मलाई मन पर्छ  - रागिनी उपाध्याय कुलपति, नेपाल ललितकला प्रज्ञा प्रतिष्ठान

परिकार

सादा दाल, भात र तरकारी । यसपछि थाई सी फुड । लेमन ग्रास मिसिएको थाई सी फुडको स्वादको सधंै पारखी हुँ ।

पेय

प्राय: वाइन पिउँछु । शिराज ब्रान्डको ड्राई वाइन पहिलो रोजाइमा पर्छ । ड्राईचाहिँ किनभने यसमा सुगरको मात्रा कम हुन्छ ।

पुस्तक

बीपी कोइरालाको ‘तीन घुम्ती’ उपन्यास र ‘कर्णेलको घोडा’ कथा । ‘तीन घुम्ती’ नारी मनोविज्ञानको उत्कृष्ट सिर्जना हो । उत्ति बेलै ‘कर्णेलको घोडा’ मा बीपीले नारीको बोल्ड यौन मनोविज्ञान प्रस्तुत गरेको पाउँदा अचम्मित हुन्छु । यो एउटा मास्टरपिसको हो जस्तो लाग्छ ।

लेखक

बीपी कोइराला । विदेशी साहित्यकारमा चाहिँ सेक्सपियर । सेक्सपियरका कथाहरूको म फयान हुँ । भारतीय साहित्यकार अमृता प्रितम पनि खुब पढ्छु ।

गीत

नारायणगोपालको ‘गल्ती हजार हुन्छन्, यहाँ होस हराएको बेला, एक्लै तिमी नआऊ म मात्तिएको बेला...’ । यो गीत निकै अर्थपूर्ण लाग्छ मलाई । यसले बेहोसी मनोविज्ञानलाई गम्भीर ढंगले प्रस्तुत गरेको छ ।

गायक/गायिका

प्राय: भावुक र ट्राजेडी गीतहरू सुन्छु । यस मामिलामा नारायणगोपाल छुटाउनै मिलेन । हिन्दी गीतमा चाहिँ लता मंगेशकर । यी दुईका गीत सुन्दा ऊर्जा मिलेको अनुभूति हुन्छ ।

फिल्म

नेपालीमा यादव खरेलको ‘प्रेमपिण्ड’ सधंै सम्झिराख्छु । हिन्दीमा ‘मुगले आजम’ ले निकै छोयो । प्राय: क्लासिकल फिल्महरू मन पर्छ ।

अभिनेता/अभिनेत्री

सामाजिक हिसाबले अर्थपूर्ण फिल्म र अभिनयका लागि आमिर खान । अभिनेत्रीमा इलेयाना डी क्रुज बोल्ड छिन् ।

ग्याजेट

ओपो र आइफोन दुवै चलाइराखेकी छु । ओपो फिटो खिच्न ठीक छ । आइफोन पनि सजिलो लाग्छ ।

रंग

कोबाल्ट ब्लु । यो धेरै गाढा नीलो पनि हुन्न, धेरै चम्किलो पनि हुन्न । मेरो स्वभाव पनि यस्तै छ । चित्र कोर्दाचाहिँ टपिकमा पनि भर पर्छ ।

चित्रकार

नेपालीमा मनुजबाबु मिश्र । विदेशीमा चाहिँ स्पेनिस सरियालिस्टिक आर्टिस्ट साल्भाडोर डाली ।