देश हाँक्ने चालक !
काठमाडौँ — अहिले तिमी पढ्नेलेख्ने सानासाना बालक हौ,
भविष्यमा असल बनी देश हाँक्ने चालक हौ ।
जन्म पायौ आमाबाट तातेताते गर्दै बढयौ,
तोतेबोली बोल्दाबोल्दै अक्षर चिनी पढयौ ।
तान्दातान्दै धर्काहरू अलिअलि लेख्न थाल्यौ,
मिहिनेत गरी आफूभित्र चेतनाको दीप बाल्यौ ।
आँगनीमा खेल्दाखेल्दै धेरै साथी भएपछि,
ज्ञानगुनका कुरा सिक्यौ विद्यालय गएपछि ।
पढयौ लेख्यौ खेल्यौ हाँस्यौ नाच्यौ रमाएर
बढ्नुपर्छ सधैं अघि असल मार्ग समाएर ।
ज्ञान दिने कापी–कलम किताबको बोकी झोला,
ज्ञानकै डुंगामाथि चढी तरौँ जीवनको खोला ।
मानव बनी जन्मिएर यो धर्तीमा आएपछि,
धन्य ठान्नु आफूलाई मानवचोला पाएपछि ।
अहिले तिमी पढ्नेलेख्ने सानासाना बालक हौ,
भविष्यमा असल बनी देश हाँक्ने चालक हौ ।
-कमल कोइराला
प्रतिक्रिया