“भारत” कै भर

सलमान खानको नयाँ फिल्म ‘भारत’ले ‘रेस ३’ बाट गुमेको साख फिर्ता ल्याउला ? उनका फ्यानलाई मात्र होइन, पुरा बलिउडलाई छ, चिन्ता र प्रतिक्षा ।
हेलो शुक्रबार

 बलिउडका तीनै खान सलमान, शाहरुख र आमिरका लागि सुखद रहेन, वर्ष २०१८  । सलमानको ‘रेस ३’ बक्सअफिसमा चुक्यो, आमिरको ‘ठग्स अफ हिन्दोस्तान’  ।

‘जिरो’ ले शाहरुखको फ्लप शृंखलालाई पूर्णविराम लगाउन सकेन । त्यसैले त भनियो, दुई दशकमा पहिलोपटक तीन खानको साम्राज्य एकैसाथ संकटमा पर्‍यो । आमिर र शाहरुखको अब कुन फिल्म रिलिज हुन्छ, अझ टुंगो छैन । सलमानचाहिँ ‘भारत’ लिएर हाजिर भएका छन् । यो फिल्म इदको अवसरमा आउँदो बुधबार प्रदर्शन हुँदै छ । सवाल स्वाभाविक भइहाल्यो, सलमानको साख जोगिएला त ? यसबीच उनी निर्मित ‘नोटबुक’ र ‘लभयात्री’ पनि फ्लप भएका थिए ।


सलमान आफैं ‘भारत’ लाई लिएर ज्यादै उत्साही छन् । प्रमोसनमा उनको तीव्र सक्रियताले त्यही देखाउँछ । नामैबाट प्रस्ट हुन्छ, ‘भारत’ देशभक्तिको गाथा हो । सलमानका यस्ता फिल्म प्रायः हिट भइरहेका छन् । ‘टाइगर जिन्दा है’ पछिल्लो उदाहरण हो । अर्को सुखद संयोगचाहिँ, ‘टाइगर जिन्दा है’ र ‘भारत’ का निर्देशक एकै हुन्, अलि अब्बास जाफर । अब्बास र सलमानको यो तेस्रो सहकार्य हो । ‘सुल्तान’ ब्लकबस्टर भयो । ‘टाइगर जिन्दा है’ ले पनि ५ करोडभन्दा बढी कलेक्सन गरेर रेकर्ड राख्यो । दुवै फिल्मले सकारात्मक प्रतिक्रिया पाए । कोरियन मेलोड्रामा ‘ओड् टु माई फादर’ मा आधारित छ, ‘भारत’ । यसको कथा अब्बासले नै लेखेका हुन् । ब्रिटिस उपनिवेशपछिको घटनाक्रमलाई केन्द्रमा राखिएको छ । जसका लागि अब्बासले स्वतन्त्र हुँदा ८ वर्ष भएको एउटा किशोरलाई मुख्य पात्रका रूपमा उभ्याएका छन् । त्यही किशोर ७० वर्ष हुँदासम्मको यात्रा समेटिएको छ । भन्नुपरेन, यो शीर्ष भूमिका सलमान खानको हो । ट्रेलरमै सलमानलाई झन्डै आधा दर्जन भिन्न रूपमा देख्न पाइन्छ । फिल्म बहुप्रतीक्षित बन्नुको कारण यो पनि हो । सलमान आफैंले फिल्मको कथा र पात्रसँग आफू निकै नजिक रहेको अभिव्यक्ति दिएका छन् ।


सलमानको अपोजिटमा छिन्, कट्रिना कैफ । तर यस फिल्मका लागि कट्रिना पहिलो रोजाइ भने होइन । यो भूमिकामा प्रियंका चोपरा अनुबन्ध भइसकेकी थिइन् । अमेरिकाबाट स्वदेश फर्केर फिल्मको तयारीमा जुटिन् पनि । तर सुटिङको केही दिन एकाएक प्रियंकाले हात झिकिन् । उनले विवाहको तयारीका लागि समय चाहिएकाले भारत छोड्नुपरेको स्पष्टीकरण दिएकी थिइन् । त्यसको केही समयपछि निक जोनासकी दुलही बनिन् पनि । तर भारतलाई ‘बाईबाई’ गर्नुको खास कारण अर्कै थियो, क्रिस प्र्रेटसँग हलिउड फिल्म खेल्ने मौका जुरेपछि उनले सलमानको साथ छोडेकी थिइन् । उनको यो निर्णयले सलमान क्रुद्ध हुने भइहाले । तैपनि सुरुसुरुमा यत्ति भने, ‘इट्स ओके ।’ जब हलिउड फिल्मका लागि भारतबाट बाहिरिएको खबर कन्फर्म भयो । सलमानले आक्रोश पोखे, घुमाउरो पाराले । उनको भनाइ थियो, ‘यदि प्रियंका सलमान खानसँग काम गर्न चाहन्नन् भने ठीकै छ । उनी हलिउडको ठूलो हिरोसँग काम गर्दैछिन् नि त ।’


प्रियंकाले ‘भारत’ युनिटलाई ‘धोका’ दिएपछि बलिउडमा उनको आलोचना भएको थियो । कारण, फिल्म युनिटले विवाहलाई बाधा नपर्ने गरी सुटिङ सार्ने प्रस्ताव गर्दा पनि ‘विवाहका लागि कति समय चाहिने टुंगो नभएको’ भन्दै प्रियंका तर्किएकी थिइन् । त्यही बेला पूर्वप्रेमिका कट्रिनालाई साइन गराएका थिए सलमानले । यो जोडीबाहेक पनि फिल्ममा ज्याकी श्राफ, तबु, दिशा पटानी, सुनील ग्रोभरलगायतका कलाकारको अभिनय छ । यसको बजेट एक सय करोड भारु पुगेको छ । लोकसभामा बीजेपीको सानदार जितले फेरि प्रमाणित भएको छ, भारतमा राष्ट्रवाद खुब बिक्छ । सिनेमाको हकमा पनि यही हो । देशभक्तिपूर्ण भूमिकाबाट सलमान स्वयंले धेरैपटक वाहवाही बटुलिकेका छन् । करिअर संकटमा रहेको यो समयमा आएको बेला ‘भारत’ ले त्यस्तै सफलताको स्वाद चखाउला ?

hellosukrabar@gmail.com
(एजेन्सीको सहयोगमा)

प्रकाशित : जेष्ठ १७, २०७६ १२:२०
प्रतिक्रिया
पठाउनुहोस्

सामसङलाई फाइदा

हेलो शुक्रबार

 सामसङले ओगटिरहेको सबैभन्दा बढी फोन बिक्री हुने ब्रान्ड सन् २०२० सम्ममा आफ्नो पोल्टामा पार्ने हुवावेको सपना अबका लागि असम्भवजस्तै हुनेछ  । यसै साता अमेरिकी कम्पनी गुगलले चिनियाँ कम्पनी हुवावेलाई आफ्नो एन्ड्रोइड सेवाको पहुँच सीमित पार्ने भएको छ  ।

यसले हुवावेको फोन व्यापारमा केही धक्का पुग्ने धेरैको अनुमान छ । हुवावेले भने सफ्टवेयरको आफ्नै इकोसिस्टम विकास गर्ने भनेर घोषणा गरिसकेको छ । भविष्यमा हुवावेले विकास गर्ने सफ्टवेयरको इकोसिस्टम एन्ड्रोइडभन्दा पनि बढी प्रयोगकर्तामैत्री र व्यापक हुन सक्छ । तर अहिलेको सत्य के हो भने एन्ड्रोइड अपरेटिङ सिस्टम संसारभरका प्रयोगकर्ताले सबैभन्दा बढी रुचाएको प्लेटफर्म हो र हुवावेसहित धेरै फोन निर्माताहरूले यसैलाई आफ्नो आधार बनाइरहेका छन् ।


स्मार्टफोन बजारमा आफ्नो सबैभन्दा बलियो प्रतिस्पर्धी हुवावेलाई अमेरिकी कम्पनी गुगलले आफ्नो सेवाको पहुँच सीमित मात्रै दिने भएपछि यसको सबैभन्दा बढी फाइदा सामसङलाई हुने अनुमान छ । सामसङलाई उछिन्ने रणनीतिअनुसार नै हुवावेले पछिल्लो समयमा सफलता हासिल पनि गरिरहेको छ । हुवावेलाई गलाउने अमेरिकी रणनीति अनुसार आएको पछिल्लो कदम लामो समय गए यसको सबैभन्दा बढी फाइदा सामसङलाई नै हुनेछ । हुवावेको अहिलेको फोनमा भने अझै तीन महिना गुगलको सेवा सुचारु रहन सक्ने अमेरिकी निकायको निर्णय गरिसकेको छ । आफ्नो प्रतिस्पर्धीमाथि घटेको यो घटना परिघटनाको फाइदा पनि छँदैछ ।


अमेरिकी राष्ट्रपति डोनाल्ड ट्रम्पले अघिल्लो साता गरेको एक निर्णयको आधारमा अमेरिकी कम्पनी गुगलले चिनियाँ कम्पनी हुवावेमाथि लामो समयसम्म व्यापार सम्बन्ध नराख्ने निर्णय गरेको हो । यो गुगलको रुचिभन्दा पनि एक प्रकारको बाध्यता पनि हो । गुगलको यो निर्णय तीन महिनापछि लागू हुनेछ । यसले हुवावेको फोनमा सेक्युरिटी अपडेट, जिमेल, गुगल असिस्टेन्ट, गुगल प्ले स्टोर, गुगल म्याप, गुगल सर्चजस्ता सेवाहरू उपलब्ध हुने छैनन् । योबाहेक हुवावेले आफ्नो आगामी फोनमा गुगलबाट कुनै प्राविधिक सहायता पनि पाउने छैन । गुगलबाहेक अमेरिकी ब्रान्ड इन्टेल, क्वालकम र ब्रोडकमले पनि अमेरिकी सरकारको रणनीतिमा समर्थन जनाएका छन् । यसको अर्थ हो गुगलले अन्य चिप निर्मातासहित स्मार्टफोनमा महत्त्वपूर्ण अर्थ राख्ने ब्रान्डबाट कुनै सहयोग प्राप्त गर्ने छैन । हुवावेले गुगलको निर्णयप्रति असहमति जनाउँदै प्रतिक्रिया पनि दिइसकेको छ । एन्ड्रोइड अपरेटिङ सिस्टमलाई लोकप्रिय बनाउन हुवावेको पनि भूमिका रहेको उसको तर्क छ ।


पछिल्लो समय अमेरिकी सरकारबाट विरोध खेप्दाखेप्दै पनि हुवावेले विश्वव्यापी फोन बजारमा आधिपत्य बढाउँदै लगेको थियो । फ्ल्यागसिप फोनमा पनि उसले प्रतिस्पर्धी सामसङलाई पछि नै पार्‍यो । सामसङको ग्यालेक्सी एस टेनभन्दा
हुवावेको पी थर्टी प्रोले राम्रो समीक्षा पाएको छ । राजनीतिक कारणले हुवावेको फोन बिक्रीमा असर पर्दा यसको प्रत्यक्ष
फाइदा युरोपसहितका देशमा सामसङले उठाउनेछ ।

hellosukrabar@gmail.com

प्रकाशित : जेष्ठ १०, २०७६ १०:१८
पूरा पढ्नुहोस्
प्रतिक्रिया
पठाउनुहोस्