पानी पीडा

फोकस आउट
नारायण तुम्बापो

काठमाडौँ — पाँचथरको यासोक, स्यावरूम्बा, रानीगाउँ अति सुक्खाग्रस्त क्षेत्रको रुपमा चिनिन्छ । यहाँका झन्डै १२ हजार बासिन्दाको साझा समस्या भनेको एउटै छ— खानेपानीको अभाव ।

यस क्षेत्रका दर्जनौ मुहान सुकिसके । पानी अभावकै कारण स्थानीयको दैनिकी दयनीय बनेको छ । खोला, खोल्सा र आकाशको अप्रशोधित पानीका कारण जन्डिस, रूघाखोकी, पखालाजस्ता रोगव्याध रैथानेको पेवाझैंं बनेको छ । तस्बिरमा दुई युवाले वर्षापछि सडकको खोपिल्टोमा जमेको धमिलो पानी संकलन गरिरहेको देखिन्छ । यो तस्बिर रानीगाउँको तिङ्देन क्षेत्रको हो ।

Yamaha

प्रकाशित : भाद्र २३, २०७५ ०९:०९
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

साधुटार सेरोफेरो

पर्यटन
नारायण तुम्बापो

काठमाडौँ — कुम्भकर्ण हिमालसंँग जोडिएजत्तिकै चिटिक्कको पोखरी छ । पोखरीमा कञ्चनजंघा पहाडी चुचुराको स्पष्ट छाया देखिन्छ । पाँचथरको फिदिम–८, साधुटार प्रकृतिको रोमान्स थलो पो हो कि झैं देखिन्छ ।

हिउँदको खुला मौसममा हिमाल आमनेसामने हुन्छ । आँखैअघि गुराँस, बुकी, सुनाखरीको सौन्दर्य देखिन्छ । धुपी–सल्ला सुसाएको सुन्छि । बुर्कुसी मारौं कि जस्तो हुने घाँसेचउर छ । साधुटार मात्रै होइन, साधुटार सेरोफेरो नै यस्तै छ— मनमोहक, आनन्दमयी ।


साधुटारमा केही बर्ष अघिसम्म पनि यस्तो रौनक थिएन । संयोगले पाइप फुटेर जमेको पानी र आकाशे पानी थपिंदैं गएर बनेको पोखरी यति चित्ताकर्षक बन्यो, यो आसपासका हिमालको प्रतिच्छाया हेर्ने ऐनाझैं बनिदियो । अहिले पाँचथरका फिदिम वा राँके पुग्ने जोकोही पनि साधुटारको रमित हेर्न पुगिहाल्छन् । त्यहाँ पोखरीमा खेलिरहेका राजहाँस र वरपर रमिरहेका तरुन–तन्नेरीको भीड साँच्चिकै मोहक देखिन्छ ।


साधुटार नजिकै पूर्वतिर सुकेटार, दक्षिणमा पौवाभञ्ज्याङ र सिलौटी बसेका छन्— मिलेका दाजुभाइझैं । दक्षिण पश्चिममा छ लव्रेकुटी । हिउँ पर्दा पौवाभञ्ज्याङ, सिलौटी, लव्रेकुटी, सुकेपोखरी, साधुटारको सबै छेउभित्ता सेताम्मे देखिन्छ । हिउँ सिजनमा तरुन–तन्नेरीहरू बरफ होली खेल्न साधुटार सेरोफेरोमा आइपुग्ने गरेका छन् ।


सिलौटी राष्ट्रिय विभूति किरात धर्म प्रवर्तक महागुरु फाल्गुनन्दको समाधिस्थल हो भने लव्रेकुटी ‘तपोभूमि’ । दुई अलग टापु हुन्— लव्रे र सिलौटी । यी दुब प्रकृतिले बनाएको भ्यू–टावर हो कि झैं लाग्छ । साधुटार सेरोफेरोमा राँके बजार, इथुङ, रानीटार, कान्छी दोकान, लालीखर्क पनि उत्तिकै सुन्दर बस्ती छन् ।


मेचीमार्ग हँुदै झापाबाट बस चढ्दा होस् या ताप्लेजुङबाट तल झर्दा— पाँचथरको पौवाभञ्ज्याङ, कान्छी दोकान ओर्लिएर साधुटार सेरोफेरो घुम्न सकिन्छ । समुद्र सतहदेखि २५ सय मिटर उचाइमा साधुटार सेरोफेरो पर्छ । साधुटार हिउँदमा हिउँ खेल्ने र गर्मी सिजनमा सिरसिरे सिरेटोमा रम्ने गन्तव्य बनेको छ । यहाँ स्थानीय उत्पादन भुटेको मकै, बान्टे कटुस र लेकाली टिमुरको अचारसँग उसिनेको लोकल आलु खान पाइन्छ । दूधजन्य दही, मोही, घिउ, छुर्पी, ललिपप र स्याउ, किवी पनि किनी खान पाइन्छ । बसोबासका लागि होमस्टे सुविधा छ । यसरी प्रदेश–१ को साधुटार सेराफेरो चम्कँदो छ, अन्तु डाँडोजस्तै ।

प्रकाशित : श्रावण १९, २०७५ ०९:५९
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT