लिटिल स्टार

कुशल तिमल्सिना

 यो पल्ट विभिन्न देशका चर्चित क्लबहरू पुगौं, जहाँ कलिलै उमेरमा फुटबलका सेलिब्रेटी बनिसकेका लिटिल स्टारहरूले कमाल देखाइरहेका छन्  ।

सानैमा विश्वभर चिनिएका यी लिटिल स्टारहरू अरू कोही नभएर फुटबलजगत्का उत्कृष्ट खेलाडीकै सन्तान हुन् । जो आफ्नो पिताको सफलतालाई प्रेरणा मानेर फुटबललाई भविष्य बनाउन प्रयासरत छन् । क्रिस्टियानो रोनाल्डोका छोरा रोनाल्डो जुनियरले युभेन्टस एकेडेमीको अन्डर–८ को टिमबाट देखाइरहेको कमाल र लियोनल मेस्सीका छोराहरू थियागो र माटेओको फुटबल रुचि गज्जबको छ । म्यान्चेस्टर सिटीका स्ट्राइकर सर्जियो एग्युरोका छोरा तथा डियगो म्याराडोनाका नाति बेन्जामिन एग्युरो, जो मेस्सीलाई गडफादर मानेर फुटबलका क्रेजी बनेका छन् । फ्रान्स र रियल मेड्रिडका महान् खेलाडी जिनेदिन जिदानेका चारै छोराहरू रियल मेड्रिड एकेडेमीको उत्कृष्ट उत्पादन बनेका छन् । ब्राजिलका सुपरस्टार स्ट्राइकर नेइमारका सन् २०११ मा जन्मेका छोरा डेभी लुक्काले बार्सिलोनाको एकेडेमीबाट फुटबल खेल्न थालेका छन् । ब्राजिलियन स्टार रोनाल्डिन्होका छोरा जोआओ मेन्डेस, जसले आफ्नो क्षमता देखाउन बाबुको परिचय गोप्य राखी ब्राजिलको क्रुजेरियो फुटबल क्लबमा ट्रायल पास गरे । प्रशिक्षण सम्झौतापछि मात्रै उनले आफू कसका छोरा हुन् भन्ने खुलासा गरे ।

Citizen

क्रिस्टियानो रोनाल्डो र लियोनल मेस्सी अहिले फुटबलजगत्का सबैभन्दा उत्कृष्ट खेलाडी हुन् । उनीहरू विश्व फुटबलका सबैभन्दा ठूला सेलिब्रेटी पनि हुन् । हरेक अभिभावकमा सन्तानले आफ्नै पेसालाई निरन्तरता दिएको हेर्ने चाहना हुन्छ । जन्मजात सेलिब्रेटी बनेका रोनाल्डो र मेस्सीसँगै अन्य चर्चित फुटबलरका सन्तानहरू पनि आफ्नो पिताको पदचाप पछ्याइरहेका छन् । सानैदेखि व्यावसायिक फुटबलरलाई अभिभावकको रूपमा पाउँदा फुटबलप्रतिको मोह निश्चित रूपमा बढ्छ । यसले भविष्यमा आफ्नो लक्ष्य निर्धारण गर्न बालबालिकालाई सहज पनि हुन्छ । हामी यो पल्ट केही चर्चित फुटबलरका सन्तानका गतिविधिबारे जान्ने छौं, जो आफ्नो पिताको सफलतालाई प्रेरणा मानेर फुटबललाई भविष्य बनाउन प्रयासरत छन् ।


क्रिस्टियानो रोनाल्डो जुनियर


२१ औं शताब्दीकै उत्कृष्ट फुटबलरका रूपमा लिइएका फोर्चुगलका क्रिस्टियानो रोनाल्डोका चार सन्तानमध्ये जेठा हुन्, त्रिस्टियानो रोनाल्डो जुनियर । ३४ वर्षे पिताको पदचाप पछ्याउँदै क्रिस्टियानो जुनियर पनि फुटबल खेल्न थालेका छन् । स्पेनको रियल मेड्रिडबाट पर्याप्त सफलता बटुलेर उनका पिता क्रिस्टियानो रोनाल्डो इटालीको क्लब युभेन्टसमा अनुबन्ध भएपछि क्रिस्टियानो जुनियरले पनि युभेन्टसकै एकेडेमीबाट फुटबल खेल्न सुरु गरेका छन् । क्रिस्टियानो जुनियर अहिले ९ वर्षका भए । युभेन्टस एकेडेमीको अन्डर–८ टिमबाट खेलेका उनले फुटबललाई नै आफ्नो करिअर बनाएमा आफू खुसी हुने पिता क्रिस्टियानो रोनाल्डोले बताउँछन् । ‘ऊ फुटबलर बन्दै छ भन्दा म धेरै खुसी छु, किनभने उसले यस खेलको प्यासन महसुस गरेको छ,’ रोनाल्डोले भनेका छन्, ‘ऊ प्रतिस्पर्धी छ र उसले हार्न मन पराउँदैन ।’

थियागो मेस्सी

पछिल्लो एक दशक क्रिस्टियानो रोनाल्डो र लियोनल मेस्सीमध्ये को उत्कृष्ट भन्ने बहसले विश्व फुटबल गर्मायो । यो अहिलेसम्म जारी छ । रोनाल्डोका छोरा क्रिस्टियानो जुनियरभन्दा साढे २ वर्षले कान्छा थियागो, लियोनल मेस्सीका जेठा छोरा हुन्, जो अहिले ७ वर्षका हुन लागे । मेस्सीले आफ्ना छोरालाई अहिलेसम्म कुनै एकेडेमीमा भर्ना गरिसकेका छैनन् । तर, जेठो सन्तानलाई फुटबलबारे धेरै ज्ञान भएको र भविष्यमा फुटबलरका रूपमा देख्न पाइने आशा व्यक्त गरेका छन् । एक अन्तरवार्तामा मेस्सीले थियागो आफ्नो आलोचक रहेको बताएका थिए । उनका कान्छा छोरा माटेओ अहिले ४ वर्षका भए । ‘दुवैले फुटबल मन पराउँछन् । माटेओको तुलनामा थियागोले धेरै बुझेको छ र उसले ला लिगा, च्याम्पियन्स लिगबारे धेरै जान्न खोज्छ । मैले राम्रो खेल्न नसकेका बेला वा टिम हारेको बेलामा उसले मलाई धेरै प्रश्नहरू सोध्छ, रिपोर्ट देखाउँछ,’ मेस्सीले भनेका छन् ।

बेन्जामिन एग्युरो म्याराडोना

बेन्जामिन एग्युरो म्यान्चेस्टर सिटीका स्ट्राइकर सर्जियो एग्युरोका छोरा हुन् । त्यति मात्र होइन, उनीसँग फुटबलको लामो नाता छ । विश्वकै महान् फुटबलर डिएगो म्याराडोनाका नाति हुन्, बेन्जामिन । तीन महिनाअघि बेन्जामिनले दसौं जन्मदिन मनाएका छन् । बेन्जामिन सन् २०१४ को सुरुवातदेखि नै म्यान्चेस्टर सिटीको एकेडेमीमा फुटबल खेलिरहेका छन् । उनका हजुरबुबा म्याराडोनाले नातिलाई स्ट्राइकर पोजिसमा खेलेको हेर्न चाहेको बताएका थिए । लियोनल मेस्सीलाई आफ्नो गडफादर मान्ने बेन्जामिनले एकेडेमीमा फरवार्ड पोजिसनमै खेल्छन् । सर्जियो एग्युरो र म्याराडोनाकी छोरी जियानिन्ना म्याराडोनाले बेन्जामिन जन्मिएको ३ वर्षपछि नै सम्बन्धविच्छेद गरेका थिए ।

जिदाने दाजुभाइ


फ्रान्स र रियल मेड्रिडका महान् खेलाडी जिनेदिन जिदानेका २३ देखि १३ वर्षसम्मका ४ छोरा छन् । चारै दाजुभाइ रियल मेड्रिड एकेडेमीकै उत्पादन हुन् । जेठा छोरा एन्जो र माइला छोरा लुका सन् २००४ देखि रियलको एकेडेमीबाट फुटबल खेलिरहेका छन् । एन्जोले रियलको पहिलो रोजाइको टिमबाट खेलिसकेका छन् । गोलरक्षक लुका उपयुक्त अवसरको खोजीमा छन् । साइला थियोले सन् २०१० यता रियलको एकेडेमीबाट खेलिरहेका छन् । उनी क्लबको बी टिममा छन् । १३ वर्षीय कान्छा इल्याज पनि सन् २०१३ देखि रियलकै एकेडेमीबाट खेलिरहेका छन् । उनी पिता र दाइहरूको पदचाप पछ्याउँदै छन् ।

डेभी लुक्का


ब्राजिलका सुपरस्टार स्ट्राइकर नेइमारका छोरा डेभी लुक्का सन् २०११ मा जन्मिएका हुन् । उनले सन् २०१७ देखि बार्सिलोनाको एकेडेमीबाट फुटबल खेल्न थालेका छन् । डेभी जन्मँदा नेइमार ब्राजिलको सान्तोसमै फुटबल खेलिरहेका थिए । सन् २०१३ मा बार्सिलोनामा अनुबन्ध भएर ४ वर्ष बिताउने क्रममा नेइमारले आफ्ना छोरालाई बार्सिलोनाकै एकेडेमीमा भर्ना गरेका हुन् । फ्रान्सेली च्याम्पियन पीएसजीबाट व्यावसायिक फुटबल खेलिरहेका नेइमारले आफ्नो छोरा कालियन एम्बाप्पेलाई मन पराउने उल्लेख गरेका थिए ।

जोआओ मेन्डेस


ब्राजिलका महान् खेलाडी रोनाल्डिन्होका छोरा जोआओ मेन्डेस अहिले १४ वर्षका भए । पिताको पदचाप पछ्याउँदै सफल फुटबलर बन्ने लक्ष्यमा रहेका मेन्डेस ब्राजिलको व्यावसायिक क्लबमा अनुबन्ध भएको समाचारले हालै विश्वभरका फुटबलप्रेमी अचम्मित बने । मेन्डेसले ब्राजिलको क्रुजेरियो फुटबल क्लबमा ट्रायल पास गरी प्रशिक्षणको सम्झौता गर्दासम्म पनि उनले पिताको नाम गोप्य राखेका थिए । पछि रोनाल्डिन्होको छोरा भएको थाहा पाएपछि क्लब प्रशासन नै अचम्मित बन्यो । फरवार्ड पोजिसनमा उत्कृष्ट बनेका मेन्डेसले पिताको नाम जोडेर क्लब फ्रशासनलाई अतिरिक्त दबाबबाट मुत्त गर्न यो चलाखी गरेका थिए, जसमा उनी सफल बने । क्रुजेरियो क्लबका ग्रासरुट फुटबल निर्देशक अमारिल्डो रिबेयरोले टेक्निकल रूपमा चुस्त र फिजिकल फिट पाएपछि क्लबका लागि उपयुक्त ठहरिएको प्रतिक्रिया दिएका थिए । उनले भनेका थिए, ‘मेन्डेस आफ्ना पिताजत्तिकै क्षमतावान् खेलाडी हुन् ।’

प्रकाशित : वैशाख २९, २०७६ ११:५९
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

जंकफुड

कृष्णगोपाल श्रेष्ठ

नयाँ शैक्षिक सत्र सुरु भएको पहिलो दिन स्कुलमा सबै विद्यार्थी उपस्थित थिए  । आफू नयाँ कक्षा चढ्दाको पहिलो दिन सबै उत्सुक र उत्साहित थिए  ।

नयाँ झोला, नयाँ किताब, नयाँ कापीकलम, नयाँ कक्षाकोठामा पढ्न पाउँदा कसलाई रमाइलो लाग्दैन र ?


विनिशा कक्षा तीनबाट प्रथम भएर कक्षा चारमा गएकी थिइन् । पहिलो दिन स्कुल जाँदा पहिलेको भन्दा उत्साहित थिइन् । तर कक्षामा पुग्नासाथ उनलाई नराम्रोसँग पेट दुख्यो । उनले आफ्नी साथी प्रियालाई बताइन् । कक्षामा हाजिरी कापी लिएर गुरुआमा आउनुभयो । सबैले अभिवादन गरे । प्रियाले विनिशालाई पेट दुखेको कुरा बताइदिइन् । उनी डेक्समा टाउको अड्याएर बसेकी थिइन् ।


‘साह्रै गाह्रो भएको भए भन म मम्मीलाई फोन गरिदिन्छु,’ गुरुआमाले भन्नुभयो । ‘हुन्छ’ भनेर विनिशाले टाउको हल्लाइन् । गुरुआमाले विनिशाको मम्मीलाई बोलाइदिनुभयो । विनिशा घर जाने मन नहुँदानहुँदै घर गइन् । स्कुल सञ्चालन भएको पहिलो दिनमै आफू बिरामी परेकोमा विनिशालाई दिक्क लाग्यो । तर दिक्क मानेर के गर्नु ? हुने कुरा त भइहाल्यो । अब समस्याको समाधान पो खोज्नु पर्‍यो त ।
त्यसपछि विनिशालाई मम्मीले हस्पिटल लैजानुभयो । हस्पिटलमा उनलाई डाक्टरले चेक गर्नुभयो । आँखा हेर्नुभयो । नङ हेर्नुभयो । पेटमा स्टेथेस्कोप लगाएर हेर्नुभयो र सोध्नुभयो, ‘नानीले केके खाने गरेको छ ?’


विनिशा घोसेमुन्टो लाएर बसिन् । उनको सट्टा मम्मीले नै उनको असाध्यै मन पर्ने खानेकुराको लिस्ट बताउनुभयो, ‘चाउचाउ, कुरकुरे, दुनट, चटपट, अमिलो, दालमोठ, कोक, फ्रुटी, पोट्याटो चिप्स आदि उनलाई असाध्यै मनपर्छ । यीबाहेक अन्य खानेकुरा त विनिशालाई पटक्कै मन पर्दैन ।’ यी सब कुरा सुनेपछि डाक्टरले मम्मीलाई पनि गाली गर्नुभयो, ‘यी सब चिज ल्याइदिनेचाहिँ को नि ?’


मम्मी त्यसपछि चुप । डाक्टरले विनिशालाई सम्झाउँदै भन्नुभयो, ‘हेर नानी १ यी सब ड्राइफुडहरू पटक्कै खानु हुँदैन, बुझ्यौ । त्यसैले त तिमीलाई पेट दुखेको हो नि ।’ फेरि भन्नुभयो, ‘हाम्रो शरीरलाई सन्तुलित खाना आवश्यक पर्छ । सन्तुलित खानाले मात्र हाम्रो शरीरमा चाहिने पौष्टिक तत्त्व दिन्छ । सन्तुलित खाना भन्नाले दाल, भात, रोटी, फलफूल, तरकारी, हरियो सागपात, मकै, भटमास, चना, बोडी आदि हुन् । यी सबै कुरा हाम्रै घरमै पाइन्छन् । ताजा पनि हुन्छन् । यीबाहेक ड्राइफुडहरू धेरै समयअघिदेखि प्याकिङ हुन्छन् । सडेगलेका पनि हुन्छन् । यस्ता सडेगलेका कुरा खाएमा हामीलाई रोग लाग्छ । रोग लागेपछि सोचेजस्तो काम गर्न सक्दैनौँ । त्यस्ता खानेकुराले हाम्रो शरीरको हड्डी कमजोर बनाउँछ । सोच्ने शक्ति कमजोर बनाउँछ । अल्छी बनाउँछ । आँखा पनि कमजोर बनाउँछ ।’ डाक्टरले सोध्नुभयो, ‘यसरी आफूलाई कमजोर बनाउने कुरा अबदेखि खाने कि नखाने ?’


‘नखाने,’ विनिशाले भनिन् । डाक्टरले औषधि लेखिदिनुभयो र भन्नुभयो, ‘पानी प्रशस्त पिउनु ल ।’ विनिशालाई आफूले यस्ता चिजहरू खाएकोमा पछुतो पनि लाग्यो । अबदेखि यस्ता ड्राइफुड खान त के, छुन पनि नछुने र साथीभाइलाई पनि खानु हुँदैन भनेर बताउने प्रण गरिन् ।
आमाले औषधि लिनुभयो र दुवै घर फर्किए ।

सरस्वती श्रेष्ठ सरु

प्रकाशित : वैशाख २२, २०७६ १२:१७
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT