थारू अटवारी उल्लास

थारू राजा दंगीशरणका पक्षमा पॉच पाण्डवमध्येका भीमले तावामा पकाउन राखेको रोटी नखाई युद्ध लडेकाले यो चाडमा थरीथरीका रोटी पकाएर अग्नि देवतालाई अर्पण गरी खाना खाने, खुवाउने चलन रहेको छ । यो पर्वमा दिनभर व्रत बसेका थारू पुरुषले पकाएका पकवान अग्नि देवतामा चडाएपछि आफ्ना दिदी–बहिनीको नाममा अग्रासन (खानेकुराको कोसेली) छुटयाउँछन् । भोलिपल्ट बिहान भात पकाएर फेरि अग्नि देवतालाई चढाएर दिदीबिहिनीलाई अग्रासन राखिन्छ । पहिलो र दोस्रो दिनको अग्रासनलाई दाजुभाइले दिदी–बहिनीका घरमा लैजाने चलन छ । यो दिन विवाहित दिदीबहिनीहरू दाजुभाइको बाटो हेरी बसेका हुन्छन् । खासगरी पहिलो दिनको अग्रासनमा अन्डीको रोटी अनिवार्य हुन्छ । स्थानीय थारूहरूको भाषामा अन्डी भनिने एक धानको जात हो । धेरै दिदीबहिनीसहितको थारू परिवारमा अन्डीका कम्तीमा चार/पाँच सय रोटी पाक्ने गर्छन् । प्राय: थारू समुदाय संयुक्त परिवारमा बस्ने चलन छ । एक घरमा कम्तीमा २०/२५ जना परिवारका सदस्य हुन्छन् । थारू बस्तीमा अटवारी पर्वको अवसरमा परम्परागत नाचगानसमेत चल्ने गर्छ ।