फेरिएको लक्ष्य

कान्तिपुर संवाददाता

काठमाडौँ — विद्यालयको वार्षिक परीक्षामा उत्तीर्ण भएको खुसियालीमा म र आमा–बाबासँगै काठमाडौंको गल्फुटारमा रहेको वृद्धाश्रम गयौँ । त्यहाँ धेरै उमेरका हजुरआमाहरू हुनुहुँदो रहेछ । म उहाँहरूसँग कुरा गर्न थालेँ । कसैले मलाई काखमा राखेर खुसी हुँदै आशीर्वाद दिनुभयो भने कसैले मायाले सुम्सुम्याउनुभयो ।

एक जना हजुरआमा त धेरै रुनुभयो । उहाँ रोएको देखेर मलाई नरमाइलो लाग्यो । मैले बाहिर आएर उहाँहरूलाई सेवा गर्ने दिदीलाई कारण सोधेँ । दिदीले भन्नुभयो, ‘सबै आमाका छोराछोरी, आफन्त र घर छ । तर परिवारका कोही विदेश गएका छन् त कतिले आफ्नै कामले व्यस्त भएर उहाँहरूलाई हेर्न भ्याउनुभएको छैन । त्यसैले उहाँहरूलाई यहाँ ल्याइएको हो ।’ उहाँको यस्तो जवाफ पाएपछि मलाई मनमनै लाग्यो– ‘त्यस्तो कस्तो काम जसले आफ्नो बुबा–आमालाई हेर्न समय निकाल्नै सकिँदैन ? म त जति व्यस्त भए पनि बुबा–आमालाई धरै माया गरेर आफैंसँग आफ्नै घरमा राख्छु ।’


यस्तो सोच्दै मत कल्पनामा हराएँछु । दिदीले भन्नुभयो, ‘हजुरआमाहरूको खाना तयार भयो ।’ अनि म पनि खुसी हुँदै हजुरआमाहरूलाई खाना खुवाउने काममा सहभागी भएँ । उहाँहरूलाई फेरि भेट्न आउँछौं भनेर हामी त्यहाँबाट फर्कियौँ । बाटोमा आउँदै थियौँ, मैले रोइरहेको एउटा कुकुरको बच्चा देखेँ । मलाई माया लागेर आयो । मैले त्यसलाई नजिकैको पसलबाट बिस्कुट किनेर खुवाएँ । घर फर्केपछि मलाई लाग्यो– ‘ठूलो भएर म डक्टर, इन्जिनियर होइन, जनावरलाई सहारा दिने काममा लाग्नेछु । मानिस त बोल्न सक्छ । आफ्ना कुरा भन्न सक्छ । तर जनावर त बोल्द पनि सक्दैन । त्यसैले म जनावरलाई हेर्छु । मेरो फेरिएको लक्ष्य बाबा अमालाई सुनाएँ । उहाँहरू पनि खुसी हुनुभयो ।
-रिस्ता न्यौपाने
अपी स्कुल, काठमाडौं

प्रकाशित : वैशाख २, २०७५ १२:२१
प्रतिक्रिया
पठाउनुहोस्

नयाँ वर्ष

कान्तिपुर संवाददाता

काठमाडौँ — चारैतिर उल्लास छ मनैभरि छायो हर्ष,उमङ्गको बहार छर्दै आयो फेरि नयाँ वर्ष ।

चारैतिर उल्लास छ मनैभरि छायो हर्ष,

उमङ्गको बहार छर्दै आयो फेरि नयाँ वर्ष ।

सौन्दर्यले भरिपूर्ण प्रकृतिको माझ,
हरियाली प्रकृतिमा नाच्दै आयो ऋतुराज ।
घमाइलो भो मौसम पनि बाक्लो हुस्सु हट्यो,
नयाँ वर्षसँगै यहाँ चिसो पनि सबै घट्यो ।
वनैभरि आँकुरा छन् पाखैभरि लालीगुराँस,
उजाड पाखापखेरामा उम्रँदै छ हरियो घाँस ।
रूखमा बसी कोइली चरी ‘कुहूकुहू’ गर्छ,
मीठो आवाज निकालेर सबको व्यथा हर्छ ।

आपसमा शुभभाव साटी रमाइलो गरौँ,
दु:खपीडा बिर्सी जीवन उत्साहले भरौँ ।
चारैतिर घुमफिर गरी आफन्तजन भेटौँ,
मनका भाव खोली सबै मनको न्यास्रो मेटौँ ।

वर्षभरि गर्ने कामको योजना छ साथमा,
योजनामा चले राम्रो फल आउँछ हातमा ।
नयाँ वर्ष साक्षी राखी लगनशील भई पढ्नुपर्छ,
ठूलो लक्ष्य राखी मनमा सधैँ अघि बढ्नुपर्छ ।

नयाँ वर्षसँगै तिमी कक्षा पनि चढ्छौ,
झोलाभरि कापीकिताब बोकी धेरै पढ्छौ ।
कक्षा चढेपछि तिम्रा हुन्छन् धेरै नयाँ साथी,
साथीसँग हातेमालो गर्दै चढ माथिमाथि ।

चारैतिर उल्लास छ मनैभरि छायो हर्ष,
उमङ्गको बहार छर्दै आयो फेरि नयाँ वर्ष ।

-कमल कोइराला

प्रकाशित : वैशाख २, २०७५ १२:२१
पूरा पढ्नुहोस्
प्रतिक्रिया
पठाउनुहोस्