विमर्शमा ‘गुरिल्ला गर्ल’

कान्तिपुर संवाददाता

दमक — पाँच वर्षअघि प्रकाशित ‘छापामार युवतीको डायरी’ को अंग्रेजी अनुवाद ‘गुरिल्ला गर्ल’ पुस्तकमाथि विमर्श गरिएको छ ।

दमकमा शनिबार साहित्यिक व्यक्तित्वहरूले ‘छापामार युवतीको डायरी’ बेलायतबाट ‘गुरिल्ला गर्ल’ का रूपमा प्रकाशन हुनु नेपाली महिलाहरूका लागि उच्च सफलता भएको विश्लेषण गरे । कवि सीमा आभाषले गाउँकी छापामार युवतीको बलिदानबाट मुलुकमा आएको परिवर्तनले सहरकी अर्की महिलाको अधिकार सुरक्षित गरेको टिप्पणी गरिन् । विमर्शमा वक्ताहरूले सामाजिक रूपान्तरण राजनीति मात्रै नभई व्यक्तिगत योगदान पनि आवश्यक रहेको उल्लेख गरे । 

तत्कालीन सशस्त्र द्वन्द्वमा होमिएकी इलामको पञ्चकन्याकी तारा राईको आत्मकथा ‘छापामार युवतीको डायरी’ लाई जैयन्त शर्माको अनुवाद तथा नरेश काङबाङ र अबजशे काइँलाको संयुक्त सम्पादनमा बेलायतबाट ‘गुरिल्ला गर्ल’ शीर्षकमा प्रकाशित गरिएको हो ।

शब्द घर नेपालद्वारा आयोजित कार्यक्रममा २७ वर्षीया लेखक राईले छापामार हुँदै जेल जीवनको भोगाइ र त्यसपछिका सामाजिक कठिनाइहरू पुस्तकमा उल्लेख गरेको बताइन् । विमर्शमा पुस्तकका सम्पादनकर्ता काङबाङ र संगीतकार आभाष वक्ता थिए । 

१४ वर्षको उमेरमा २०६१ माघमा छापामार बनेकी राई तीन महिनापछि २०६२ वैशाखमा सेनाद्वारा गिरफ्तार भएकी थिइन् । इलाम, झापा र मोरङका विभिन्न कारागारमा गरी एक वर्ष जेल जीवन बिताएकी राई लोकतन्त्र स्थापनापछि रिहा भएकी थिइन् । तर घर फर्केपछि उनी सामाजिक तिरस्कारमा परिन् र त्यो भोगाइलाई डायरीमा उतार्न थालिन् । पछि त्यो पुस्तकाकारमा आयो । पत्रकार देवेन्द्र भट्टराई र साहित्यकार गणेश रसिकको सहयोगमा प्रकाशित ‘छापामार युवतीको डायरी’ को अहिलेसम्म चौधौं संस्करण प्रकाशन भइसकेको छ । 

प्रकाशित : चैत्र ७, २०७३ ०९:१८
प्रतिक्रिया
पठाउनुहोस्

सुरम्य संगीतमा गुरूदेव

कान्तिपुर संवाददाता

काठमाडौं — गायक तथा संगीतकर्मी गुरुदेव कामत शनिबार राजधानीमा प्रस्तुत भए । उनको प्रस्तुतिले शास्त्रीय संगीत अझै पनि लोकप्रिय रहेको पुष्टि गर्‍यो । राष्ट्रिय नाचघरमा ‘काहो बनाबो झुठी बतिया...’ बोलको ठुमरी गाइरहँदा श्रोताहरू बीच–बीचमा तालीले उनलाई साथ दिन्थे । गुरुकुल संगीत पाठशालाले गरेको उनको यो २०औं ‘सुरम्य सन्ध्या’ थियो ।

कार्यक्रममा शास्त्रीय संगीत, नेपाली, मैथिली, हिन्दी र उर्दू गीत/गजल प्रस्तुत गरिएको थियो । पहिलोपटक उनले नेपाल भाषा (नेवारी)मा ‘झिंझुया, झिंसुया...’ गीत गुनगुनाए । गीतकार जीवराज कुँवरद्वारा रचित नेपाली गीत ‘गुन्जियो मनमा कोइली बोली...’ गुरुदेवले फरक शैलीमा पस्केका थिए ।

गीतकार कालीप्रसाद रिजालको ‘मधुशाला पिउन गएको, प्यास लिएर फर्के...’ प्रस्तुत गरिरहँदा दर्शकदीर्घामा सन्नाटा छाएझैं देखिन्थ्यो । कार्यक्रममा विनीत ठाकुरको मिथिलावासीलाई उठ्न गरेको आग्रह गीत ‘उठुयौ मैथिल भेलैय भोर, चुनमुन चिरैया करय सोर...’ मा गायक खुबै जमेका देखिन्थे । कार्यक्रममा नेपाल–भारत बीपी कोइराला फाउन्डेसन र टोयटालगायतले सहकार्य गरेका थिए ।

प्रकाशित : चैत्र ७, २०७३ ०९:१८
पूरा पढ्नुहोस्
प्रतिक्रिया
पठाउनुहोस्