तन्दुरुस्ती सफलताको पहिलो सर्त

मधु शाही

काठमाडौं — बलिउड अभिनेत्री शिल्पा शेट्टीलाई फिटनेश गुरु मानिन्छ । खास गरी योगमार्फत शरीर स्वस्थ र तन्दुरुस्त राख्न उनी जोड दिने गर्छिन् । तन्दुरुस्ती सफलताको पहिलो सर्त हुने उनी मान्छिन् ।

फिटनेसलाई सौन्दर्य मन्त्र बनाएकी अर्की बलिउड अभिनेत्री हुन्, विपाशा वसु । युटयुबमा उनले ‘३० मिनेट वर्क आउट’ भन्दै भिडियो नै अपलोड गरेकी छन् । यो भिडियोका भ्युअर्स ३ करोडभन्दा बढी पुगिसकेका छन् । 


फिटनेसको प्रभाव नेपाली कलाकारमा पनि उत्तिकै छ । उमेर पाक्दै गएका अभिनेता राजेश हमाल, अभिनेत्री करिश्मा मानन्धरलगायतका सेलेब्रिटीको फिजिकल फिटनेसले सधंै चर्चा पाइरहन्छ । यसको रहस्य के होला ? राजेशले सामाजिक सञ्जालमार्फत दर्शकलाई जवाफ दिइरहेका हुन्छन् । उनले फिटनेस वर्क आउट गर्दै गरेका विभिन्न तस्बिर फेसबुकमा राखेका छन् । कहिले राति त कहिले बिहान खिचिएका फोटाहरू उनको फेसबुकमा देख्न सकिन्छ । रातमा समेत वर्क आउट गरेको फोटोले उनी फिटनेसप्रति कति गम्भीर छन् भन्ने खुलाउँछ । आफ्नो मात्रै होइन, उनी ‘स्वस्थ्य रहनु’ भन्दै फयानहरूलाई उत्तिकै अभिप्रेरित गरिरहेका हुन्छन्, फेसबुकमार्फत । 


त्यस्तै, फिटनेसमा सचेत हुने अभिनेत्रीमध्ये बेनिसा हमाल पनि पर्छिन् । बिहान होस्् या बेलुकी, जति बेला समय मिल्छ, उतिबेला उनी जिमका लागि तयार हुन्छिन् । ‘कार्डियो’ उनको मन पर्ने एक्सरसाइज हो । कहिलेकाहीं फिल्म सुटिङमा व्यस्त हुँदा भने उनी जिम धाउन पाउँदिनन् । ‘तर, जहाँ भइन्छ त्यहाँ हल्का एक्सरसाइज गरेकै हुन्छु,’ उनी भन्छिन्, ‘एक्सरसाइज नहुँदा मुड अफ भएजस्तो लाग्छ ।’ साताको दुई–तीन पटक चाहिँ उनी जसरी भए पनि जिमखाना जाने गर्छिन् । ‘शरीरलाई तन्दुरुस्त राख्न व्यायाम आवश्यक छ,’ उनी सल्लाह दिन्छिन्, ‘त्यहीअनुसार दैनिक खानपानमा पनि ध्यान दिनुपर्छ ।’ हेभी एक्सरसाइज गर्नेले खानपानको सन्तुलन मिलाउन सकेन भने शरीरलाई उल्टो असर गर्ने उनको अनुभव छ । 


कलाकार एवं कार्यक्रम प्रस्तोता सञ्जय गुप्ता पनि वर्क आउटमा उत्साहित महसुस गर्छन् । उनको इन्स्टाग्राम फोटोले धेरै कुरा खुलाउँछ । हरेक एक्सरसाइज मुभमेन्टमा सेल्फी खिच्दै उनले फोटो पोस्ट गरेका छन् । नियमित व्यायामका लागि उनी साइकलसमेत प्रयोग गर्छन् ।

गायिका सुनीता दुलालले पनि फिटनेसप्रति चासो देखाएकी छन् । ‘आजैदेखि एक्ससाइज सुरु गर्दै छु, र अब सधैं गर्नेछु’ भन्ने स्टाटससहित उनले पनि जिमखानाको फोटो फेसबुकमा राखेकी छन् । उनको फोटामा वर्क आउट गर्दा निकै रमाइलो हुने र सधंै यसलाई जारी राख्नु भन्दै शुभेच्छुकहरूले प्रतिक्रिया दिएका छन् । 


फिटनेसमा रमाउनेमध्ये रंगकर्मी सिर्जना सुब्बा पनि पर्छिन् । उनको एक्सरसाइज गर्ने तरिका भने अलिक बेग्लै छ । उनी जिममा धाउनुभन्दा आउट डोर ट्राभलिङ गर्न मन पराउँछिन् । ‘नेचर लभर छु,’ उनी भन्छिन्, ‘साइक्लिङ जस्तो गुड एक्सरसाइज केही हँुदैन ।’ फिजिकल एक्सरसाइजसँगै शान्त वातावरण स्वास्थ्यका लागि आवश्यक रहेको उनको मत छ । त्यही भएर फुर्सद पाउनासाथ उनी राजधानीको कोलाहल छोडेर साइकल यात्रामा निस्किन्छन् । भन्छिन्, ‘साइकल साथीजस्तै हो । यसले सधैं फ्रेस मुड दिन्छ ।’ 

 

प्रकाशित : कार्तिक २३, २०७४ ०८:३८
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

भारु पाँच सय र हजारमा प्रतिबन्ध - ‘राजनीति मात्रै सफल’

यज्ञ बञ्जाडे

काठमाडौं — एक वर्षअघि आजकै दिनदेखि भारतीय प्रधानमन्त्री नरेन्द्र मोदीले भारु पाँच सय र हजार दरका नोट चलनचल्तीमा प्रतिबन्ध लगाए । मोदीले ९ नोभेम्बर २०१६ (०७३ कात्तिक २४) राति १२ बजेदेखि लागू हुने गरी ती नोटमा प्रतिबन्ध लगाएका थिए ।



यो घटना भारतमा मात्र नभएर विश्व बजारका लागि पनि आश्चर्यजनक र अप्रत्याशित थियो । यो निर्णय पछिको १२ महिनाको अवधिमा भारतमा मिश्रित प्रतिक्रिया देखिएको छ । केहीले तत्कालका लागि नराम्रो भए पनि दीर्घकालमा भारतको आर्थिक विकासमा सकारात्मक प्रभाव पार्ने तर्क राख्दै आएका छन् । केहीले मोदीले सस्तो लोकप्रियताका लागि उक्त निर्णय गरेको र यसले भारतीय अर्थतन्त्र ध्वस्त बनाएको आरोप लगाएका छन् ।

स्वतन्त्र रूपमा विश्लेषण गर्दा पाँच सय र हजारका नोटमाथिको प्रतिबन्धले प्रधानमन्त्री मोदी राजनीतिक रूपले सफल भए पनि आर्थिक रूपमा असफल भएको देखिन्छ । मोदीले नोटबन्दको घोषणा गर्दा कालोधनलाई समाप्त पार्न, जाली नोट नियन्त्रण गर्ने र आंतकवादको आर्थिक स्रोत बन्द गर्न गरिएको यस्तो कडा कदम चाल्नुपरेको बताएका थिए । यो उनको घोषित उद्देश्य थियो । तर, यो उद्देश्य कुनै पनि कोणबाट पूरा भएको देखिँदैन । यसकारण घोषित उद्देश्यमा मोदी असफल भएको विश्लेषण गरिएको हो ।

नगद कारोबारलाई घटाउँदै जाने र ‘क्यासलेस बैंकिङ’ कारोबारलाई बढावा दिने नोटबन्दको अघोषित उद्देश्य रहेको जनाइएको छ । जबकी यो कुरा मोदीले सुरुमा घोषणा गरेका थिएनन् । नोटबन्दको घोषणालगत्तै जापान भ्रमणमा निष्किएका मोदीले त्यहाँबाट फर्केपछि ‘क्यासलेस र डिजिटल अर्थव्यवस्था’ को घोषणा गरेका थिए । उनको यो निर्णयले भारतीय अर्थव्यवस्थामा नोटमाथिको प्रतिबन्धभन्दा पनि ठूलो उथुलपुथल ल्याएको थिए । करिब ९५ प्रतिशतभन्दा बढी कारोबार नगदमा हुने भारतका लागि यो निर्णय त्यति सहज थिएन ।

यसकारण सुरुका केही समय मोदी निकै आलोचित पनि भए । यही निर्णयका कारण एक वर्षको अवधिमा भारतमा क्यासलेस कारोबार १३ देखि १७ प्रतिशतले वृद्धि भएका तथ्यांकहरू सार्वजनिक भएका छन् । यसका आधारमा मोदि सीमित रूपमा भए पनि सफल मानिएका छन् ।

नोटबन्दपछि कालोधन नियन्त्रण हुने भएकाले आर्थिक वृद्धिदरमा टेवा पुग्ने मोदीको तर्क थियो । आर्थिक वृद्धिको सवालमा भने मोदी असफल भएका छन् । चालू आर्थिक वर्षमा भारतमा ७ प्रतिशतको आर्थिक वृद्धिको लक्ष्य तय गरिएको थियो । नोटबन्दीकै कारणले लक्ष्यित आर्थिक वृद्धिदर प्राप्त गर्न नसकिने देखिएको छ । सरकारी आकलनअनुसार यो वर्ष आर्थिक वृद्धिदर ५.७ प्रतिशत रहने जनाए पनि वास्तविक रूपमा यो ५.२ प्रतिशतमा सीमित हुने अनुमान छ ।

नोटबन्दीले मोदी र समग्र भारतीय जनता पार्टीको राजनीतिक जीवनमा निकै सकारात्मक प्रभाव परेको देखिन्छ । यही कारण यो घटनापछि राजनीतिक रूपमा मोदी सफल भएको विश्लेषण गरिएको हो । कालोधन नियन्त्रणका लागि नोटबन्दीजस्तो कठोर कदम चालेको भनेर निकै प्रचार गरियो । बैद्धिक जमातका लागि यस्तो प्रचार पाच्य नभए पनि बहुसंख्यक सर्वसाधारणले यसलाई विश्वास गरेको देखिन्छ । यो उनको राजनीतिक सफलता हो ।

जबकि पाँच सय र हजार दरका नोटमा प्रतिबन्ध लगाएपछि भारतीय बजारमा रहेको करिब ८६ प्रतिशत नोट झिकिएको तथ्यांकहरू बाहिर आएका छन् । प्रणालीबाट एकैपटक धेरै नोट झिक्दा अर्थतन्त्रमा ठूलो झड्का लागेको र यसको प्रभावबाट मुक्त हुन धेरै समय लाग्ने विपक्षीहरूको आरोप छ ।(एजेन्सीहरूको सहयोगमा)

प्रकाशित : कार्तिक २३, २०७४ ०८:३८
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT