प्रतिष्ठाको लडाइँ

कुशल तिमल्सिना

 चार वर्षअघि लिभरपुलको जिम्मेवारी सम्हालेको पहिलो दिन प्रशिक्षक जर्गेन क्लोपले भनेका थिए, ‘यदि म चार सिजन यहाँ बसें भने मलाई विश्वास छ कि हामीसँग कम्तीमा एउटा ट्रफी हुनेछ  । ’ चार वर्षको बीचमा लिभरपुलले धेरै फाइनल खेलेको छ  ।

प्रिमियर लिगमा उपाधि नजिक पुगेको छ । क्लोपले भनेजस्तो ट्रफी भने एनफिल्ड भित्रन सकेको छैन । आफ्नो भनाइलाई सार्थक पार्ने अन्तिम मौका क्लबलाई शनिबार हुनेछ । जहाँ लिभरपुलले युरोपको सबैभन्दा ठूलो प्रतियोगिताको उपाधिका लागि प्रिमियर लिग प्रतिद्वन्द्वी टोटनह्यामसँग खेल्दै छ ।


अक्टोबर सन् २०१५ मा लिनफिल्ड पुगेपछि क्लोपको टिमले लिग कप फाइनलमा म्यानचेस्टर सिटी, युरोपा लिग फाइनलमा सेभिया र गत सिजन च्याम्पियन्स लिगमा रियल मड्रिडसँग पराजित हुँदै उपाधि विमुख भएको थियो । यस सिजन ९७ अंक जोडेर पनि लिभरपुलले प्रिमियर लिगको उपाधिमा म्यानचेस्टर सिटीलाई माथ दिन सकेन ।


आइतबारको फाइनलपछि लिभरपुल म्यानेजर क्लोप र टोटनह्यामका म्यानेजर माउरिसियो पोचेटिनो दुवैका लागि ट्रफीको खडेरी तोड्ने अवसर हुनेछ । यी दुई विश्व फुटबलमा उच्च रेटेड प्रशिक्षकमध्येका हुन् । उनीहरूले आफू आबद्ध क्लबका लागि ट्रफीको तुलनामा खेलस्तर सुधार गरेर वाहवाही पाइरहेका छन् । सन् २०१४ मा टोटनह्याममा आबद्ध भएयता अर्जेन्टाइन प्रशिक्षक पोचेटिनोले एउटा पनि उपाधि दिलाउन सकेका छैनन् । सत्य के हो भने पोचेटिनोको आगमनअघि टोटनह्यामले इतिहासमै दुईपल्ट मात्र युरोपियन कपमा सहभागिता जनाउन पाएको थियो । उनको आगमन पनि आगामी सिजनलाई समेत गणना गर्दा टोटनह्यामले लगातार चौथोपल्ट च्याम्पियन्स लिग खेल्दै छ ।


पाँचपल्टको युरोपियन च्याम्पियनले महादेशीय प्रतिस्पर्धामा थुप्रै अविस्मरणीय क्षण कमाएको छ । तर, यही सिजन सेमिफाइनल दोस्रो लेगमा महारथी टोली बार्सिलोनाविरुद्ध ४–० को पुनरागमन जितले सबैलाई छायामा पारिदिएको छ । पहिलो लेगमा लिभरपुल ३–० ले पराजित भएको थियो । उपाधिभन्दा ठूलो उत्कृष्ट प्रबन्धन भन्ने भनाइलाई क्लोपले प्रमाणित गरेकोमध्ये पछिल्लो उदाहरण हो त्यो ।
क्लोपले लिभरपुललाई पुरानो विरासततर्फ लगेका छन् । त्योभन्दा धेरै पोचेटिनोले टोटनह्यामलाई यस्तो उचाइमा पुर्‍याएका छन् कि जुन उसले अहिलेसम्म देख्न/भोग्न पाएको थिएन । टोटनह्यामले पहिलोपल्ट महादेशीय प्रतियोगिताको फाइनल खेल्दै छ । घरेलु कपलाई त्यति ध्यान नदिएकामा पोचेटिनोको आलोचना हुने गर्छ । तर, टोटनह्यामलाई कस्तो बनाउने र केमा महत्त्व दिने भन्नेबारे उनी प्रस्ट छन् ।


यो सिजन लामो समयसम्म सम्झनका लागि दुई कारण छन् । एक– टोटनह्यामको पहिलो च्याम्पियन्स लिग फाइनल र दोस्रो– ६२ हजार दर्शक क्षमताको अत्याधुनिक नवनिर्मित रंगशालामा हुन लागेको उपाधि भिडन्त ।गत वर्षको रुस विश्वकप र त्यसपछिको व्यस्त कार्यतालिकाका कारण खेलाडीहरू थकित छन् र केहीमा इन्ज्युरीको समस्या छ । टोटनह्यामका मुख्य हतियार इंग्लिस सुपरस्टार ह्यारी केनले इन्ज्युरीकै कारण क्वाटरफाइनल र सेमिफाइनल गुमाउनुपरेको थियो ।मुख्य खेलाडीको अनुपस्थितिका बाबजुद टोटनह्यामले सामुन्नेका प्रतिस्पर्धीलाई पाखा लगाउँदै आएको छ । आम्स्टर्डममा दोस्रो हाफमा लुकास मोउराले ह्याट्रिक गरेपछि अयाक्सलाई ३–० ले हराउँदै फाइनल यात्रा तय गरेको नतिजाभन्दा उत्कृष्टचाहिँ अरू कुनै छैनन् । सेमिफाइनल पहिलो लेगमा टोटनह्याम पनि १–० ले पछि परेको थियो ।‘हामी फाइनलमा पुग्छौं भनेर कसैले सोचेका थिएनन् तर, हामी आफ्नै बलबुताले यहाँ आइपुग्यौं, मेरा खेलाडीले मेरो विश्वास खेर जान दिएनन्,’ फाइनल यात्रा तय गरेपछि पोचेटिनोले भनेका थिए । स्पेनको राजधानीबाट ट्रफी उठाउने संकेत पनि पोचेटिनोले दिइसकेका छन् ।


सन् २००८ को सिजनपछि पहिलोपल्ट दुई इंग्लिस टिम च्याम्पियन्स लिगको उपाधि भिडन्तमा उत्रिँदै छन् । सन् २००८ मा म्यानचेस्टर युनाइटेड र चेल्सीले फाइनल खेलेका थिए । यसले च्याम्पियन्स लिगमा स्पेनिस क्लबको प्रभुत्व पनि तोडेको छ । पछिल्लो पाँच सिजनमा फाइनल खेल्ने कम्तीमा १ टिम स्पेनका थिए । जहाँ चारपल्ट रियल मड्रिड र एकपल्ट बार्सिलोनाले उपाधि जितेका थिए ।

प्रकाशित : जेष्ठ १७, २०७६ १२:२४
ADVERTISEMENT
प्रतिक्रिया
पठाउनुहोस्
ADVERTISEMENT

बट्टाजस्ता स्याटेलाइट

अन्तरिक्षको तल्लो भागमा साना स्याटेलाइट पठाउने र त्यसैबाट द्रुत गतिको इन्टरनेट वितरण गर्ने योजनाअनुसार स्पेसएक्सले गत साता ६० वटा स्याटेलाइट्सहरू प्रक्षेपण गरेको छ । यो किन महत्वपूर्ण छ :
कान्तिपुर संवाददाता

यो मिसन सफल भयो भने निजी रकेट कम्पनीका लागि नयाँ व्यापारको सुरुवात हुन सक्छ  । बिहीबार बेलुका स्पेसएक्सले ६० वटा इन्टरनेट कम्युनिकेसन्स स्याटेलाइट्सहरू फ्लोरिडास्थित केप कानाभेरल एयर फोर्स स्टेसनबाट प्रक्षेपण गरिए  ।

पृथ्वीको सतहभन्दा लगभग ४३५ किलोमिटर माथि अन्तरिक्षको सबैभन्दा तल्लो कक्षमा स्टारलिंक नामक स्याटेलाइटलाई रकेट तोकिएको दूरीसम्म लगेर छोडेको थियो । त्यसपछि ती सबैले आ–आफ्नो यात्रा सुरु गरेका थिए ।


स्पेसएक्सका संस्थापक तथा प्रमुख कार्यकारी एलोन मस्कका अनुसार प्रक्षेपित सबै स्याटेलाइटहरूले काम गर्न सुरु गरिसकेका छन् । अर्को वर्ष स्पेसएक्सले सयौं यस्तै उपकरणहरू अन्तरिक्षको तल्लो कक्षमा छोड्ने लक्ष्य लिएको छ । यसले संसारको कुनै पनि कुनामा द्रुत गतिको इन्टरनेट चलाउन सहज हुनेछ । गत वर्ष स्पेसएक्सले यसैको दुईवटा प्रोटोटाइप ‘टिनटिन ए’ र ‘टिनटिन बी’ प्रक्षेपण गरेको थियो । यी स्याटेलाइटको वजन जम्मा २२६ किलो रहेको छ ।


अहिले पनि स्याटेलाइटकै सहयोगमा विश्वभर इन्टरनेट चलिरहेको छ । अहिले इन्टरनेट चलाउनका लागि प्रयोग हुने जियोस्टेस्नरी स्याटेलाइट पृथ्वीको सतहभन्दा ३६ हजार किलोमिटर माथि रहेको छ । उक्त स्याटेलाइटले पृथ्वीको सीमित क्षेत्रमा मात्रै इन्टरनेटको सिग्नल आदानप्रदान गर्न सक्छ । र, यिनको प्रयोग पनि निकै महँगो पर्छ । साथै धेरै माथिबाट तलसम्म सिग्नल आदानप्रदान गर्नुपर्ने कारणले त्यो केही सुस्त पनि हुन सक्छ । स्टारलिंक स्याटेलाइट अन्तरिक्षको तल्लो सतहमा रहन्छ जुन केवल ४६० किलोमिटरको हाराहारी हुनेछ । यसले इन्टरनेटको गतिमा झनै बढोत्तरी हुने छ । हालसम्म पनि इन्टरनेटको पहुँच नभएका क्षेत्रहरूमा इन्टरनेट सहज रूपमा उपलब्ध हुनेछ ।


स्पेसएक्सका सहअध्यक्ष मार्क जुनकोसाका अनुसार १२ वटा यस्तै प्रक्षेपणपछि पूरा अमेरिकाभर स्पेसएक्सले इन्टरनेट प्रदान गर्न सक्छ । २४ वटा प्रक्षेपणले अधिक जनसंख्या भएको कुनै पनि क्षेत्रमा इन्टरनेट दिन सक्नेछ । यस्तै ३० वटा प्रक्षेपणले भने विश्वभर इन्टरनेट प्रदान
गर्ने छ । स्टारलिंकको यो मिसन सफल भयो भने अन्तरिक्षमा अन्य कम्पनीहरूले पनि यस्तै स्याटेलाइटहरू प्रक्षेपण गर्न सक्नेछन् । स्टारलिंक स्पेसएक्सका लागि ठूलो महत्त्वको योजना हो । यसले इन्टरनेटको गति बढाउने मात्रै होइन, इन्टरनेट बजारमा स्पेसएक्सलाई ठूलो खेलाडी पनि बनाउनेछ । स्पेसएक्सले जस्तै केही कम्पनीले साना खालका स्याटेलाइट तल्लो अर्बिटमा राख्ने प्रयास जारी राखेका छन् ।

उसको सबै काम योजनाअनुसार भए यो अभियानमा स्पेसएक्स अरू कम्पनीभन्दा अघि बढ्नेछ ।

प्रकाशित : जेष्ठ १७, २०७६ १२:२२
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT