आईओएस थर्टिन

कति छिटो ? के सुधार ?
कान्तिपुर संवाददाता

 आइफोन प्रयोगकर्ताका लागि खुसीको खबर  । आइफोन उत्पादक कम्पनी एप्पलले अपरेटिङ सिस्टम आईओएसको नयाँ संस्करण घोषणा गरेको छ  ।

प्रयोगकर्ताले यसको प्रयोग गर्न केही महिना अझै कुर्नुपर्ने भएपनि उसले यसका प्रमुख विशेषताका बारेमा सोमबार जानकारी दिएको छ ।


हरेक वर्षजसो कम्पनीले आफ्नो अपरेटिङ सिस्टमको नयाँ संस्करण घोषणा गर्दै आएको छ । हरेक पटकको संस्करण घोषणामा यसको नयाँ फिचरप्रति प्रयोगकर्तालाई चासो नहुने कुरै भएन । कम्पनीले अपरेटिङ सिस्टमको नयाँ संस्करण घोषणा गर्दा हरेक वर्ष भन्ने गरेझैं आईओएस थर्टिनको कार्यक्षमता अहिले सञ्चालनमा रहेको आईओएस ट्वेल्भको भन्दा छिटो रहनेछ । कति छिटो हुन्छ ?
कम्पनीकाअनुसार नयाँ संस्करण प्रयोगकर्ता फेस आईडी अनलक ३० प्रतिशतले छिटो हुनेछ भने एप लञ्च हुन लाग्ने समय दुई गुणा छिटो हुनेछ । तर आइफोनका सबै प्रयोगकर्ता अब आफ्नो फोन छिटो चल्नेछ भनेर खुसी हुनुपर्ने कारण भने छैन किनकि यो अपरेटिङ सिस्टम सिक्स एस र सोभन्दा पछिका आइफोनले मात्रै सपोर्ट गर्नेछ । अर्थात्, फाइभ एस र आइफोन सिक्स प्रयोग गरिरहेका ठूलो संख्याका प्रयोगकर्ता नयाँ अपरेटिङ सिस्टमको अपडेटबाट वञ्चित हुनेछन् । एप्पलले घोषणा गरेको नयाँ अपरेटिङ सिस्टमको अरु विशेषता :

डार्क मोड
आईओएस थर्टिनमा प्रयोगकर्ताले सबैभन्दा बढी अनुभूत गर्ने परिवर्तन यही हुनेछ । एप्पलले आईओएसको नयाँ संस्करणमा पूर्णतः डार्क मोडको सुविधा थपेको छ । डार्क मोड नोटिफिकेसन र एप्पलका एपहरूमा समेत कायम रहनेछ । डार्क मोड आईओएस सेभेनपछिको सबैभन्दा ठूलो भिज्युअल अपडेट हो ।

स्वाइपिङ किबोर्ड
आइफोनमा स्वाइपिङ किबोर्ड प्रयोगकर्ताले थर्ड पार्टी एप प्रयोग गर्नुपर्ने थियो । अबको आईओएस अपडेटमा भने प्रयोगकर्ताले किबोर्डमा पनि अपडेट पाउनेछन् जसमा स्वाइपिङ किबोर्डको सुविधा हुनेछ । स्विफ्टकी, स्वाइप वा गुगलको जिबोर्डजस्ता थर्ड पार्टी किबोर्ड प्रयोग गर्नुपर्ने बाध्यता आइफोन प्रयोगकर्तालाई हुने छैन । एप्पलले आफ्नो स्वाइपिङ किबोर्ड फिचरलाई क्वीकपाथ नाम दिएको छ । यो ठूलो सुविधा नभए पनि स्वाइपिङ किबोर्डमा रुचि राख्ने आइफोन प्रयोगकर्ताका लागि भने खुसीको खबर हो ।

रिमाइन्डर एप
आईओएसको नयाँ संस्करणमा रिमान्डर एप पनि परिवर्तन हुनेछ । आईओएस थर्टिनमा रिमाइन्डर एपमा टुडे, सेड्युल, फ्ल्याग्ड र अलजस्ता विभिन्न अप्सन हुनेछ जसले आफ्नो व्यस्त कार्यतालिकालाई एपमार्फत व्यवस्थापन गर्न आइफोन प्रयोगकर्तालाई थप सहजता दिनेछ । रिमाइन्डर एपमा आफ्नो लिस्टमा भएका सम्पर्क नम्बरलाई ट्याग गर्न र एक निश्चित समयमा म्यासेज पठाउने सुविधा पनि प्राप्त हुनेछ ।

मेल, नोट र सफारीमा अपडेट
एप्पलले आफ्ना तीनै एपको डिजाइन परिवर्तन गरेको छ । प्रयोगकर्तालाई फरक–फरक तरिकाबाट मेल, नोट र सफारी प्रयोगको अनुभूति हुने गरी यसको डिजाइन परिवर्तन गरिएको हो । डिजाइन प्रयोगकर्तालाई यी चीज प्रयोगका लागि सहज हुने कम्पनीको दाबी छ ।

एप्पल म्याप
एप्पल म्यापमा प्रशस्त सुधार गरिएको भएपनि यो निश्चित सहरहरूमामात्र उपलब्ध हुनेछ । नेपाली प्रयोगकर्तालाई यो परिवर्तनबाट खुसीहुने ठाउँ
भने छैन ।

इडिटिङ टुल
एप्पलले नयाँ आईओएस अपडेटमा भिडियो इडिटिङ टुल पनि सुधारेको छ । यसअघि फोटोमामात्रै रहेको इडिटिङ सुविधा अब भिडियोमा पनि उपलब्ध हुनेछ । भिडियोमा प्रयोगकर्ताले कल ब्यालेन्स मिलाउने, सार्पनेस बढाउने र न्वाइज रिडक्सनजस्ता फिचरको प्रयोग गर्न पाउनेछन् । त्यसैले मोबाइलमा इडिट गरिने छोटा भिडियो बढी प्रभावकारी हुन सक्छन् ।

एक्सटर्नल स्टोरेज
आइफोन प्रयोगकर्ताले नयाँ अपरेटिङ सिस्टममा एक्सटर्नल ड्राइभबाट फाइलहरू आइफोनको फाइलएपमा इम्पोर्ट गर्ने सुविधा पाउने छन् । यो आइफोन प्रयोगकर्ताका लागि बढी चासो रहने सुविधा हो ।

हेलो शुक्रबार
hellosukrabar@gmail.com

प्रकाशित : जेष्ठ २४, २०७६ ११:०१
प्रतिक्रिया
पठाउनुहोस्
ADVERTISEMENT
ADVERTISEMENT

दुःखीहरूको कथा किन रोएर सुनाउने ?

'बहुसंख्यक दर्शकले सुखद अन्त्य नै खोज्छ भन्दैमा त्यतै दौडिहाल्नुपर्छ भन्ने होइन ।'
सुशील पौडेल

 रिलिजको झन्डै तीन वर्षपछि जात्रा फिल्मको सिक्वेलका रूपमा निर्देशक प्रदीप भट्टराईले जात्रैजात्रा ल्याएका छन्  । प्रदर्शनीको तीन हप्ता पार गर्दा पनि जात्रैजात्रा हेर्न दर्शकको हलमा जात्रा कायमै छ  ।

पछिल्लो समय नेपालमा कमेडी फिल्मले दर्शकको साथ पाइरहेका छन् । जात्रा र शत्रु गते पनि कमेडी जनरामै बनाएका निर्देशक भट्टराईले जात्रैजात्रालाई पनि कमेडीकै स्वादमा तयार पारे । विषयवस्तु गम्भीर हुँदाहुँदै पनि प्रस्तुतीकरण किन कमेडी गर्नुपर्‍यो त ? उनी भन्छन्, हो, ‘जात्रैजात्रा पूरै रोनाधोना बनाएको भए पनि हुन्थ्यो । किनभने दुःखी आत्माहरूको कथा छ । हामीलाई पनि सजिलो हुन्थ्यो होला । तर दुःखीहरूको कथा किन रोएर सुनाउने ? हाँसेर किन नसुनाउने भन्ने लाग्यो ।’ उनले देशमा यसै पनि विभिन्न कारणले दुःखीहरू धेरै भएका बेला कम्तीमा उनीहरू फिल्म हेरेर आफ्नाभन्दा ठूला दुःख अरूका देखेर खुसी होऊन् न भन्ने मनसाय राखेको बताए ।


त्यसो त निर्देशक भट्टराई आफ्नो फिल्मलाई कमेडी मात्रै भन्न रुचाउँदैनन् । फिल्ममा पात्र दुःखमा पर्दा दर्शक हाँस्छन् । तर यसलाई उनी डार्क कमेडी पनि भनिहाल्दैनन् । किन त ? ‘डार्क कमेडी यथार्थपरक नहुन पनि सक्छ । तर जात्रैजात्रामा हावा कमेडीभन्दा पनि तर्कसंगत कमेडी छ,’ उनी यस्ता फिल्म टिम राम्रो भएन भने बिग्रने सम्भावना हुने जोखिम पनि देख्छन् । प्रश्नमाथि प्रश्न गर्ने, तर्क गर्ने, झगडा गर्ने राम्रो टिम भएन भने उब्जेका प्रश्नप्रति जवाफदेही हुने हल खोज्न गाह्रो हुने भट्टराईको ठम्याइ रहेछ ।


त्यसैले जात्रैजात्रालाई दर्शकले राम्रो साथ दिइरहेका छन् । अझ परिवार नै हूल बाँधेर आएको देख्दा भने छक्क छन्, निर्देशक । ‘रोनाधोना र पारिवारिक फिल्म नभएकाले पनि परिवार नै हूल बाँधेर फिल्म हेर्न आउनुहोला भन्ने त हामीले सोचेका पनि थिएनौं,’ उनले भने । समीक्षासमेत तारिफयोग्य आएपछि पुलकित भएका भट्टराईलाई जात्राको सिक्वेल बनाउन सहज भने थिएन । मुख्य पात्र जेल गएका थिए । दुई करोड ८० लाख रुपैयाँको हिसाब देखिएको थिएन । यी यावत् कुराको उत्तरमा केही नयाँ कथा मिसाउनु साँच्चै गाह्रो काम थियो ।


‘यति धेरै आइडियामाथि काम गरियो । डेढ वर्ष जहाँ गए पनि यसैमा दिमाग घोटायौं । सुनको काण्ड र पैसाको मुद्दालाई जोड्न समय लाग्यो,’ निर्देशकले भने, ‘धेरै आइडिया फालिए । पैसा भाग लगाउनुपर्छ भनेर फणीन्द्रले योजना बुनेर सम्पुलाई सबै पैसा दिएर पोइला भगाउन लगाएको थियो । पछि सम्पु साँच्चैको पोइला गइदिन्छे । पैसासँगै पत्नी पनि गुमेपछि फणीन्द्रको जीवन जात्रैजात्रा हुन्थ्यो । यस्ता थुप्रै आइडिया आएका थिए । तर सिक्वेल बनाउन र कमेडीमा तर्क खोज्ने चक्करमा निकै समय लाग्यो ।’ जात्राको सिक्वेलका कारण पनि दर्शकमा यति धेरै अपेक्षा थियो कि उही मेसीले दुई, तीन गोल नहाने राम्रै खेलेन भन्ने परेजस्तो हुन्थ्यो यो टिमलाई पनि ।
दुःखद अन्त्यमा सकिएको जात्राको सिक्वेलले अहिले सुखद अन्त्यसहित बिट मारेको छ । फिल्मप्रतिको दर्शक हेराइ यसको अन्त्यमा पनि निर्भर हुने कुरा अहिले आएर निर्देशक भट्टराईले बुझ्न पाए । भने, ‘फिल्म हेरेर दर्शक खुसी भएरै निस्कन चाहनु हुँदोरहेछ । हिरो, हिरो नै देखिनुपर्छ । जे जस्तो भए पनि राम्रो मान्छेले अन्त्यमा सुख र न्याय पाउनै पर्छ । जात्राको अन्त्यमा मुख्य तीन पात्र जेल जानुपर्दा धेरै दर्शक निराश हुनुभएको थियो । त्यसैले पनि यसपालि दिमागै चलाएर सुखद समापन गरेका हौं ।’


तर दुःखान्त अन्त्य हुनै हुँदैन, दर्शकले रुचाउँदै नरुचाउने भन्ने पनि ठान्दैनन् उनी । ‘पशुपतिप्रसादको त्यही अन्त्य नै दर्शकलाई खुब मनपर्‍यो । जात्राकै पनि कतिपयले रुचाउनुभएको छ । उहाँहरूले जात्रालाई दिमागले हलबाट घरसम्म लग्यो भन्नुहुन्थ्यो । बहुसंख्यक दर्शकले सुखद अन्त्य नै खोज्छ भन्दैमा हामी पनि त्यतै दौडिहाल्नुपर्छ भन्ने होइन ।’पोखरामा जाँदा एक दर्शकले जात्रैजात्रा कमेडी फिल्म नै हैन भनेछन्, प्रदीपलाई । कारणमा ती दर्शकले भनेछन्, ‘पात्र जीवनसँग नजिक छ र उसको दुर्दशामा दर्शकको हाँसो छुट्यो भन्दैमा फिल्म कमेडी हैन । बरु दर्शक कमेडी हुन् ।’ लेखकसमेत रहेका भट्टराईलाई पनि त्यस्तै हो भन्ने लागेको छ । ‘हामीले पनि दर्शकलाई हँसाउनकै लागि भनेर एउटै संवाद पनि थोपरेका थिएनौं । तर्कसंगत कमेडीमा पनि जबर्जस्ती कमेडी गरेको नलागोस् भन्नेमा हामी सचेत थियौं,’ उनको ध्याउन्न दर्शक हाँसुन् भन्ने सधैं रहन्छ । फिल्मका कार्यकारी निर्मातासमेत रहेका जोयश भाइ उर्फ रवीन्द्रसिंह बानियाँले निर्देशकका बारेमा भने, ‘उहाँको खुबी भनेकै गहिरो कुरालाई पनि कमेडीमार्फत दर्शकलाई चखाउने हो । कमेडी दिने तर औषधि हालेर । जात्रैजात्राको पनि आवरणमा मात्रै कमेडी हो । भित्र त पात्रका दुःख नै छन् ।’

sushilpaudel2@gmail.com

प्रकाशित : जेष्ठ २४, २०७६ ११:०१
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT