भ्यालेन्टाइन डाइनिङ

एक दशक त भएको छैन । तर, ५/७ वर्षयता युवायुवतीले चाडकै रूपमा मनाउन थालेको भ्यालेनटाइन डे फुड बिजनेस गर्नेहरूका लागि पनि एउटा महत्त्वपूर्ण अवसर बनेको छ ।

‘एकले अर्कालाई माया दर्शाउने यो पर्वमा हामीले नि केही न केही नयाँ तयारीका साथ अफर ल्याउनुपर्ने बाध्यताको परिस्थति आइलाग्यो,’ रेस्टुरेन्ट एन्ड बार एसोसिएसन नेपाल (रेबान) का केन्द्रीय अध्यक्ष प्रमोदकुमार जैसवालले भने । फेब्रुअरी १४ नआउँदै काठमाडौं, पोखरा र सौराहाका रेस्टुरेन्ट, बार र होटलले कुनै न कुनै अफर ल्याउनुपर्ने नै भएको छ । नयाँ सजावट गर्नै पर्छ । 

रोम सम्राटले आफ्ना सैनिकलाई प्रेम र विवाहमा लगाएको निषेधलाई पादरी सन्त भ्यालेन्टाइनले उल्लंघन गर्दै सार्वजनिक बिहे गराइदिएपछि सन् २६९ देखि सुरु गरेको भ्यालेन्टाइन पर्व संसारभर लोकप्रिय भएको छ । काठमाडौं पनि भ्यालेन्टाइनमा लपेटिन्छ । लाजिम्पाटमा ककटेल, लन्च र डिनरका लागि ८ वर्षअघि स्थापना भएको मेला रेस्टुरेन्ट एन्ड बारका सञ्चालकसमेत रहेका रेबान अध्यक्ष जैसवालका अनुसार अहिले सहरको व्यस्ततामा डुबेकाहरू पनि कसैलाई भेट दिनुछ वा महत्त्वपूर्ण विषयमा डिल गर्नुछ भने पनि ‘लौ ∕ भ्यालेन्टाइन डेमै भेटौं न,’ भन्छन् । 

यो दिवसमा सार्वजनिक बिदा नभए पनि अन्तत: अधिकांशले भ्यालेन्टाइन मनाउने हब इटरी हाउस, कफी सप, रेस्टुराँ हुन थालेका छन् । सिनेमा हल जाने, घुम्न निस्किनेहरूको पनि अन्तिम बसाइ रेस्टुराँ नै हुन्छ । ‘यो बेला हामी नर्मल डेको दाँजोमा थ्री टाइम्स बिजनेस सम्भावना देख्छौं,’ तीन दशकदेखि रेस्टुरेन्ट व्यवसायमा आबद्ध जैसवालले भने । उनका अनुसार अहिले भ्यालेन्टाइनमा इटरी हाउसहरूमा रातो रंगको एम्बियन्समा सजावट हुन्छ । त्यहाँ प्रेम जनाउने संकेत, चिह्न, बेलुन, रिबन राखिन्छ । अनि, त्यो दिन गीत पनि सकभर मायापिरतीकै बजाइन्छ । ‘माहोल बनाउने मात्रै होइन, उपहार पनि राख्न थाल्यौं, मेनुमा एउटा खरिदमा अर्को सित्तैमा पनि दिन थाल्यौं, यस्तो नगर्नेहरू आउटलेट त कस्तो कस्तो लाग्न थाल्यो ५/७ वर्षयता,’ जैसवालले भने । पछिल्ला वर्ष अंग्रेजी, नेपाली नयाँ वर्ष, क्रिसमस, विकेन्ड जस्तै भ्यालेन्टाइन–डे पनि एउटा यस्तो पर्व भइदियो जसले फुड बिजनेसमा पनि योगदान पुर्‍याउन थाल्यो ।

पाँचतारे होटल अन्नपूर्णले आफ्नो फेसबुक पेजमार्फत अतिथिहरूलाई भ्यालेन्टाइन दिवसको तयारीमा जुट्न आह्वान गरिसक्यो । अतिथिहरूलाई योजना बनाउन यसले फेब्रुअरी २ तारिखमै अपिल गरिसकेको छ । ५२ वर्ष अघिदेखि अतिथिहरूका लागि आफ्नो ढोका खुला गरेको अन्नपूर्णले होटलका आउटलेटहरू अरनिको, घर–ए–कबाब, कफी सप, जुनेली बार र केक सपमा भ्यालेन्टाइन दिवसलाई साइत बनाई प्रि–अर्डर र रिजर्बेसनका लागि खुला गरेको बताइसकेको छ । ती आउटलेटमा सेट मेनुहरू राखेर उसले आफ्नो पुलसाइडमा लिमिटेड टेबल रहेकाले रिजर्ब गर्न पनि अत्याएको छ । कुनै बेला स्वर्गीय अधिराजकुमारी श्रुतिको फेबरेट अन्नपूर्णको फ्रन्ट केक सपले दिल झल्किने ‘थ्री–डी’ केक पनि तयार पार्दै छ ।

बौद्धस्थित हयात होटलले रोमान्टिक डाइनिङ, स्टे प्याकेज र रोमान्टिक स्पा जर्नी गरी तीनवटा प्याकेज सार्वजनिक गरेको छ । भ्यालेन्टाइन डे र भोलिपल्ट गरी दुई दिनका लागि ल्याइएका प्याकेजमा कम्प्लिमेन्ट्री चकलेट आदि राखेको छ । काठमाडौं बाहिर घुम्न जानेका लागि चितवनको सौराहा पनि अर्को गन्तव्य हुन सक्छ । किनकि सौराहामा नौ वर्षयता यही प्रेम दिवसलाई नै साइत पारेर फुड फेस्टिभल आयोजना गरिँदै आएको छ । रेबानका मात्रै सौराहामा १ सय सदस्य रेस्टुरेन्ट छन् । ती सबैले यस पर्वमा केही न केही अफर ल्याउँछन् नै । 
अहिले प्रहरीले प्रेम दिवसको साँझ चल्तीका सहरहरूमा अलि अबेरसम्म आउटलेटहरू खुला गर्न छुट दिन्छ । 




प्रकाशित : फाल्गुन २, २०७३ १८:०४
ADVERTISEMENT
प्रतिक्रिया
पठाउनुहोस्
ADVERTISEMENT

पुनःसंरचना आयोगका अध्यक्ष भन्छन्, 'स्थानीय तहको सङ्ख्या बढी भयो'

'तीन सय हुनुपर्नेमा ७१९ स्थानीय निकाय बनाउन बाध्य'

रुकुम — स्थानीय तहको पुनःसंरचनाको अवस्थाका बारेमा आज यहाँ भएको अन्तर्क्रियामा उनले 'बढीमा तीन सय स्थानीय तह हुनुपर्नेमा राजनीतिक दलका कारण नेपालमा ७१९ स्थानीय तह बनाउन आफूहरु बाध्य भएको बताए ।'

स्थानीय तह पुनःसंरचना आयोगका अध्यक्ष बालानन्द पौडेलले आयोगले अहिले सिफारिस गरेको स्थानीय तहको सङ्ख्या बढी रहेको बताएका छन् ।

अध्यक्ष पौडेलले आयोगले सिफारिस गरेको सङ्ख्या बढी भएको कुरा इतिहासले पुष्टि गर्ने उल्लेख गर्दै स्थानीय तह कार्यान्वयन नगर्ने भित्री मनसायका कारण केही राजनीतिक नेताले अहिले पनि सङ्ख्या बढाउनुपर्ने भनिरहेका बताए ।

'नयाँ संविधानले दिएको परिकल्पनाअनुसार स्थानीय तहको सङ्ख्या बढी बनाउनु भनेको सिंहदरबारको अधिकारलाई धेरै ठाउँमा विभाजन गर्नु नै हो', उनले भने 'संविधानले स्थानीय तहमा दिएको अधिकार कार्यान्वयन हुन नदिनका लागि केही दल र त्यसका नेताले यसको सङ्ख्या बढाउने खेलमा लागेका छन् ।'

अध्यक्ष पौडेलले छोटो समयमा धेरै काम गर्नुपरेका कारण सबै कुरा भनेजस्तोगरी मिलाउन नसकिएको स्पष्ट पारे ।

प्रकाशित : फाल्गुन २, २०७३ १८:०४
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT