कोकाकोलाले जब भारी मतले चुनाव जित्यो

त्यो त्यही दिन थियो
जुन दिन
कोकाकोलाले भारी मतले चुनाव जितेको थियो...

मधेस फााटमा
गन्नाघारीको घाँटी सुक्खा थियो, प्याक–प्याक
ऊ एकाएक दौडेर चौराहामा पुग्यो
र, देब्रे दिशातिर हेर्‍यो...

पहाडी भीरको अग्लो छहरो
असिनपसिन हुँदै तिर्खाइरहेको थियो
ऊ पनि हतारहतार निस्क्यो, चौतारामा
र, देब्रे दिशातिर हेर्‍यो...

हिमालको ओठ
कलेटी परेर फुट्दो थियो, पट–पट
ऊ पनि थरथर काँप्दै ओल्र्यो बेंसीतिर
र, देब्रे दिशातिरै हेर्‍यो...

के थियो देब्रे दिशातिर ?
देब्रे दिशातिर थियो
रेल चढेर आइरहेको ‘समृद्धि–सुपर–लोकतन्त्र’
ढाकिएको फूलमाला र अबिरले सर्लक्कै
अनि स्वागतमा चोकचोकमा निस्किरहेको थियो
रक्तिम बोतलहरुको विजय जुलुस
मोटे र पुन्टे बोतल
होचे र अग्ले बोतल
मैचा र बाउचा बोतल
थसुल्ली र दुब्ली बोतल
स्लिम र सेक्सी
अनि ब्युटी र क्युटी बोतल...

देब्रे दिशाबाट आइरहेका
थरीथरी रक्तिम बोतल
जसले घन्काइरहेका थिए गगनभेदी नारा–
‘लाल बोतल जिन्दावाद !
जिन्दावाद !! जिन्दावाद !!
लाल जङ्गल, लाल खोला !!
आयो, आयो कोकाकोला !!

यो त्यही दिन थियो
जुन दिन
कोकाकोलाले भारी मतले चुनाव जितेको थियो...