा व्यस्त भइदिन्छन् । ब्यान्डका सबैजना एकैचोटि भर्ती नभएर पालैपालो छिर्ने गर्छन् । यसले उनीहरू ब्यान्ड यथावत् राख्न सघाउँछ । समूह टिकाउन नसकिएको खण्डमा उनीहरू सेवाबाट फर्किएपछि आ–आफ्नै सोलो करियर अघि बढाउँछन् ।

sazna07@gmail.com
–एजेन्सीहरूको सहयोगमा

प्रकाशित : जेष्ठ ३, २०७६ ११:४४
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT