रेडपान्डा जोगाउन कुकुरको बन्ध्याकरण

कान्तिपुर संवाददाता

ताप्लेजुङ — दुर्लभ वन्यजन्तु रेडपान्डा जोगाउन कुकुरको बन्ध्याकरण थालिएको छ । रेडपान्डा नेटवर्क र जिल्ला पशु सेवा कार्यालयको संयुक्त पहलमा भालुगौंडे र पाथीभरा क्षेत्रमा यस्तो अभियान चलाइएको हो ।

कुकुरका कारण संरक्षणमा चुनौती रहेको र भुस्याहा कुकुरको बिगबिगी बढेपछि शिविर चलाइएको नेटवर्कका कार्यक्रम संयोजक पेमा लामाले बताइन् । समुदायस्तरमै निर्णय गरेर यस्तो अभियान चलाइएको हो । भुस्याहा कुकुरले लखेट्ने र मार्न सक्ने भएकाले यसलाई नियन्त्रण गर्ने विषयमा शिविर सञ्चालनपूर्व छलफल भएको थियो । लजालु स्वभावको रेडपान्डालाई बच्चा हुर्काउने समयमा कुकुरले निकै दु:ख दिन्छ ।

‘भुस्याहा कुकुर मार्ने विषय पनि उठाए, तर मार्नु राम्रो नभएकाले सबैको सहमतिमा बन्ध्याकरणको विकल्प खोजिएको हो,’ पेमाले भनिन् । संख्या यकिन नभए पनि पाथीभरा रेडपान्डाको राम्रो बासस्थान मानिन्छ । नेटवर्कले यो क्षेत्रलाई पर्यटकीय गन्तव्य बनाउन गृहकार्य गरिरहेको छ । भ्यु टावरलगायतको योजना रहेको नेटवर्कले जनायो । फुङलिङ नगरपालिकाले पनि आफ्नो नीति तथा कार्यक्रममा रेडपान्डा क्षेत्र बनाउने उल्लेख गरेको छ ।

सदरमुकाममा कुकुर छोड्न नपाइने
फुङलिङ नगरपालिकाले भदौ १५ पछि छाडा कुकुर नियन्त्रणमा लिने भएको छ । घरधनीलाई आफ्नो कुकुर बाँधेर पाल्न भनेको हो । छाडा छोडिएका कुकुरका कारण सवारी दुर्घटना बढ्ने र मानिसलाई हिँडडुल गर्नसमेत समस्या भएकाले नियन्त्रण अभियान चलाइएको कार्यकारी अधिकृत युवराज ढकालले बताए । नगरपालिकाले सार्वजनिक सूचनामार्फत सबैलाई सहयोगको आग्रह गरेको छ ।

प्रकाशित : भाद्र १४, २०७४ ०८:४५
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

छाउपडी रोक्न कानुनले पुग्दैन

सुदूरपश्चिम र मध्यपश्चिमका महिलाका लागि अभिशापका रूपमा रहेको छाउपडी प्रथा (रजस्वलाको बेला गरिने व्यवहार) को समाधानका लागि कानुन बनाउनु असल काम हो, तर यो प्रथा कानुनको बलमा रोकिनेवाला छैन ।

पूरै सुदूरपश्चिम र मध्यपश्चिमको अधिकांश भागमा बलियो जरा गाडिसकेको यो कुरीतिलाई हटाउन कानुनभन्दा पनि बढी जनचेतनाको खाँचो देखिन्छ । सुदूरपश्चिमको मात्रै कुरा गर्ने हो भने छाउपडी प्रथाको उल्मूलन हुन अझै एक सय वर्षभन्दा पनि बढी समय लाग्ने देखिन्छ । रजस्वला भएकी बुहारीलाई घरभित्र सुताए दुधारो भैंसी वा गाईको दूध सुक्ने विश्वास गरिन्छ जुन जोखिम सासूले मोल्न सक्दिनन् । पढे–लेखेका ससुराले समेत छुयान्त (छुईको लसपस) भएर बिरामी हुने भ्रम पालेका हुन्छन् । आमाबाबुलाई अनुसरण गर्नुपर्ने बाध्यताले आधुनिक विचारका श्रीमान्ले पनि घरदेखि पर अलग्गै ठाउँमा बनेको कटेरो (गोठ) मा राति एक्लै सुताउनु हुँदैन भनी श्रीमतीको पक्षमा एक शब्द बोल्न सक्दैनन् । अनि कसरी हुन्छ छाउपडी प्रथाको निराकरण ? छाउपडी प्रथाको साँच्चिकै निराकरण गर्ने हो भने व्यवहार परिवर्तनमूलक चेतना अभिवृद्धि हुन जरुरी छ । छाउपडी प्रथालाई जरैदेखि उखेलेर फाल्न आजका युवा–युवती तथा किशोर–किशोरीले यसविरुद्ध खुलेर अगाडि बढ्न र आ–आफ्नो घर समाजमा चेतना जोगाउनसमेत जरुरी छ । 
– शिवराजसिंह बलायर
महेन्द्रनगर, कञ्चनपुर

 

प्रकाशित : भाद्र १४, २०७४ ०८:४५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT