साताको साहित्य पुरस्कार सिन्धुलियलाई

कान्तिपुर संवाददाता

अष्ट्रेलिया — अष्ट्रेलियाबाट नेपाली साहित्य सृजनामा लागिपरेका साहित्यकारलाई दिंदै आएको साताको साहित्य पुरस्कार यसबर्ष कवि प्रोल्लास सिन्धुलियलाई प्रदान गरिने भएको छ ।

अष्ट्रेलियाको सिड्नीबाट प्रकाशित हुँदै आएको साताको साहित्य नामक संस्थाले यो पुरस्कार दिदै आएको छ । साताको साहित्य डटकममा एकबर्षसम्म छापिएका उत्कृष्ट रचनालाई यो पुरस्कार वितरण गर्ने गरिएको छ । संस्थाका सम्पादक निष्प्रभ सजीले एक बिज्ञप्ति जारी गर्दै २० हजार रुपैया र ताम्रपत्र सहितको यो पुरस्कार उनलाई प्रदान गरिने जनाएका हुन् ।

नेपाली साहित्यलाई योगदान पुरयाइरहेका साहित्यकारहरुलाई प्रोत्साहन दिन र नेपाली साहित्यको जर्गेनामा टेवा पुरयाउने उद्देश्यले ६ बर्षअघि पुरस्कारको स्थापना गरिएको सजीले बताए । एक बर्षसम्म छापिएका रचनाहरुबाट नविन प्यासीको ‘झुसिलकिरा’, सुशील सुब्बाको ‘आमा’ र सिन्धुलियको ‘एउटा प्रश्नपत्र’ उत्कृष्ट तीन रचनाका रुपमा छानिएका थिए । संजीव पाण्डे, सुजीत सिग्देल, महेन्द्र पौडेल र सजी समेत ४ जनाको निर्णायक मण्डलले उनको रचनालाई उत्कृष्ठ ठह्रयाएको हो ।

उक्त पुरस्कार यसअघि रविन्द्र समीर, रमेश सायन, मुकुन्द प्रयास, नवराज पराजुली र बोनम प्रतापलाई प्रदान गरिसकिएको छ ।

प्रकाशित : कार्तिक २७, २०७४ १०:१०
प्रतिक्रिया
पठाउनुहोस्
ADVERTISEMENT

कुपोषण घटाएकोमा नेपाल पुरस्कृत

सुरेशराज न्यौपाने

काठमाडौं — महिला र बालबालिकाको कुपोषण हटाउन प्रभावकारी कदम चालेबापत नेपाल संयुक्त राष्ट्रसंघको ‘यूएन सन ग्लोबल च्याम्पियन अवार्ड २०१७’ बाट पुरस्कृत भएको छ । कुपोषण न्यूनीकरणका लागि संयुक्त राष्ट्रसंघका सहायक महासचिवको नेतृत्वमा विश्वव्यापी पोषण अभिवृद्धि अभियान (स्केलिङ अप न्यूट्रिसन मुभमेन्ट–सन) सञ्चालनमा छ ।

अभियानका ६० सदस्य मुलुकमध्ये नेपाललगायत ८ मुलुकलाई पुरस्कृत गरिएको हो ।

२४ कात्तिकमा आइभरी कोस्टमा आयोजित एक कार्यक्रममा राष्ट्रिय योजना आयोगका सदस्य गीताभक्त जोशीले उक्त पुरस्कार थापेका थिए । ‘नेपालले पछिल्लो दशकयता कुपोषण न्यूनीकरणलगायत जनस्वास्थ्यका क्षेत्रमा लिएको अग्रसरता र पहलको कदर ठानेको छु,’ जोशीले भने ‘यो उपलब्धिबाट अन्तर्राष्ट्रिय मञ्चमा नेपालले यस्ता सामाजिक कार्यक्रम प्रभावकारी ढंगले सञ्चालन गर्न सक्छ भन्ने सन्देश पनि प्रवाहित भएको छ ।’ कुपोषण न्यूनीकरणका लागि योजना आयोगको समन्वयमा २८ जिल्लामा २०१३ देखि चारवर्षे पहिलो बहुक्षेत्रीय पोषण योजना लागू गरिएको थियो । जसअन्तर्गत सुनौला हजार दिन, पोषणका लागि हातेमालो कार्यक्रम, सुआहारा (एकीकृत पोषण कार्यक्रम), सबल परियोजना, फिड द फ्युचर : किसान, कृषि तथा खाद्य सुरक्षा परियोजनालगायत कार्यक्रम सञ्चालन गरिएका थिए ।

यस अवधिमा पुडकोपनको समस्यामा केही सुधार भए पनि अझै पनि कुपोषणको समस्या चिन्ताजनक अवस्थामा छ । सरकारी तथ्यांकले अझै पनि कुपोषणका कारण हरेक वर्ष २५ हजार बालबालिकाको मृत्यु हुने देखाएको छ । यीलगायत अन्य जनस्वास्थ्यका समस्यालाई सम्बोधन गर्न भन्दै सरकारले आगामी पुसदेखि दोस्रो बहुक्षेत्रीय पोषण योजना लागू गर्न तयारी थालिसकेको छ । योजनाको अनुमानित बजेट ४२ अर्ब २८ करोड रुपैयाँ रहेको छ । त्यसलाई राष्ट्रिय योजना आयोग र स्वास्थ्य, कृषि विकास तथा पशुपन्छी, खानेपानी तथा सरसफाइ, महिला, बालबालिका तथा समाज कल्याण, शिक्षा, संघीय मामिला तथा स्थानीय विकास मन्त्रालयमा भाग लगाइएको छ ।

योजनालाई युरोपेली संघ, युनिसेफ, यूएसएडलगायत दातृ निकायको सहयोग गर्ने प्रतिबद्धता जनाएका छन् । दोस्रो चरणको योजनाको आवश्यकता औंल्याउँदै आयोगका उपाध्यक्ष डा. स्वर्णिम वाग्लेले भने, ‘कुपोषण निर्मूल नपारेसम्म बालबालिकाको मृत्युदर घटाउन सम्भव छैन । त्यसबाहेक दिगो विकास अभियानअन्तर्गतको नेपालले राखेको पोषणको लक्ष्य हासिल गर्न पनि हालको पुडकोपनको घट्ने दरमा उल्लेख्य सुधार ल्याउनुपर्ने खाँचो छ । र, त्यो प्रभावकारी पोषण योजनबाट मात्र सम्भव छ ।’

प्रकाशित : कार्तिक २७, २०७४ १०:१०
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT