बुर्ज खलिफा विश्वकै अग्लो टावर 

५ वर्ष लगाएर बनाइएको बुर्ज खलिफा यूएईको पर्यटकीय सहर दुबईमा पर्छ । २००४ को जनवरी ६ बाट सुरु गरी सन् २००९ को अक्टोबर १ मा यसको निर्माण सकिएको थियो । सन् २०१० को जनवरी ४ देखि खुला गरिएको यसको उचाइ २ हजार ७ सय २७ फिट (करिब ८२८ मिटर) छ ।

यो टावर करिब सय किलोमिटर परबाट समेत देखिन्छ । यसको निर्माणमा करिब ८ सय अर्ब अमेरिकी डलर खर्च भएको छ । यो टावर भएको क्षेत्रलाई अहिले दुबई डाउन टाउन भनिन्छ । सन् २००४ अघिसम्म यो क्षेत्रमा बालुवा र समुद्रबाहेक केही स–साना संरचना मात्र थिए । १० वर्षमै यूएईले डाउनटाउन बनाएर विश्वलाई आश्चर्य दिने संरचना खडा गरेको हो ।

यति अग्लो टावरभित्र के होला भन्ने जिज्ञासा सबैलाई हुन सक्छ । योभित्र एउटा संसारै छ भन्दा हुन्छ । योभित्र पाँचतारे होटल, अपार्टमेन्ट, रेस्टुरेन्ट, नाइट क्लब, सिनेमा घर, पौडी पोखरी, बैंकहरू, पार्किङलगायत अत्याधुनिक पसल, मस्जिदलगायत छन् । टावरको ७६ औं र ४३ औं तलामा पौडी पोखरी छ । १ सय ४४ तलामा नाइट क्लब छ । यो विश्वकै अग्लो स्थानको नाइट क्लब पनि हो । १२२ औं तलामा रेस्टुरेन्ट छ । तोकिएको पैसा तिरेर यहाँ लन्च र डिनर गर्न सकिन्छ । टावरभित्र पाँचतारे अरमानी होटल पनि छ । यसभित्र ९ सयवटा व्यक्तिगत अपार्टमेन्ट छन् । विश्वका चर्चित व्यक्तिले यहाँ अपार्टमेन्ट किनेका छन् । एक भारतीय व्यापारी जर्जको मात्र २२ वटा अपार्टमेन्ट छन् । भारतीय नायिका शिल्पा सेट्टी, सलमान खान, अनुष्का शर्मा, खेलाडी विराट कोहली, व्यापारी रोहित कोचर, बीआर सेट्टी, फुटबल खेलाडी डेभिड बेक्यामलगायत सेलिब्रिटीका फ्ल्याट छन् ।

इमिरेट्स सरकारले पर्यटन प्रवद्र्धन गर्ने उद्देश्यले यो टावर बनाएको हो । अहिले यो टावर दुबईको मुख्य आकर्षण केन्द्र बनेको छ । टावर तल्लो तहमा फराकिलो छ । माथिल्लो भाग मसिनो हुँदै गएको छ । टावरसँगै करिब १२ सयभन्दा बढी पसल रहेको दुबई मल जोडिएको छ । टावरसम्मै दुबई मेट्रो जोडिएको छ । बस, टयाक्सीबाट पनि यहाँ पुग्न सकिन्छ । बुर्ज खलिफामा १ सय ६३ तला छन् । १ सय ५४ तलासम्म मान्छे जान सकिने भए पनि १ सय ४८ तलासम्म मात्र प्रवेशका लागि खुला गरिएको छ । टावरमा उक्लिन ५७ वटा लिफ्ट छन् । ती लिफ्ट १ सय ४० तलासम्म छन् । ओटिस कम्पनीले निर्माण गरेका यी लिफ्ट विश्वमै सबैभन्दा छिटो गतिमा चल्छन् । टावरको भुइँमुनिका दुई तलामा सवारी पार्किङ छ ।

बुर्ज खलिफा सिसा, स्टिल र आलमुनियम प्रयोग गरेर बनाइएको हो । टावर बनाउन आवश्यक सिसा उत्पादनका लागि भुइँमै कारखाना खोलिएको थियो । ती सिसा हावा र उच्च तापक्रम थेग्न सक्ने गरी बनाइएका छन् । टावरमा २६ हजार सिसाका प्यानल छन् । सिसा सफा गर्न १२ वटा मेसिन जडान गरिएका छन् ।

टावरमा हजाईजहाज बनाउन प्रयोग गरिने विशेष किसिमको आलमुनियम प्रयोग गरिएको छ । टावरको तौल करिब एक लाखवटा हात्तीको तौल बराबर छ । यो टावर अमेरिकाको इम्पायर स्टेट बिल्डिङभन्दा ठीक दोब्बर र पेरिसको आइफिल टावरभन्दा तीनगुना अग्लो छ ।

यो टावरको आर्किटेक इन्जिनियरिङ अमेरिकाको सोफियान अल ज्याब्रीको हो । इड्रिएन स्मिथ र बिल बेकर यसका मुख्य इन्जिनियर हुन् । सुरुवातको चरणमा कोरियाको सामसुङले यसको निर्माणको जिम्मा लिएको थियो । अल गुह्रेर इन्भेस्टमेन्ट ग्रुपले यसको निर्माण सम्पन्न गरेको हो । बुर्ज खलिफामा एक दिनमा झन्डै ९ लाख ५० हजार लिटर पानी खपत हुन्छ । त्यो पानी एक सय किलोमिटर टाढाबाट ल्याइएको छ ।

टावरको फेदमा वरिपरि पानीका तलाउ छन् । त्यहाँ पानी नाच (वाटर डान्स) हुन्छ । हरेक आधा–आधा घण्टामा संगीतसहितको पानी नाच हेर्न लाखौं मानिसको घुइँचो हुन्छ । महिनामा करिब दुई लाख जनाले बुर्ज खलिफाको अवलोकन गर्ने गरेका छन् ।