देश विकासबारे मिलन

कान्तिपुर संवाददाता

काठमाडौं — आर्किटेक्ट तथा ग्रामीण विकासविज्ञ मिलन बगालेको दोस्रो पुस्तक बजारमा आएको छ । ‘देशदृष्टि’ राजधानीमा डा. मोहनमूर्ति पन्त, आख्यानकार अमर न्यौपाने र बगालेले सार्वजनिक गरे ।

बसोबास पद्धति, निर्माण संस्कृति, सम्पदा संरक्षण र ग्रामीण विकासका विविध आयाम समेटिएका लेखहरू संगृहीत पुस्तकले वास्तुकलाका विविध आयाम र इतिहासलाई गहिरोसँग केलाएको टिप्पणी गरे । ‘अरनिकोदेखि रनसुर बिष्ट, जोगलाल स्थापित जस्ता वास्तुशिल्पीका सिर्जनाबारे पनि गहन चिन्तन गरिएको छ,’ उनले भने, ‘मिलनले भवन निर्माण क्षेत्रजस्तो नीरस विषयलाई भाषिक शिल्पका माध्यमले पठनीय बनाएका छन् ।’ 

आख्यानकार न्यौपानेले नेपाल आधुनिक हुने होडमा दौडिए पनि सुव्यवस्थित र योजनाबद्ध ढंगले विकास गर्ने बाटोतिर हिँड्न नसकेको उल्लेख गर्दै थपे, ‘यो किताबले सम्पदा तथा वास्तुकला संरक्षणका लागि सबैलाई प्रेरणा दिएको छ ।’ उक्त पुस्तक सांग्रिला बुक्सले निकालेको हो । 

 

प्रकाशित : भाद्र २६, २०७४ ०९:१६
प्रतिक्रिया
पठाउनुहोस्

‘माई लभ’ मंसिरमा

कान्तिपुर संवाददाता

काठमाडौं — जापानी निर्देशक तोसिआकी इतोह निर्देशित ‘माई लभ : प्रमिस फर काठमान्डु’ मंसिरमा देशभर रिलिज हुने भएको छ । आइतबार राजधानीमा पत्रकार सम्मेलन गरी रिलिज डेट सार्वजनिक गरिएको हो ।

फिल्मको सोमबार भने राष्ट्रिय सभागृहमा विशेष सो गरिँदै छ । सोका लागि जापानी कलाकार टोली यतिबेला काठमाडौं आइपुगेको छ । 

तोसिआकीको यो तेस्रो नेपाली फिल्म हो । ‘शिरीषको फूल’ को निर्देशक तोसिआकीले पहिलोपटक सन् २००७ मा नेपाली सम्पदा संरक्षणको सन्देशसहित फिल्म ‘कठपुतली’ बनाएका थिए । नयाँ फिल्म ‘माई लभ’ उनले ‘कठपुतली’ कै सिक्वेलका रूपमा बनाएका हुन् ।

सम्पदा संरक्षणको अभियानमा लाग्दालाग्दै थकित बनेको रमेश जापान पलायन भएपछिको यात्रा यो फिल्ममा छ । २०७२ को विनाशकारी भूकम्पमा परेर हराएकी आफ्नी प्रेमिकाको खोजी गर्न नेपाल फर्केका तिनै पात्रले गर्ने संघर्ष र उतारचढाव फिल्ममा देखाइएको तोसिआकीले बताए । दुवै देशमा छायांकन गरिएको फिल्ममा नेपालको मछिन्द्रनाथको जात्रासित जापानको सुवामा प्रचलित जात्रासितको सांस्कृतिक समानता पनि प्रस्तुत गर्न खोजिएको उनले बताए । ‘माई लभ’ को मुख्य कलाकारको रूपमा उनले ‘शिरीषको फूल’ र ‘कठपुतली’कै नायक गणेश लामालाई लिएका छन् । 

फिल्म क्रियसन नेपालको ब्यानरमा निर्माण गरिएको ‘माई लभ’मा जापानबाट युइची हायदा, रिवोन मिजुतानी, सुइतारो माजाता, काजोतोसी थासाका, थामिया मोतो र नेपालबाट गणेशसँगै, शीतल श्रेष्ठ, चैत्यदेवी सिंह, मञ्जु श्रेष्ठ, चाँदनी लामा, शान्ति वाइबा, राजु भुजू, बबी लिम्बू लगायतले अभिनय गरेका छन् । गौरीशंकर धुजूको छायांकन, दिनेश सुनामको संगीत, जापानी चलचित्रकर्मी थाक मिया मोतोको भीएफएक्स रहेको छ ।

‘तेस्रोपटक पनि उहाँको फिल्ममा जोडिन पाउँदा खुसी छु,’ अभिनेता लामाले भने, ‘यो फिल्मले भूकम्पको पीडा, सम्पदा संरक्षणको सन्देशसँगै प्रेमकथाको भिन्न पाटोलाई बोकेको छ ।’ उनले यो फिल्म नेपाली दर्शकको लागि नयाँ स्वादको हुने दाबी गरे । जापानी र नेपाली कलाकार दुवैलाई लिएर झन्डै दुई दशकअघि निर्माण गरिएको ‘मितेरी गाउँ’को समेत नायक लामाले यसपटक ‘माई लभ’मा पनि दुवै देशका कलाकारको काम देख्न पाउने बताए । 

भूकम्पका बेला कसरी सुरक्षित हुने, पुनर्निर्माणमा कसरी योगदान गर्ने भन्ने सामाजिक पाटो पनि फिल्ममा रहेको तोसिआकीले दाबी गरे । काठमाडौं महानगरपालिका वातावरण व्यवस्थापन विभाग 
र फिल्म क्रियसन नेपालले सोमबार फिल्मको विशेष सो गर्न लागेको हो । 

प्रकाशित : भाद्र २६, २०७४ ०९:१६
पूरा पढ्नुहोस्
प्रतिक्रिया
पठाउनुहोस्