फैलँदो माकुरी जाल

हेलो शुक्रबार

‘स्पाइडर म्यान : फार फ्रम होम’ ले रिलिज भएको ६ दिनभित्र ५ सय ७७ मिलियन डलर कमायो  । अमेरिकाबाहिर कमाएको ३ सय ९२ मिलियनले स्पाइडर म्यान विश्वमै लोकप्रिय भएको मात्र देखाउँदैन, हलिउडको बजार संसारमा कसरी विस्तार भइरहेको छ भन्ने पनि देखाउँछ  ।

स्पाइडर म्यान, न्युयोर्क सहरको लोकल हिरो । अग्ला–अग्ला भवनमा आफ्नो जालको बलमा झुन्डिँदै लहराउने हिरो । सुपरहिरोको यो मार्बल जमानामा स्पाइडर म्यान सामान्य मानिसको सबभन्दा नजिकको सुपरहिरो, जोसँग घरपरिवार, प्रेमिका र असफलता छ । सानो कदका ठिटो औसत देखिने पिटर पार्कर नामक किशोर कसरी सुपरहिरो स्पाइडर म्यान बन्यो भन्ने कथाले धेरैको मन जित्यो । कमिक्सका पानाबाट निस्किएर सिनेमाको पर्दामा आएको यो जाल बुन्ने हिरोले धेरैलाई आफ्नो फ्यान बनायो ।
मार्बलको संसार भने बेग्लै छ । एभेन्जर्स– इन्ड गेमको ह्याङ अझै कतिपय दर्शकको दिमागबाट उत्रिएको छैन । सर्वशक्तिमान बन्नका लागि विभिन्न धातु र मणिका औंठीहरू जम्मा गर्दै हिँडेको भिलेन र उसलाई रोक्न लागिपरेका सुपरहिरोहरूको कथा धेरै भागसम्म चल्यो । आइरन म्यान, हल्क, डक्टर स्ट्रेन्ज, थोर, ब्ल्याक प्यान्थरजस्ता मार्बलका सुपरहिरोको यो गाथाले बक्स अफिसमा पनि अनेक रेकर्ड राख्यो ।
बक्स अफिसमा स्पाइडर म्यानको पनि कमाइ कम छैन । बक्स अफिस मोजोका अनुसार मार्बल र सोनीको ‘स्पाइडर म्यान ः फार फ्रम होम’ ले पहिलो ६ दिनमा संसारभरमा ५ सय ७७ मिलियन डलरको कमाइ गर्‍यो । यसको लागत १ सय ६० मिलियन डलर छ । यो कमाइमा अमेरिकाभित्र गरेको भन्दा बाँकी विश्वमा गरेको कमाइ धेरै छ । अमेरिकामा यसले १ सय ८५ मिलियन कमाउँदा बाँकी विश्वबाट ३ सय ९२ मिलियन कमाइ गर्‍यो । यसबाट स्पाइडर म्यान संसारभर लोकप्रिय भएको मात्र देखाउँदैन, हलिउडको बजार संसारमा कसरी विस्तार भइरहेको छ भन्ने पनि देखाउँछ ।
ब्याटम्यानको ‘डार्क नाइट’ शृंखला होस् वा सुपरम्यानका सिरिज हलिउडले यस्ता शृंखलाहरूबाट संसारभरको फिल्म बजारमा आफूलाई विस्तार गरिरहेको छ । पछिल्लो समय एनिमेसन र सुपरहिरो फिल्मले नै बजारको ठूलो हिस्सा ओगटेका छन् । टोय स्टोरी होस् वा पेट स्टोरी एनिमेसन फिल्मले आफ्नै दर्शक उत्पादन गरिरहेको छ ।
यस्तोमा मानवीय गुणले भरिएको ‘स्पाइडर म्यान’ एभेन्जरको युनिभर्समा विस्तारै घुस्दै गइरहेको छ । टम होलान्डको अघिल्लो स्पाइडर म्यान : होम कमिङमै टोनी स्ट्रक (रोबर्ट ड्राउनी जुनियर) लाई ‘फादर फिगर’ का रूपमा पेस गरिएको थियो । तर, ‘इन्ड गेम’ मा आइरन म्यानको मृत्यु हुन्छ । यो फिल्ममा संसारलाई नयाँ आइरन म्यान आवश्यक छ भनेर स्पाइडर म्यानले भन्छ । हाईस्कुल पढ्ने एउटा ठिटो, जो आफ्नै क्लासमेटको प्रेममा छ, ऊसँगै युरोप घुम्न उत्सुक छ । युरोपका केटीहरूले अमेरिकनलाई साह्रै मन पराउँछन् भन्ने मान्यतासहित युरोप टुरमा हिँडेको स्पाइडर म्यानले यही यात्रामा टोनीको अत्याधुनिक सुविधा र टेक्नोलोजीले भरिएको चस्मा हात पार्छ । पानीमाथिको सहर भेनिसमा पुगेपछि यसले भेट्छ, अर्को सुपरहिरो मिस्टेरियो । अघिल्ला फिल्ममै उल्लेख भएको मल्टिपल युनिभर्सवाला फन्डा यसमा पनि देखापर्छ । र, कुनै अर्कै ब्रह्माण्डको सुपरहिरो मिस्टेरियो भिलेनसँग लड्न भेनिसमै आइपुग्छ । चाँडै नै यसको यो कुरा गफ भएको र मिस्टेरियो खासमा भिलेन भएको भेद खुल्छ ।
फिल्मको कथा केही ‘ट्वीस्ट’ का साथ सिधा रेखामा हिँडेजस्तो देखिन्छ । आफ्नो परिचय नखुलेको किशोर सुपरहिरो छ, जो युरोप यात्रामा आफूलाई मन परेकी केटीलाई प्रेम प्रस्ताव राख्न चाहन्छ । आम प्रेमकथामा जस्तै यसमा पनि यो बाटोमा केही अवरोध देखा पर्छन् । तिनलाई पार गर्दै हिरो कसरी ‘हिरो’ बन्छ भन्ने नै यसको कथा हो । तर, दर्शकहरूलाई अचम्ममा पार्ने कामचाहिँ फिल्मपछिको ‘क्रेडिट’ सँग आउने दृश्यहरूले गरिरहेका छन् । यसमा देखाइएका दृश्यहरूले नयाँ–नयाँ रहस्य जन्माउने र खोल्ने काम गरेको दर्शकहरूले बताइरहेका छन् । ट्वीटरलगायतका सामाजिक सञ्जालमा मानिसले यसलाई अनौठो मान्दै प्रतिक्रिया जनाइरहेका छन् । इन्ड क्रेडिटमा भिलेनले पिटर पार्कर नै स्पाइडर म्यान भएको भेद खोलिदिन्छ । एभेन्जरको दुनियाँमा स्पाइडर म्यानको परिचय गोप्य नै थियो । यसमा कथाका अरू पनि ट्वीस्टबारे नयाँ रहस्य खडा गरिएको छ ।

प्रकाशित : असार २७, २०७६ ११:५४
प्रतिक्रिया
पठाउनुहोस्

नयाँ गन्तव्य

कान्तिपुर संवाददाता

नेपाल विविधताले भरिएको देश हो  । यो विविधता कस्तो किसिमको रहेको छ भन्ने कुराको विस्तृत रूपमा खोजी हुन सकेको छैन  ।

सरकार र यस मातहतका निकायले नेपालको पर्यटकीय क्षेत्रमा नयाँ गन्तव्यको खोजी बेलाबेलामा गरे पनि यो कामचलाउ मात्र देखिन्छ ।
सरकारले सन् २०२० लाई नेपाल भ्रमण वर्ष मनाउने तरखर गर्दा पनि नेपालको पर्यटकीय गन्तव्य केही निश्चित स्थानमै सीमित छ । प्रचारप्रसारकै अभावमा नेपालमा पर्यटकीय सम्भावना भएका धेरै गन्तव्यहरू ओझेलमा रहेको अघिल्लो साता ‘हामी उठ्ने छौं’ ले आयोजना गरेको ‘मेरो गाउँ मेरो ठाउँ’ भिडियो च्यालेन्जमा सहभागी ५ मिनेटका डकुमेन्ट्रीहरूले देखाए । पहिलोपटक आयोजित प्रतियोगितामा १ सय ३२ वटा नयाँ गन्तव्यका डकुमेन्ट्री प्रस्तुत प्रतिस्पर्धामा थिए । ती डकुमेन्ट्री नयाँ स्थानको भ्रमण गर्न रुचाउने नेपालभित्रकै आन्तरिक पर्यटकहरूलाई समेत आकर्षित गर्ने खालका थिए ।
नुवाकोट घुम्न जाँदा धेरैको पहिलो आकर्षण नुवाकोट दरबार क्षेत्र नै हुने गर्थ्यो । महाभूकम्पले दरबार भत्किने अवस्थामा पुगेपछि नुवाकोटको नयाँ गन्तव्य ‘जर्नी टु सिंहला’ मार्फत सुकबहादुर तामाङले डकुमेन्ट्रीमा निकाले । समुद्री सतहबाट ४,४४४ मिटर उचाइमा रहेको सिंहला र त्यस वरिपरिको दृश्यलाई चित्ताकर्षक ढंगले प्रस्तुत गरेका उनको नौलो गन्तव्यको यो डकुमेन्ट्रीले भिडियो अफ दि इयरकै पुरस्कार हात पार्‍यो ।
पोखरा प्रमुख पर्यटकीय गन्तव्यमै पर्छ । पोखरा पुग्ने पर्यटकहरू यसका वरिपरिका क्षेत्रमा पनि जाने गर्छन् । तर धेरै कम पर्यटक मानुङकोट पुग्छन् । पोखराबाट ४५ मिनेटको सवारी यात्रा र केही घण्टाको हिँडाइमा पुग्न सकिने मानुङकोटको विशेषतालाई निर्देशक आर्यन कुँवरले यसरी प्रस्तुत गरेका छन् कि जो कोहीलाई पनि पोखरा जाँदा जसरी भए पनि एकपटक पुग्नै पर्ने किसिमको बनाउँछ । यसले कुँवरलाई ‘अ फ्युचर स्टार’ डकुमेन्ट्री मेकरको उपाधि दिलायो ।
पूर्वी रुकुमको लुकुम गाउँमा रहेको परम्परागत झाँक्री संस्कृति कति बलियो अवस्थामा रहेको छ भन्ने विषयलाई देवकी विष्टले ‘ट्युन अफ झाँक्री’ मा प्रस्तुत गरिन् । झाँक्री संस्कृतिको अध्ययन गर्न दशकौंदेखि बसेकी विदेशी पर्यटकलाई आधार बनाएर तयार पारिएको यो डकुमेन्ट्रीका दृश्यले नेपालका केही भागहरू अझै पनि अनौठो अवस्थामा रहेको देखाउँछ । यो डकुमेन्ट्रीले नेपालीलाई मात्र नभएर विदेशीलाई समेत अचम्मित बनाउने खालको छ । यसमार्फत उनी ‘वुमन भिडियो मेकर अफ दि इयर’ घोषित भइन् ।
मकैमा निर्भर भएपछि मकै नै सबथोक हो । अन्नका रूपमा फल्ने मकै कसरी मानिसको जीवन, संस्कृति र संस्कार बन्छ भन्ने कुरालाई भीमलाल श्रेष्ठले निर्माण गरेको ‘मकै विवाह’ ले प्रस्तुत गरेको छ । मकैको उब्जनी राम्ररी होस् भनेर ज्योतिषलाई साइत निकालेर मकैको विवाह गर्ने जन्तीमा गहना देखाउने र साइत निकालेर मकै रोप्ने गोरखाको यो परम्परा हेर्दैमा अनौठो र रोचक देखिन्थ्यो । यसले उत्कृष्ट स्क्रिप्ट र संवादको अवार्ड जित्यो ।
महाभूकम्पले गोरखाका धेरै गाउँलाई क्षतविक्षत बनायो, जसमा राइनास पनि पर्‍यो । भूकम्पपछि राइनास नै विस्थापित हुने अवस्थामा पुगेको थियो । तर होम स्टे सञ्चालन गरेर अहिले आफूलाई पहिलाको भन्दा सबल गाउँ बनाउन कसरी सफल भयो भन्ने कुरालाई विक्रम न्यौपानेले डकुमेन्ट्रीमार्फत प्रस्तुत गरेका छन् । पूर्वको सन्दकपुरबारे निर्माण गरिएको डकुमेन्ट्रीले ‘मोस्ट पोटेन्सियल डेस्टिनेसन’ को अवार्ड जित्यो । ३,६३६ मिटरको उचाइमा रहेको यस स्थानबाट नेपाल, भारत र भुटानका ६० भन्दा बढी हिमालहरू हेर्न सकिन्छ ।
पुरस्कारको दौडमा रहेर पनि पुरस्कृत हुन नसकेका अधिकांश डकुमेन्ट्रीले पनि नेपालको नयाँ पर्यटकीय गन्तव्यहरू उजागर गरेका छन् । प्रतियोगितामा नेपालको खानपिन, कला, संस्कृति, ऐतिहासिक तथा धार्मिक स्थल, ताल, झरना, प्राकृतिक रूपमा निर्माण भएका अनौठा ठाउँ, पर्व र मानव निर्मित ताल, संग्रहालयलगायत धेरै विषयमाथि बनेका डकुमेन्ट्री सहभागी थिए । सातै प्रदेशका डकुमेन्ट्रीहरूलाई नजिकबाट नियाल्ने हो भने नेपालमा पर्यटकीय आकर्षणका थुप्रै गन्तव्यहरू थपिन सक्छन् ।

प्रकाशित : असार २७, २०७६ ११:५४
पूरा पढ्नुहोस्
प्रतिक्रिया
पठाउनुहोस्