स्वास्नीलाई खुट्टाको जुत्ता सम्झने
कथित पुरूषार्थी तिम्रो लोग्नेलाई घृणा गर्छु म !
स्वास्नीलाई खुट्टाको जुत्ता सम्झने
कथित पुरूषार्थी तिम्रो लोग्नेलाई घृणा गर्छु म !
र त्योभन्दा बढी घृणा त म तिमीलाई गर्छु
किनकि, त्यही लोग्नेको गोडा धोएको पानी पिएर
तिमी आफूलाई पतिपरायण घोषित गर्दछ्यौ !
मुढे बल अनि चिया गफमा नै जीवनको सार्थकता खोज्दै
मेरो बौद्धिकताको उपहास गर्ने तिम्रो
लोग्नेलाई घृणा गर्छु म
र त्योभन्दा बढी घृणा त म तिमीलाई गर्छु किनकि,
त्यही लोग्नेको मुख्र्याईंलाई महानता सम्झेर
आफूलाई महान् पत्नी मानिरहेकी छौ तिमी ।
एकातिर मख्ख पर्छ ऊ
भर्खर पार्लरबाट आएको तिम्रो सौन्दर्यमा
र घृणा बर्साउन थाल्छ मेरो फुस्रो अनुहार र खुइलिएको तालुप्रति !
अर्कातिर घुटुक्क थुक निल्छ ऊ मेरै सामाजिक प्रतिष्ठामा
अनि एकान्तमा घोत्लिन्छ, तिमीभित्र पनि
त्यही प्रतिष्ठाका झिल्का खोज्दै !
तर कहाँ पाओस् उसले मभित्रको अनुपम आभा तिमीमा ?
किनकि, वर्षौंअघि उसले नै
पत्नीधर्मको पोखरीमा चोपलेर निभाइसकेको थियो
तिमीभित्रको चेतनाको झिल्को !
नारीलाई केवल वासनापूर्तिको साधन ठान्ने
तिम्रो लोग्नेलाई म घृणा गर्छु !
र त्योभन्दा बढी घृणा त म तिमीलाई गर्छु
किनकि, त्यही लोग्नेको अँगालोभन्दा बाहिरको संसारै नदेखी
मेरो स्वतन्त्रताको खिल्ली उढाउँछ्यौ तिमी ।
द्रौपदीको साडी तान्दातान्दै थाकेको
दुशासनजस्तो लाग्छ मलाई तिम्रो लोग्ने ! के गरेन र उसले ?
भरेर सोमरसको साहस रातभरि
छाडिदिन्थ्यो बाँदरे हूल मेरो बगैँचामा ।
बिचरा ! मेरा कलिला बिरूवा–कोपिला–फूल अनि पत्ता
छरिन्थे एकाबिहानै चिया दोकान अनि गल्ली गल्लीहरुमा !
तर हार मानिनँ मैले चट्टान छर्न थालेँ बगैँचामा,
आगो उमार्न थालेँ करेसाबारीमा,
तेजाब रोप्न थालेँ नजरका गमलाहरुमा !
तिम्रो त्यो लोग्ने अचेल बन्दै बोक्रे भलाद्मी
सालीनताका साथ अभिवादन गर्छ मलाई
र अलि पर पुगेपछि पछाडिबाट धारे हात लगाउँछ ।
हुट्टिट्याउँले आकाश हेरेभैँm तम्रो साँघुरो परिधिमा
खोज्न थाल्छ मेरो विशाल आकाश ।
घृणा गर्छु म तिम्रो त्यो बिचरो लोग्नेलाई र
त्योभन्दा बढी घृणा त म तिमीलाई नै गर्छु !
किनकि, त्यही लोग्नेमा पाउन चाहन्छ्यौ तिमी
आफ्नो अस्तित्वको सिंहासन !
रात बिताएर भट्टीमा बिहान पतिव्रता खोज्दै आउने
त्यही पतिको दुर्गन्धित सासले नै
आफ्नो जीवन चलेको ठान्ने तिमीप्रति
दया लाग्छ मलाई !
चढाउँदै बलि प्रत्येक पल आफ्नै अस्मिताको
तिमीले पुज्ने त्यो तिम्रो लोग्नेलाई म घृणा गर्छु !
र त्योभन्दा बढी घृणा त म तिमीलाई गर्छु
किनकि, बलि चढ्नेहरुले विद्रोह नगर्दा नै
निरन्तरता पाइरहेछ बलिप्रथाले !
प्रकाशित : पुस १, २०७४ ०९:२६