औंलाको पाठ

कान्तिपुर संवाददाता

कान्छी औंला छेउमा बस्छे सबैभन्दा सानी,राम्री अनि छरिती छे भनूँजस्ती–नानी  ।

साइँली औंला सुहाउँदिली
पर्छे सधैं छक्क,
औंठी लाउन पाएकीले
सधैंभरि मख्ख।

माहिलीलाई ‘माझी’ भन्दा
रिसाउली नि फेरि,
अग्लिएर बीचमा बस्छे
दायाँबायाँ हेरी।

‘चोरी’ औंला भने पनि
चोर्न कसले पाउँछ ?
केही देखाउन पर्‍यो भने
उनकै काम आउँछ।

बूढीऔंला मोटीघाटी
एक्लै बस्छे पर,
अरू औंला एकातिर
बाँकी उनकै भर।

देखिँदैनन् पाँचै बहिनी
हेर्दा बराबर,
तर फेरि मिल्न आउँछन्
हत्केलामा घर।

बेग्लाबेग्लै भए पनि
हुनुपर्छ साथ,
औंलाबाट सिक्नुपर्छ
एकताको पाठ ।

इन्द्रकुमार श्रेष्ठ
कमलाकुञ्ज, ओखलढुंगा 

प्रकाशित : जेष्ठ २६, २०७६ १०:३६
प्रतिक्रिया
पठाउनुहोस्

ईदमा रमाएका साथीहरु

कान्तिपुर संवाददाता

कपिलवस्तुको कृष्णनगर नगरपालिका लक्ष्मीनगरका ८ वर्षे रेयान मिर्जा बुधबार बिहानै ६ बजे उठे  । सूर्योदयअघिको नमाज पढे  ।

नुहाए । नयाँ टोपी लगाए । नयाँ कुर्ता–पाइजामा लगाए । चिटिक्क परे । सुगन्धित अत्तर छरे । कृष्णनगरको जलमोना इंग्लिस बोर्डिङ स्कुल कक्षा ३ मा पढ्ने उनी अभिभावक मिर्जाअरशद वेगसँग बिहान साढे ७ बजे मस्जिद पुगे । ८ बजे मस्जिदमा विषेश नमाज पढे । घर फर्के । छरछिमेकका मुस्लिम र हिन्दु साथीसंगीसँग अंकमाल गरे । खुसियाली साटासाट गरे । ठूलासँग आशीर्वाद लिए । केही साथीलाई घरमा बोलाएर सेबई र गुलियो मिठाई खान दिए । ‘अर्को वर्ष अझ राम्ररी धेरै साथीभाइ बोलाएर ईद मनाउँछु,’ उनले भने ।


उनले जस्तै कपिलवस्तु नगरपालिका ३ गौढी चोकका ८ वर्षे ईशान खानले पनि बिहानै नुहाएर नयाँ कुर्ता–पाइजामा लगाए । अभिभावकसँगै छोट्की तौलिहवास्थित बड्की मस्जिद पुगे । विषेश नमाज पढे । साढे ८ बजे घर फर्के । अभिभावकसँग आशीर्वाद लिए । तौलिहवास्थित शान्ति निकेतन इंग्लिस बोर्डिङ स्कुल कक्षा ३ मा पढ्ने उनले साथीभाइसँग गलामिलाएर शुभकामना आदानप्रदान गरे । खुसियाली साटासाट गर्न दुधमा पकाएको सेबई ख्वाए । खजुर पनि खान दिए । ‘अधिकांश मेरा हिन्दु साथी थिए,’ उनले भने, ‘सबैलाई हाम्रो विशेष पक्वान्न सेबई ख्वाएर पठाएँ ।’ उनले साथीहरूलाई ईदबारे पनि बताए । सबै खुसी भए, दङ्ग परे ।


अरबी पात्रोअनुसार दसौं महिनाको पहिलो दिन बुधबार परेको ईद उल फित्र पर्वमा बालबालिकाहरू पनि मनाए । कपिलवस्तु मुस्लिम बहुल क्षेत्र हुँदा धेरै बालबालिका ईदमा रमाए । नयाँ कपडा, टोपी, कुर्ता–पाइजामा लगाउन पाउँदा खुसी भए । उत्साहित भएर नमाज पढ्न मस्जिद/ईदगाह पुगे । त्यहाँ विषेश नमाज पढेपछि अभिभावक र ठूलाबडाबाट आशीर्वाद लिए । आशीर्वाद लिन इष्टमित्र, नाताको घरमा पनि पुगे । त्यहाँ ईदका लागि बनाइएका विषेश परिकार खाँदै रमाए । खुसियाली साटासाट गरे । बालबालिकामा ईदको विषेश उल्लास थियो । यो क्रम कहीँकहीँ ३ दिनसम्म चल्छ ।


रमजानको एक महिना रोजा अवधिभर मुस्लिम धर्मावलम्बी निराहार बस्नुपर्छ । शरीर चोखो राखी दैनिक ५ पटकसम्म नमाज पढ्ने र रातमा ‘तरावी’ नमाज पढ्ने चलन रहेको मुस्लिम संघ जिल्ला अध्यक्ष असहद कमाल बताउँछन् । रोजा बस्ने महिनालाई रमजान भनिन्छ । रमजान सकिएर चाँद देखिएको अर्को दिन ईद मनाइन्छ । यस पर्वमा मुस्लिम धर्मावलम्बीले कमाइको साढे दुई प्रतिशत दान गर्छन्, जसलाई मुस्लिम धर्मग्रन्थ कुरानले ‘जकात’ भनेको छ ।


ईद उल फित्रमा प्रत्येक व्यक्तिले सवा दुई केजी गहुँ दान दिने चलन छ । गहुँ दिन नसक्नेले ६० रुपैयाँ दान गर्नुपर्ने हुन्छ । यस्तो दानलाई सत्कार फितर भनिन्छ । यो दान गरिब विपन्नलाई दिइन्छ । इद उल फित्रको बिहान सूर्योदयअघि पढिने नमाजलाई फजर भनिन्छ । मस्जिद, ईदगाह र खुला ठाउँमा गएर विशेष नमाज पढिन्छ । मुस्लिम धर्मावलम्बीले वर्षमा दुईपटक विशेष नमाज पढ्छन्, बकर ईद र ईद उल फित्रमा ।
शब्द/तस्बिर ः मनोज पौडेल

प्रकाशित : जेष्ठ २६, २०७६ १०:३६
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT