ढुंगानाका दुई बालकृति
काठमाडौँ — बालसाहित्यकार गोपीकृष्ण ढुंगानाका दुई बालकथा कृति बजारमा आएका छन् । बालमनोविज्ञानमा आधारित पुस्तक ‘सजनाको साहस’ र ‘दाइँ गर्ने दिन’ सांग्रिला बुक्सले प्रकाशन गरेको हो ।
दुई कृतिसहित सञ्चारकर्मी ढुंगानाका ११ वटा बालकृति आएका हुन् । कृतिमा सबै चित्र रंगीन छन् । चित्रकार प्रज्वल थापा मगरले कथाअनुसार चित्रलाई जीवन्त बनाएका छन् । सजनाको साहसमा काभ्रेकी बालिका सजनाले भाइको ज्यान बचाएको सन्दर्भ छ । उनले घरनजिकैको जंगलबाट आएको चितुवासँग संघर्ष गरी भाइको जीवन बचाएको घटनालाई ढुंगानाले जीवन्त प्रस्तुति दिएका छन् । दाइा गर्ने दिनमा भने गाउँको सन्दर्भ छ । सहरमा जन्मेहुर्केका बालबालिकालाई गाउँघरमा गरिने दाइँबारे पूर्ण जानकारी कृतिले दिएको छ । ढुंगानाले दाइँमा प्रयोग हुने ठेट शब्दावली प्रयोग गर्दै बालमनोविज्ञानमा आधारित कथा बुनेका छन् ।
प्रकाशित : फाल्गुन १९, २०७५ ११:३३