गुरुङ र नेपाली भाषाको मुक्तकसंग्रह ‘समैं दर्बानी’ सार्वजनिक

दीपक परियार, बिना थापा

काठमाडौं — मुक्तककार गौरी तमु (गुरुङ)द्वारा मातृभाषा गुरुङ र नेपाली भाषामा लिखित पहिलो मुक्तकसंग्रह ‘समैं दर्बानी’ (समयको दर्पण) शनिबार पोखरामा लोकार्पण गरिएको छ ।

संगीत नाट्य प्रज्ञा प्रतिष्ठानका कुलपति सरुभक्त, मुक्तककार तमुका बुबा टेकबहादुर र आमा छलीमाया गुरुङले पुस्तक लोकार्पण गरे । कृतिको लोकार्पण गर्दै संगीत नाट्य प्रज्ञा प्रतिष्ठानका कुलपति सरुभक्तले बहुभाषिक र बहुसांस्कृतिक मुलुकमा साहित्यमार्फत गौरी तमुको प्रयासले ऐतिहासिक महत्त्व राख्ने बताए । उनले भने, ‘तुलनात्मक रुपमा नेपाली साहित्यमा गुरुङहरुको उपस्थिति न्युन भएको समयमा गौरीको कृति इतिहासबद्ध हुने छ ।’
नेपाल मुक्तक प्रतिष्ठानका महासचिव एवं साहित्यकार रमेश पौडेलले गौरीले छोटो समयमै साहित्यकारको पहिचान बनाउन सफल भएको धारणा राखे । कृतिमाथि टिप्पणी गर्दै मुक्तक मञ्च पोखराका सल्लाहकार रुपिन्द्र प्रभावीले गौरीले मुक्तकमा गरेको प्रयोग अनुकरणीय भएको बताए । ‘जीवनवादी र समाजवादी यथार्थमा आधारित मुक्तक लेखेर आफ्नो विशेष पहिचान जमाउन गौरीले सफलता प्राप्त गर्नेछिन्,’ उनले भने । ‘समैं दर्बानी’ले नेपालको पछिल्लो एक दशकको दर्पण उतारेको उनले चर्चा गरे ।
लेखिका गुरुङले अबको लेखन परम्पराभन्दा भिन्न ढङ्गले अघि बढ्नुपर्ने विचारले कृति निकालेको बताइन् । ‘भाषा, साहित्य, कला नै हाम्रो पहिचान हो,’ उनले भनिन्, ‘आफ्नो मातृभाषाका केही शब्दमात्रै भए पनि नयाँ पुस्ताका लागि समर्पण गर्न पाउँदा गौरवबोध भएको छ ।’ संग्रहमा १ सय ३५ नेपाली मुक्तकको गुरुङ भाषामा भावानुवाद भने केहरसिंह गुरुङले गरेका छन् ।
नवलपरासीमा जन्मेर साहित्य र सञ्चार क्षेत्रमा काम गरिसकेकी तमु अहिले पोखरामा शिक्षणसँगै साहित्यिक क्षेत्रमा क्रियाशील छिन् । गुरुङ साहित्यिक मञ्च नेपालकी अध्यक्ष उनी तमु नारी साहित्य परिषद् र गजल सन्ध्यासँग पनि आबद्ध छिन् ।
मुक्तक मञ्च पोखराको आयोजनामा भएको कार्यक्रममा तमुधिं नेपालकी अध्यक्ष कर्म गुरुङ, चितवन साहित्य परिषद्का अध्यक्ष सुरेन्द्र अस्तफल, गौरीका बुबा टेकबहादुर गुरुङ, मञ्चकी अध्यक्ष सरला लामिछाने ‘सरु’ लगायतले मुक्तकमा गरिएको नौलो प्रयोगको प्रशंसा गरे ।

प्रकाशित : भाद्र २५, २०७४ ११:२१
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

हन्ट्स म्यान

खेल खेलौं
कान्तिपुर ंसंवाददाता

यो खेल खेल्दा एकपटकमा ४ देखि ८ वटा टिम सहभागी हुन सक्छन् । प्रत्येक टिममा ५ जना खेलाडी हुनुपर्छ । सहभागी खेलाडीको उमेर १२ वर्षभन्दा माथि हुनु राम्रो मानिन्छ । यो खेलका लागि ५ खण्डमा विभाजित १ सय मिटर लामो मैदान आवश्यक हुन्छ ।

हरेक खण्डमा एउटा हातले टिप्न सकिने कुनै वस्तु राख्नुपर्छ । यो खेललाई पनि चरणबद्ध रुपमा पूरा गर्न सकिन्छ । हरेक चरणका विजेताहरूको चरणबद्ध रूपमा छनोट गरी अन्तमा फाइनल खेलमार्फत विजेता छनोट गर्न सकिन्छ । यो खेलका लागि निर्धारित दूरी भएको मैदान, कुनै एउटा हातले टिप्न सकिने वस्तु, १ जना रेफ्री र एउटा सिटी आवश्यक हुन्छ ।

खेल्ने तरिका 
यो खेलमा सहभागी खेलाडीहरूमध्येबाट १ जना टिम लिडर चुनिनुपर्छ । हरेक टिम लिडरका पछाडि अन्य खेलाडीहरू पंक्तिबद्ध भई (चित्रमा देखाएजस्तै) उभिनुपर्छ । त्यसपछि रेफ्रीले सिटी फुकेर खेल सुरु भएको संकेत दिएपछि सबैभन्दा पहिले टिम लिडरले मैदानमा प्रवेश गरेर मैदानमा रहेको हातले टिप्न सकिने वस्तु टिपेर ल्याउनुपर्छ । यसरी ल्याएको वस्तुलाई टिममा रहेका अरु खेलाडीहरूले पुन: ५ भागमा विभाजित मैदानको कुनै अर्को भागमा लगेर राखिदिनु पर्छ । जसलाई अर्को टिमका खेलाडीले खोज्न सक्नुपर्छ । यो क्रम टिम लिडरका पछाडि रहेका सबै खेलाडीले पूरा गरेपछि खेल समाप्त हुन्छ । जुन टिमले सबैभन्दा कम समयमा यो प्रक्रिया पूरा गर्न सक्छ त्यही टिम विजेता हुन्छ ।

 

 

प्रकाशित : भाद्र २५, २०७४ ११:२१
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT