मलाई मन पर्छ  - हेमन्त शर्मा, गायक

कान्तिपुर संवाददाता

काठमाडौँ — ठाउँ नारायणी नदीको पारिपट्टि त्रिवेणी भन्ने गाउँ छ । यो पहिले नवलपरासीमा जिल्लामा पथ्र्यो, अहिले नवलपुरमा पर्छ । मेरो बाल्यकालको अधिकांश समय त्यहीँ बित्यो । त्यहाँ एक किलोमिटर चौडा नदी छ, त्यसको किनारमै पहाड छ । मन्दिरैमन्दिरले भरिएको निर्दाेष गाउँ भएकोले त्यो ठाउँ मलाई मन पर्छ । 

Yamaha

परिकार
दाल भात तरकारी नै मन पर्छ । गोलभेडा र मूलाको थिचेको अचार मन पर्छ । अहिलेको जाडोमा पालुंगोको साग भयो भने मीठोमानेर खान्छु ।

पेय
कहिलेकहीँ सोसल ड्रिंक्स गर्दा ह्वीस्की र स्कच प्रिफर गर्छु ।

पुस्तक
म प्राय: पुस्तक पढिरहन्छु । गुरुप्रसाद मैनालीको ‘नासो’, जगदीश घिमिरेको ‘अन्तर्मनको यात्रा’ र अमर न्यौपानेको ‘सेतो धर्ती’ मलाई एकदमै मन परेका पुस्तक हुन् । यी पुस्तक यथार्थ र जनजीवनसँग नजिक छन् ।

लेखक
पुरानामा गुरुप्रसाद मैनाली र नयाँमा अमर न्यौपाने मन पर्छन् । उहाँहरूको लेखाइ सरल र सामान्य लाग्छ ।

गीत
राष्ट्रकवि माधवप्रसाद घिमिरेले लेख्नुभएको, नातिकाजीले संगीत भर्नुभएको र गायिका तारादेवीले गाउनुभएको ‘फूलको थुँगा बहेर गयो...’ मन पर्छ । नारायणगोपालको ‘यति धेरै माया दिई...’ र लोकगीत ‘नरोऊ मायालु...’ धेरै सुन्छु ।

गायक/गायिका
गायकमा नारायणगोपाल र गायिकामा लता मंगेशकरलाई धेरै सुन्ने गर्छु ।

फिल्म
बाल्यकालमा हेरेको भएर होला, ‘सम्झना’ फिल्म मन पर्‍यो । पर्दामा ठुल्ठूला देखिने अनौठा गतिविधि रोचक लागेका थिए ।

अभिनेता/अभिनेत्री
अमिताभ बच्चनको फयान हुँ । अभिनेत्रीमा तृप्ति नाटकर मन पर्छिन् ।

ग्याजेट
म आइफोन सेभेन चलाउँछु । मसित सामसुङको जे सेभेन पनि छ, तर यो त्यति कम्फर्टेबल लागेन ।

Esewa Pasal

प्रकाशित : पुस २६, २०७४ ०८:०६
ADVERTISEMENT
प्रतिक्रिया
पठाउनुहोस्

यौन दुर्व्यवहारको आरोपमा फिल्मकर्मी

कान्तिपुर संवाददाता

अस्ट्रेलिया — केही महिनाअघि मात्रै चर्चित कोरियाली निर्देशक किम किदुक एक अभिनेत्रीसितको यौन दुव्र्यवहार काण्डमा फसे । कान्स फिल्म फेस्टिभलमा एउटा र भेनिस फिल्म फेस्टिभलमा चार वटा अवार्ड जितिसकेका किमनलाई एउटा फिल्मको यौनजन्य दृश्यका लागि एक अभिनेत्रीलाई जबरजस्ती दबाब दिएको र हात हालेको आरोप लागेको थियो ।

‘स्प्रिङ, समर, फल, विन्टर...अगेन स्प्रिङ’, ‘थ्री आइरन’, ‘अरिराङ’, ‘पिइटा’, ‘समरितान गर्ल’ जस्ता चर्चित फिल्म दिएका उनको क्रेज अहिले दक्षिण कोरियामा स्वाट्टै घटेको छ ।

अब पालो चर्चित अस्ट्रेलियाली अभिनेता क्रेग म्याकल्याचलनको आएको छ । अस्ट्रेलियाको चर्चित मानिने गोल्ड लोगी अवार्ड विजेता ५२ वर्षे अभिनेतालाई सँगै काम गरेका तीन अभिनेत्रीले यौन दुव्र्यवहारको आरोप लगाएका छन् । यो आरोपले यति बेला मिडिया तताइरहेको छ । सन् २०१४ मा निर्माण भएको चर्चित ‘रकी हरर सो’ को प्रदर्शनका क्रममा आफूहरूलाई म्याकल्याचलनले यौन उत्पीडन र अनुचित कर्म गरेको आरोप अभिनेत्रीहरूको छ । ‘रकी हरर सो’ का कलाकारहरू क्रिस्टी विलन ब्राउन, इरिका हेयनटाज र एन्जेला स्कन्डीले म्याकमाथि त्यस्तो आरोप लगाएका हुन् ।

क्रेगले कडा प्रतिवाद गर्दै आरोप झूटो भएको दाबी गरेका छन् । उनले सबै आरोप बनावटी र आर्थिक फाइदाका लागि गरिएको ठोकुवा पनि गरेका छन् । भिक्टोरिया प्रहरीले यो उजुरीमाथि अनुसन्धान गरिरहेको छ ।

विश्वमा यौन उत्पीडन लगायतको आरोपमा ठूला फिल्मकर्मीहरू पर्दै आएका छन् । केही समयअघि चर्चित अमेरिकी फिल्म निर्माता हार्भी वाइन्सटाइनले समेत यस्तै आरोपको सामना गर्नुपरेको थियो । उनी चर्चित अमेरिकी प्रोडक्सन हाउस मिराम्याक्सका संस्थापकमध्ये एक हुन् ।

प्रकाशित : पुस २६, २०७४ ०८:०४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT