सानैमा ठूलो पर्दा

राजाराम पौडेल

काठमाडौँ — आयुब सेन ७ वर्षका भए । उनी राजधानीको एक स्कुलमा कक्षा ३ मा पढ्छन् । सात वर्षको उमेरमै ‘मेरी मामु’ चलचित्रमा प्रमुख भूमिका निभाएकाले यति बेला उनको चर्चा बढिरहेको छ । चलचित्रमा अभिनय गर्ने रुचिसँगै चलचित्र निर्माता बुबा सन्तोष सेनको सहयोगका कारण सानो उमेरमै उनले ठूलो पर्दामा देखिने अवसर पाएका हुन् ।

सानो उमेरमै चलचित्रमा अभिनय गर्न त्यति सहज थिएन । तर उनको लगाव र मिहिनेतले यसलाई सहज बनाइदियो ।

आयुबले चलचित्रमा अभिनय गर्नु अगाडि मण्डला थिएटरमा ६ महिना अभिनयको कक्षा लिएका थिए । त्यहाँ सिकेका कुराले उनमा केही परिपक्वता आयो । आत्मविश्वास बढायो । बुबा सन्तोष सेन चलचित्र निर्माता भएकाले पनि उनलाई केही सहज भयो । चलचित्रमा उनी गम्भीर भूमिकामा छन् । उनी ४–५ वटा मात्र डाइलग बोल्छन् । त्यो पनि कुकुरसँग । किनकि चलचित्रमा उनी कुकुरसँग अलि क्लोज छन् । घरमा कुनै समस्या परिसकेपछि बालमनोविज्ञानमा परेको प्रभावलाई उनले अभिनयमार्फत देखाएका छन् । चलचित्रमा एक्लै बस्ने, भाडा फाल्ने र किताब च्यात्ने स्वभाव उनले देखाएका छन् । ‘छायांकनका सुरुवाताका दिन केही असजिलो महसुस भयो,’ उनले भने, ‘तर पछि सहज बन्दै गयो ।’ उलने भविष्यमा आफू सफल हिरो बन्ने बताए ।

चलचित्रको फस्ट लुक र ट्रेलर सार्वजनिक भएपछि स्कुलमा धेरैले यसबारे सोध्न थालेको उनले बताए । ‘मेरा स्कुलका साथी र शिक्षकले पनि ट्रेलर मन पर्‍यो, चलचित्र पनि हेर्छौं भन्नुभएको छ,’ उनले सुनाए ।

आयुबको पुरानो गाउँ स्याङ्जा जिल्लाको पुतलीबजार नगरपालिका ८ बहाकोट हो । उनको अहिले बुद्धचोक पोखरामा घर छ । हाल उनी परिवारका साथ काठमाडांैमा बस्छन्् ।
यम थापाको लेखन/निर्देशन रहेको यो चलचित्रमा अश्लेषा ठकुरी, सारुक ताम्राकार, कुसुम गुरुङ, दुर्गा मल्ल लगायतले अभिनय गरेका छन् । बाबुआमाको घरझगडाले बालमस्तिष्कमा कस्तो असर पर्न सक्छ भन्ने विषयवस्तु चलचित्रमार्फत देखाइएको छ । चलचित्र भाद्र १५ गते शुक्रबारदेखि प्रदर्शनमा आएको छ ।

Yamaha

प्रकाशित : भाद्र २४, २०७५ ०८:५२
प्रतिक्रिया
पठाउनुहोस्
ADVERTISEMENT

सुरी र कुती

कथा
बालिका थपलिया

काठमाडौँ — अवतार अहिले चार वर्षका भए । उनलाई कुकुर, बिरालो, खरायो, चराचुरुंगी एकदम मन पर्छ । उनको घरको बिरालो र कुुकुरले छाउरा पाएको दिन अवतार एकदम खुसी भए ।

उनको ध्यान बढीजसो बिरालो र कुकुरको बच्चामा गयो । छाउरा नांगै भएको देखेर उनले भने ‘आमा † म्याउँम्याउँ र भौँभाँैलाई जाडो भयो, लुगा लगाइदिनु न ।’ त्यसपछि उनी ती छाउराहरूको स्याहारसुसार गर्नमा व्यस्त हुन थाले । आफ्नो भोक, तिर्खा, निद्रा सबै बिर्सिए ।

अवतारको बिरालो र कुकुरप्रेम सुमधुर छ । उनको हजुरबुबाले बाँसबाट बुनेको सानो कोक्रोमा कपडाले बेरेर बिरालोका आमाछोरीलाई बस्ने चाँजोपाँजो मिलाउनुभएको छ । अनि कुकुरलाई पनि तातो कुनामा राख्नुभएको छ । उनी दिउँसो स्कुल गए पनि बिहानबेलुका सानो बिरालो अनि कुकुरको छेउमा बस्छन् र गफ गर्छन् । आमाको छेउमा गएर भन्छन् ‘आमा † यी छाउराहरूलाई भोक लाग्यो खानेकुरा दिऊँ न ।’ छाउरालाई नदिईकन उनी केही पनि खाँदैनन् । आफ्नै लुगा लगाइदिन्छन् ।

स्कुलमा साथीहरूसँग आफ्नो घरमा भएको बिरालो र कुकुरका बारेमा उनले कुरा गरेको सुनेर रिसभ, रामकृष्ण, प्राञ्जल पनि साना छाउराहरू भेटन आउँछन् । उनीहरूले पनि खुसी भएर सुमसुम्याउँछन् । यी बच्चाहरूका लागि यी साना सुरी र कुती छलफलको विषय बनेका छन् ।

राति सुत्दा पनि अवतार बिरालो र कुकुरका छाउरा सम्झिरहन्छन् । उनी भन्छन्– ‘आमा ! सुरी र कुतीलाई हामीसँगै ओछयानमा ल्याएर लुगा ओढाएर सुताऊ न ।’ अवतारलाई छाउराछाउरी स्याहार्न धमाधम छ । घरी उनी कुकुरको छाउरोलाई माया गर्न पुग्छन् भने घरी बिरालोको छाउरोलाई । उनीहरूलाई सकी नसकी पालैपालो बोकेर घर वरिपरि घुम्छन् । आफ्नो साइकलमा राखेर परपरसम्म घुमाउँछन् । रिसभ, रामकृष्ण र प्राञ्जलको घरसम्म पुर्‍याउँछन् । अनि सबै मिलेर ती सुरी र कुती बोक्दै साइकलमा चढाउँछन् ।

तर एक दिन नरमाइलो घटना घटयो । अवतारको बिरालो बाटोमा मरिरहेको भेटियो । अवतार बिरालोलाई त्यो अवस्थामा देखेपछि एकदम दु:खी भए । आमाको सलले आँसु पुछीपुछी रोए । उनले घरपरिवारका सबैलाई रुवाए । साथीहरूलाई पनि सुनाए र सबै जना रोए । पछिसम्म उनले त्यो घटना बिर्सिएनन् । उनी घरी घरी सुरीलाई सम्झिएर रोइरहे । केटाकेटी रोएको हेर्न कसलाई मन लाग्छ र ? हामीलाई उनीहरू खुसी भएको मात्र देख्न मन लाग्छ । ‘एक दिन बिरालो बाँचेर आउनेछ । अर्को जन्म लिनेछ’ भन्दै उनका आमाबुबा अनि हजुरबुबाहजुरामाले उनको र अरू केटाकेटीको मन बुझाउन खोज्नुभयो । अवतार बाँचेको बिरालो आउने दिन पर्खिन थाले ।

अचेल जुन बिरालो देखे पनि अवतार खुसी हुँदै भन्छन्, ‘आमा! बाँचेको बिरालो आयो । अब कुतीको पनि साथी हुने भयो ।’ उनका साथीहरू पनि त्यसै भन्छन् । फेरि अवतारको खुसीका लागि अभिभावकले बिरालो ल्याएर राखिदिनुभएको छ । स्कुल छुट्टी भएपछि उनी उनका साथीहरूसँग कुकुर र बिरालोका छाउरासँग एकछिन् खेलेर मात्र गृहकार्य गर्न बस्छन् । बेलुका सुत्दा पनि तिनै छाउरा, उठ्दा पनि तिनै छाउरा र साथीसँग स्कुलमा पनि तिनै छाउराको कुरा । अवतारका लागि ती छाउरा सबैभन्दा प्यारा छन् । उनको सम्पूर्ण ध्यान ती कुकुर र बिरालाका छाउरामा गएको छ ।

प्रकाशित : भाद्र १७, २०७५ १०:३४
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT