पुरोहितलाई आचारसंहिता जारी

मोबाइलबाट तन्त्रमन्त्र बन्देज
धूमपान तथा मद्यपान गर्न रोक
कान्तिपुर संवाददाता

लमजुङ — यहाँका पुरोहितले मोबाइल फोनबाट तन्त्रमन्त्र पाठ गर्न नपाइने नियम बनाएका छन् । धूमपान तथा मद्यपान गर्नसमेत बन्देज लगाइएको छ ।

पुरोहितको भेलाले आफूलाई सुधार्न आचारसंहिता बनाएका हुन् । भेलाले गर्न हुने १३ र गर्न नहुने ९ वटा आचारसंहिता वैदिक कर्मकाण्ड संघले जारी गरेको छ ।

पण्डितले जो कसैको निन्दा नगर्ने, सुर्ती तथा मदिराजन्य पदार्थ सेवन गर्न नपाइने, अपवित्र भइसकेका कपडा लगाएर पूजापाठ तथा यज्ञमा सहभागी नहुने, हिंसा नगर्ने, आशौच (जुठो, सुतक) पर्दा यज्ञादिमा वरणी नहुने, जुठोमा काम गर्दागर्दैको ब्राह्मण शुभ यज्ञमा नजाने आचारसंहिता बनाएको विश्व हिन्दु महासंघका जिल्ला अध्यक्ष पण्डित घनश्याम सुवेदीले बताए ।

उनका अनुसार शास्त्रले निषेध गरेको समयमा विवाह, व्रतबन्ध, घरवास्तुलगायतका यज्ञादि नगर्ने र गर्न नदिने, विश्व हिन्दु महासंघ र वैदिक कर्मकाण्ड महासंघले स्वीकृत गरेका पुस्तकबाट मात्र कर्मकाण्ड गर्ने गराउने र अन्य पुस्तकबाट गर्न नपाउने आचारसंहिता बनाइएको छ ।

पुरोहित शुद्ध वस्त्रसहित हुनुपर्ने, सत्य बोल्ने, अनुशासनको पालना गर्ने, मीठो भाषा बोल्ने, प्रसन्न रहने, रीतिरिवाज र कर्मकाण्डको महत्त्व बुझ्ने र बुझाउने, धर्मशास्त्रको प्रमाण राखेर मात्र धर्मशास्त्रको निर्णय दिने आचारसंहिता बनाइएको वैदिक कर्मकाण्ड संघका जिल्ला अध्यक्ष कमल अधिकारीले बताए । उनका अनुसार कर्मकाण्ड सुरु गर्दा ईश्वर साक्षी राखेर मात्र गर्ने, पुरोहितको ब्राह्मण पोसाक, टीका, टुप्पीशिखा अनिवार्य हुनुपर्ने, कर्मकाण्डको राम्रो अध्ययन गर्ने र प्रशिक्षण लिने, तिथि नक्षत्रको राम्रो विचार पुर्‍याउनुपर्ने, सबैको भलो चिताउने र सामाजिक कार्यमा अग्रसर रहने, कर्मकाण्डलाई एकरूपता ल्याउन र शुद्ध कर्मकाण्ड गर्न प्रशिक्षण दिने र सबै ओमकारको घरमा ओमकारको झण्डा राख्नुपर्ने आचारसंहिता बनाइएको छ ।

पुरोहितलाई आचरण, मर्यादा, अनुशासन र राम्रो चालचलनमा राख्न विश्व हिन्दु महासंघको जिल्ला समिति र वैदिक कर्मकाण्ड संघले संयुक्तरूपमा आचारसंहिता जारी गरेको हो । उनीहरूले खानपिन, लवाइखवाइ, बानीव्यहोराजस्ता कुरामा आचारसंहितालाई जोड दिइएको छ ।

‘पछिल्लो समय पुरोहितहरूले आफ्नो आचारण बिर्सन थालेपछि आचारसंहिता बनाएर लागू गर्नुपरेको हो,’ पण्डित सुवेदीले भने, ‘आचारसंहिता पालना नगर्नेले आफ्नो समितिमा ठाउँ पाउने छैनन् ।’

प्रकाशित : वैशाख २०, २०७५ २०:०५
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

इन्जिनियरिङ र कृषि प्रविधिमा आकर्षण

सन्तानलाई महँगो खर्च हालेर सहर पठाउन नपर्ने भएपछि प्राविधिक विषय अध्यापन गराउने विद्यालयमा भर्ना गराउन अभिभावकको जोड
घनश्याम खड्का

म्याग्दी — भर्ना अभियान जारी रहँदा सामुदायिक विद्यालयलाई चाप परिरहेको छ । त्यसमा पनि यहाँका इन्जिनियरिङ र कृषि प्राविधिक विषय अध्यापन गराउने विद्यालयलाई परेको चाप छुट्टै छ ।  

इन्जिनियरिङ तथा कृषि प्राविधिक विषय पढाउन गाउँकै सामुदायिक विद्यालयमा सम्भव भएपछि अभिभावकको ध्यान यता छ । सन्तानलाई महँगो खर्च हालेर सहर पठाउन नपर्ने भएपछि प्राविधिक विषय अध्यापन गराउने विद्यालयमा भर्ना गराउन रुची बढेको हो । विद्यालयले सीमित संख्यामा मात्रै भर्ना लिने भएपछि यतिबेला अभिभावक भनसुनका लागि दौडधुप गरिरहेका छन् ।

घरदैलो छेउका सामुदायिक विद्यालयमै सिभिल इन्जिनियरिङ तथा कृषि प्राविधिक विषयको पढाइ हुन थालेपछि विपन्न परिवार र छात्राको आकर्षण बढेको छ । प्राविधिक तथा व्यावसायिक शिक्षा कार्यक्रमअन्तर्गत माध्यमिक तहदेखि नै प्राविधिक शिक्षा पढाउने सरकारी नीतिअन्तर्गत बेनी नगरपालिका ९ तोरीपानीको गलेश्वर उच्च माविले ९ कक्षादेखि सिभिल इन्जिनियरिङ पढाउँदै आएको छ ।

‘प्राविधिक शिक्षाको रहर हुँदाहुँदै आर्थिक अभावले उच्च शिक्षामा पढाउन सकिँदैन भन्ने लाग्ने परिवारका बालबालिकालाई विद्यालय तहबाटै प्राविधिक शिक्षाको व्यवस्थाले लाभ भएको छ,’ गलेश्वर माविका प्रधानाध्यापक रामप्रसाद सुवेदीले भने, ‘प्राविधिक शिक्षा प्राप्त विद्यार्थीले औपचारिक रोजगारी नपाए पनि बेरोजगार बन्नु पर्दैन ।’ विद्यालय तहमा प्राविधिक विषय पढेका विद्यार्थीलाई उच्च शिक्षामा पनि सजिलो हुने उनले बताए ।

गलेश्वर माविमा गत वर्ष सात छात्रासहित २३ विद्यार्थी सिभिल इन्जिनियरिङ विषयमा भर्ना भएका थिए । यो वर्ष दुई दर्जनले प्रवेश परीक्षामा सम्मिलित हुन फारम भरेका छन् । विद्यालयले कोटा पुर्‍याउनेभन्दा आधारभूत प्रवेश परीक्षा उत्तीर्णलाई मात्र भर्ना गर्ने गरेको जनाएको छ ।

‘पातलो बस्ती भएको दुर्गम गाउँमा २२/२५ विद्यार्थी भर्ना हुन आउनु उत्साहजनक मान्नुपर्छ,’ प्रधानाध्यापक सुवेदीले भने, ‘यहाँ प्राविधिक विषय पढ्न बाहिरका बालबालिका पनि आइरहेका छन् ।’ कक्षामा विद्यार्थी संख्या धेरै बनाउनुभन्दा सीमित संख्याका विद्यार्थीलाई गुणस्तरीय शिक्षा दिइने उनले बताए ।

यस्तै पश्चिम मालिका गाउँपालिका ४ विमस्थित किसानी आधारभूत विद्यालयले कृषि प्राविधिक (जेटीए) विषय पढाउने गरेको छ । प्राविधिक शिक्षा तथा सीप विकास तालिम केन्द्र (सीटीईभीटी) को सम्बन्धनमा सञ्चालित सिभिल इन्जिनियरिङ तथा कृषि प्राविधिक दुवै विषय अध्यापन पूर्ण नि:शुल्क हो ।

माध्यमिक तहमा सुरु गरिएको कृषि प्राविधिक र सिभिल इन्जिनियरिङ दुवैका पाठ्यक्रम चार वर्षे छन् । विद्यार्थीले साबिक सय पूर्णांकका नेपाली, अंग्रेजी, गणित र विज्ञानबाहेक थप ६ सय पूर्णांकको पाठ्यक्रमसहित हजार पूर्णांकको पढ्नुपर्छ ।
‘मेलापात र गाईगोठ स्याहार्दै विद्यालय शिक्षा लिइरहेका विद्यार्थीका लागि गाउँमै प्राविधिक शिक्षा पाउने ठूलो अवसर हो,’ किसानी माविका प्रध्यानाध्यापक जंगबहादुर गर्बुजाले भने, ‘कृषि पेसामा युवा सहभागिता घटदै गएका बेला जेटीए बनाउने पढाइले ग्रामीण कृषि अर्थतन्त्रमा सहयोग पुर्‍याउँछ ।’ प्राविधिक शिक्षातर्फ विद्यार्थी आकर्षित गर्न शुल्क नलिई विभिन्न सहुलियतका प्याकेज दिएको उनले बताए ।

प्रकाशित : वैशाख २०, २०७५ २०:०३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT