मलाई मन पर्छ - नवीन के भट्टराई, गायक

कान्तिपुर संवाददाता

काठमाडौँ — ठाउँ : पहिला–पहिला गीत लेख्न मन लाग्दा सौराहा घुम्न जान्थें । त्यहाँको रमणीय दृश्य अझै पनि मन पर्छ । चितवनको यो ठाउँले मेरो मन मजैले छोएको छ । 

परिकार
नेपाली परिकार नै टेस्टी र हेल्दी दुवै लाग्छ । दाल, भात, तरकारी, अचार अनि साग । नेपाली खानामा सबै पौष्टिक आहारको मिश्रण भएको पाउँछु ।

Yamaha


पेय पदार्थ
साथीभाइसँग भेटेका बेला चिया गफभन्दा बियर गफ गर्न रमाइलो लाग्छ । चिसो हुने हुँदा गर्मी मौसममा अझै खान मन पर्छ । बियर मन पर्ने पेय पदार्थ हो मेरा लागि ।

पुस्तक
हारोल्ड रोबिन्सको ‘कार्पेटब्यागर्स’ अहिलेसम्म मेरो मन छोएको पुस्तक हो । उनले लेखेका अरू कृति पनि पढेको छु । उनको लेखन शैलीबाट म अत्यन्त प्रभावित भएको छु ।

लेखक
अहिलेसम्म अमेरिकन लेखक सिड्नी सेल्डोन मन परिरहेका छन् । उनले छनोट गर्ने कथावस्तु युनिक र कलात्मक हुन्छन् ।

गीत
गीत धेरै सुन्छु । दुइटा गीत धेरै मन पर्छन् । अंग्रेजीमा पिङ फ्लोएड ब्यान्डको ‘टाइम...’ र नेपालीमा सुरेश कुमारको ‘यो जुनीमा...’ । यी गीत सुनेको सुन्यै गरिरहुँ लाग्छन् ।

गायक/गायिका
गायकमा जोन लेनोनको स्वर मीठो लाग्छ । गायिकामा चाहिँ सपनाश्री । सपनाश्रीका पुराना गीत म अझै पनि सुन्ने गर्छु ।

फिल्म
‘ब्लाइंक’ मुभीको स्टोरीले मन छोएको थियो ।

अभिनेता/अभिनेत्री
आर्टिस्टिक दृष्टिले मलाई बलिउड अभिनेता अमिताभ बच्चन राम्रा लाग्छन् । अभिनेत्रीमा चाहिँ कसैले पनि अहिलेसम्म मेरो मन छोएका छैनन् । भन्नै पर्दा केट विन्स्लेटको अभिनय मन पर्छ ।
ग्याजेट
कार्यक्रम नभएका बेला प्राय: युट्युब हेरेर फुर्सदिलो समय सदुपयोग गर्न मन पराउँछु । त्यसैले ल्यापटप धेरैजसो मसँगै हुन्छ । मोबाइलमा युट्युब हेर्दा चित्त बुझ्दैन ।

प्रकाशित : फाल्गुन १६, २०७४ ०८:०४
प्रतिक्रिया
पठाउनुहोस्
ADVERTISEMENT

शिल्पीमा “ययाति”

कान्तिपुर संवाददाता

काठमाडौँ — भोगविलास र लिप्साका उदाहरण दिनुपरे राजा ययातिको नाम लिने गरिन्छ । महाभारतको कथामा आधारित यी ययातिलाई भने यति बेला राजधानीको शिल्पी थिएटरमा भेट्न सकिन्छ ।

हिन्दु पौराणिक कथाका चरित्रलाई युवा रंगकर्मी टंक चौलागाईंले स्टेजमा उतारेका हुन् । भारतीय नाटककार गिरीश कर्नाडको कृतिमा आधारित यो नाटक नियमित मञ्चन भइरहेको छ ।

मानिस जतिसुकै विद्वान् भए पनि सुख–सयल र भोग–विलासका निम्ति कतिसम्म अघि बढ्न सक्छन् ? ययातिको चरित्र मार्फत नाटकले यसलाई दृश्यात्मक व्याख्या गरेको छ । आफ्नो यौनलिप्साका लागि छोराको यौवनसमेत लिन पछि नपरेको राजा ययातिको चरित्रमार्फत समाजमा व्याप्त अनेकौं विसंगतिमाथि नाटकले व्यंग्य गर्न खोजेको छ भने, ‘अति भए पनि कसैको पनि साथ मिल्दैन’ भन्ने पाठ नाटकमा देखाउन खोजिएको छ । सधैं जयजयकार गर्ने राजाको इच्छाबमोजिम यौवन दिन नाटकमा कुनै पनि प्रजा अगाडि सर्दैनन् र अन्तत: आफ्नै छोराको यौवन वरण गर्नुपर्ने अवस्था आइपर्छ ।

नाटकको कथा साधरण छ । ययातिका छोरा पुरुराज र चित्रलेखा विवाह भएको पन्ध्र दिनपछिआफ्नो राज्य फर्किंदै छन् । ययातिको सम्बन्ध आफ्नी सुसारे शर्मिष्ठासँग भएको थाहा पाएपछि ययाति पत्नी रानी देवयानी महल छाडेर जान्छिन् । विवाह उत्सवमा सहभागी हुन आएका देवयानीका बुबा यो कुराले रिसाएर ययातिलाई बुढयौलीको श्राप दिन्छन् । राजाहरूको यौनासक्तिका कथाहरू धेरै लेखिएका छन् । यसमा पनि यही विषय छ । राजा ययातिको यौनासक्तिले गर्दा आएको परिणाम वरिपरि घुमेको छ कथा ।

डेढ घण्टा लामो नाटकको मञ्चनमा नयाँ प्रयोग गर्ने कोसिस भएको छ । संगीत र प्रकाशको व्यवस्थापन राम्रा लाग्छन् । कलाकारहरूले जीवन्तअभिनय गर्ने कोसिस गरेका छन् । नाटकमा पात्रहरूको संवाद जीवनपरक लाग्छ । तर संवादले मात्रै कथा व्यक्त गर्न खोज्नु नाटकको कमजोरी हो ।

नाटकमा घिमिरे युवराज, प्रकेश सिन्धुलीय, पवित्रा खडा, अर्चना पन्थी, सरस्वती अधिकारी, आकांक्षा जीसीको अभिनय छ । नाटक चैत ३ सम्म मञ्चन हुनेछ ।

प्रकाशित : फाल्गुन १६, २०७४ ०८:०२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT