असारे झरी

कान्तिपुर संवाददाता

बादल ओढी आएछ असार अँध्यारो बाटोमा,सुकेका बोट हरिया पार्न धर्तीको माटोमा  ।

स्वागत गर्छन् गाएर गीत
कोइली चरीले,
पहाड मधेस हरिया हुन्छन्
असारे झरीले ।

आकाशे भेल पानीको खेल
देखिन्छ गाउँमा,
खोला र नाला झरना ताल
छ ठाउँ ठाउँमा ।

भ्यागुता पाहा पौडेर निस्के
खेतको आलीमा,
इन्द्रेणी टुक्रा झिकेर यौटा
रङ छर्न बालीमा ।

फुल्दैन फूल असार आई
नझरे वनमा,
झुल्दैन बाली नसरे असार
माटोको मनमा ।

सिकायो कसले असारलाई
आएर दर्किन,
मुर्झाइएका प्राणमा पानी
ल्याएर छर्किन ।

अनौठो लाग्छ सृष्टिको स्वरूप
देखेर मलाई,
असार महिना आएर जान्छ
गरेर भलाइ ।

शान्ति सापकोटा
धोबीघाट, ललितपुर

प्रकाशित : असार २२, २०७६ ११:०२
प्रतिक्रिया
पठाउनुहोस्

आश्रममा कविता

कान्तिपुर संवाददाता

काठमाडौंको बूढानीलकण्ठ आश्रम स्कुलले विद्यार्थीबीच प्रतियोगितात्मक कवि गोष्ठी गरेको छ  ।

३६ विद्यार्थीले प्रतिस्पर्धा गरेको गोष्ठीमा कक्षा ८ की श्रेणा भण्डारी प्रथम, कक्षा १० का सुनिल धामी द्वितीय र कक्षा ८ का निश्चल न्यौपाने तृतीय भए भने कक्षा ८ कै मनीषा भट्टले सान्त्वना पुरस्कार प्राप्त गरिन् । कार्यक्रममा प्रमुख अतिथि कवि ब्रहृमप्रिय प्रेमस्वरूप, प्राचार्य गुन्जन ब्रहृमचारी, शिक्षकहरू मिठ्ठु रावल, रामराज पुडासैनी, कपिल भण्डारी र पुष्पराज अधिकारीले आआफ्ना सिर्जना प्रस्तुत गरे । उनीहरूले विद्यार्थीलाई कला साहित्य क्षेत्रमा अघि बढन सुझाव दिएका थिए ।

प्रकाशित : असार २२, २०७६ ११:०२
पूरा पढ्नुहोस्
प्रतिक्रिया
पठाउनुहोस्