चीजकुमारको संस्मरण

कान्तिपुर संवाददाता

काठमाडौं — समाजसेवी चीजकुमार श्रेष्ठको संस्मरण पाठकमाझ आएको छ । बन्दीपुरको विकासमा उल्लेख्य योगदान दिएका श्रेष्ठको ‘घुमीफिरी बन्दीपुर’ राजधानीमा साहित्यकार खगेन्द्र संग्रौला, कवि द्वारिका श्रेष्ठ, डा. मदन पियालगायतले सार्वजनिक गरे ।

‘उहाँले बन्दीपुरको विकासमा जसरी सहयोग गर्नुभएको छ, त्यो अतुलनीय छ,’ चीजकुमार श्रेष्ठका विद्यार्थीसमेत रहेका डा. पियाले भने, ‘यो पुस्तक उहाँले रुचिकर शैलीमा लेख्नुभएको रहेछ । पढेर म विगतमा फर्किएँ ।’

बन्दीपुरकै भानु माविमा लामो समय प्रधानाध्यापकसमेत रहेका चीजकुमार श्रेष्ठले बन्दीपुर विकास कोषको अध्यक्षता पनि गरेका थिए । कार्यक्रममा संग्रौलाले त्यो सन्दर्भ कोट्टयाउँदै बन्दीपुर र श्रेष्ठको पुस्तकको प्रशंसा गरे । कुनै समय बन्दीपुरमै शिक्षकका रूपमा कार्यरत रहेका संग्रौलाले भने, ‘चीजकुमार आफ्ना सबै पत्र, जीवनका रंगसहित आउनुभएको छ । उहाँले आफूबारेभन्दा आफूले बाँचेको परिवेशबारे इमानदारीपूर्वक उल्लेख गरेर यो पुस्तकलाई उत्कृष्ट बनाउनुभएको छ । बन्दीपुरको विकासमा लामो समय योगदान गरेका व्यक्तिको यो पुस्तकले संस्मरण कस्तो हुनुपर्छ भन्ने सन्देश पनि दिन्छ ।’

कवि द्वारिका श्रेष्ठले पनि चीजकुमारको पुस्तक पढ्नैपर्ने भएको टिप्पणी गरे । ‘संघर्ष गरेर एउटा मानिसले केसम्म गर्न सक्छ भन्ने यसमा लेखिएको छ,’ श्रेष्ठले भने, ‘यो पुस्तक अति मीठो भाषामा लेखिएको छ । कुनै समय वैरागलाग्दो भएको बन्दीपुरको पुनर्जागरणमा चीजकुमारले ठूलो योगदान दिनुभएको छ । त्यसका लागि उहाँले गरेका इमानदार प्रयासको फेहरिस्त यो पुस्तकमा पाउन सकिन्छ ।’

चीजकुमारले पहिले पुस्तक लेख्ने सोच नभए पनि लेखिसक्दा आफू हल्का भएको बताए ।

उक्त पुस्तक फिनिक्स बुक्सले बजारमा ल्याएको हो ।

प्रकाशित : भाद्र २७, २०७४ ०९:०३
ADVERTISEMENT
प्रतिक्रिया
पठाउनुहोस्
ADVERTISEMENT

काव्य मुशायरामा असीम र राम

कान्तिपुर संवाददाता

काठमाडौं — काव्य मुशायराको आठौं शृंखलामा कवि असीम सागर र गजलकार राम अविरल विष्ट प्रस्तुत भए । १७ वर्ष भारतमा बिताएका दिनहरूको सम्झना गर्दै असीमले ‘चक्र’ कविता सुनाए ।

त्यसपछि उनले ‘सडकको आवाज’ वाचन गरे । गत वर्ष जोगमाया चापागाईं गजल पुरस्कारबाट सम्मानित असीमका कविता सशक्त रहेको गजलकार ज्ञानुवाकर पौडेलले दाबी गरे । मुटुको समस्याको कारण घरमै रेस्ट गरिरहेका पौडेल असीमका कविता सुन्नकै लागि परिवारको कुरा नमानीकन मुशायरामा आएका थिए बताए ।

शृंखलाको पहिलो चरणमा रामले ‘बाटो काट्यौ, बाटोले आँगन काट्यो’, पैतालामुनि छौँ, उद्धार गर्नु’, ‘यो दुनियाँमाथि उसैको हावी रह्यो’ र ‘मीठो बोली मनमा आएर बस्छ’ जस्ता गजल सुनाएका थिए । 

रोमान्टिक शैलीमा लेखिएका गजलमा पनि सामाजिक सचेतनाको भाव झल्किएको थियो । 

असीमले ‘वर्गचित्र’, ‘संवाद खोला र किनारको ’, ‘कात्रो’, ‘पानी’ र ‘पसिनाको जुलुस’ गरी आधा दर्जन कविता सुनाए । त्यस्तै रामले ‘मर्ने कि बाँच्ने विवाद आउँछ’, ‘सपनाको सुनौलो सहर बनाएर’, ‘अँध्यारो हुन्छ बेलुकी लगिदिनुहोस्’, ‘बुढेसकाललाई अक्सिजन दिएर जानुस्’, ‘हेपिनै पर्ने सानो सधैं’, ‘बिर्सन्छु म आफ्नै हुलिया बिर्सन्छु’, ‘चुलोमा आगो बल्न सक्दैनन्’ गजल सुनाए ।

पछिल्लो समय कविता र गजल लेखनमा भइरहेको विकास देखाउने कोसिस काव्य मुशायराले गरेको संयोजक यात्री प्रकाश पाण्डेले बताए ।

 

प्रकाशित : भाद्र २७, २०७४ ०९:०३
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT