झरीमा विरोध
लोकसेवा आयोगले खुलाएको स्थानीय तहका कर्मचारीको विज्ञापन सुरूदेखि नै विवादमा पर्यो । मुलुक संघीय संरचनामा गएर प्रदेश सरकार र स्थानीय तहको गठन भएपछि लोकसेवाले स्थानीय तहका लागि कर्मचारी माग गर्दा संविधानले व्यवस्था गरेअनुसारको समावेशिताको सिद्धान्तलाई तोडेको भनेर विरोध भए ।
खासगरी समावेशिताको सिद्धान्तअनुसार आरक्षित समुदायबाट यसको विरोध भयो । संसद्को समितिले विज्ञापन रोक्न पनि निर्देशन दियो । तर, त्यो निर्देशनविरूद्ध अदालतमा मुद्दा पर्यो । र, सर्वोच्चले रोक्नु नपर्ने निर्णय सुनाइदिएपछि लोकसेवा अघि बढ्यो ।
शुक्रबार र शनिबारका लागि तोकिएको परीक्षाको विरोधमा मंगलबार माइतीघर मण्डलामा विरोध प्रदर्शन गरियो । साउने झरीमा विरोधसभामा सहभागी प्रायःले आआफ्ना छाता खोल्दा प्रदर्शन नै रंगीविरंगी देखियो ।
पछिल्लो समय राजधानीवासीको विरोधलाई सबभन्दा नजिकबाट हेरेको मण्डलामा देखिएका यी छाता एउटा पूरै फूलबारीका फूलजस्ता थिए, अनेक रङका ।