गाउँमा चित्रकार

कुनै समय पूर्वको यो नाका बीपी, मातृकादेखि गिरिजासम्मका पुख्र्यौली भूमि पनि हो । हरेक वर्ष हुने दुम्जाको जात्रामा स्थानीय तामाङ समुदायको उपस्थिति र सेलो गीत यो क्षेत्रको मौलिक चिनारी हो । यस्ता अनेक पक्षलाई प्रवद्र्धन गर्दै ग्रामीण पर्यटन विकास गर्ने ध्येयसाथ हालै सहरबाट चित्रकारहरूको एक समूहले दुम्जामा खुल्ला कला कार्यशाला गरेको छ । 

एक साता लामो दुम्जा कला यात्रा–२०७३ अन्तर्गत पाँच कलाकारले स्थलगत चित्र लेखन गरेका छन् । सुरेम देशारको संयोजकत्वमा अनिल महर्जन, जयराम महर्जन, सुरेन्द्रराज अधिकारी र राजेन्द्र देशारले यो कलायात्रामा भाग लिएका थिए । धरणीधर स्मृति पुस्तकालयको निम्तोमा दुम्जा पुगेका उनीहरूले कठिन भौगोलिक अवस्थाका बीच ग्रामीण/प्राकृतिक सौन्दर्य, भूकम्पपछिको जनजीवन, दैनिकीलगायत विषयमा १६ वटा चित्र तयार पारेका छन् । मूर्तिकार राजेन्द्र देशारले भने सरस्वतीको मूर्ति निर्माण गरे । दुम्जा–५ बालुवाटारस्थित देवीस्थानबाट सुरु भएको कलायात्रा रुपटार, घ्याम्पाटार, बसेरी, ओख्रेनी, दोभानडाँडा, काफ्लेचौर, ओध्रेकोट, हायुगाउँ, ज्यामिरे, सिमलचौर, दारिमबोट, उपल्लाथोक, माझथोक, पानीपोखरी हुँदै आँपघारीमा आइपुगेर सम्पन्न भएको संयोजक देशारले जनाए । 

कलायात्राका क्रममा कलाकारहरूले देवीस्थान माध्यमिक विद्यालय, जनजागृत प्रावि, पञ्चकन्या निमावि, कुशेश्वर विद्यापीठ माविमा पुगेर विद्यार्थीसँग कलाबारे अन्तरक्रियासमेत गर्न भ्याए । ‘गाउँगाउँमा चित्रकलाको प्रदर्शन गरी गाउँलेसँग छलफलसमेत गर्‍यौं,’ यात्राबाट फर्केपछि देशारले भने, ‘ग्रामीण पर्यटन प्रवद्र्धन गर्न कला गतिलो माध्यम बन्न सक्छ ।’ यात्रा क्रममा बनेका चित्रहरू यही माघ २४ गते जागरणकवि धरणीधर कोइराला जयन्तीका दिन दुम्जामा नै प्रदर्शन गरिने उनले जनाए ।