चेतना संरक्षणद्वारा पाँच विधामा पुरस्कार घोषणा

देवनारायण साह

मोरङ — विराटनगरस्थित चेतना संरक्षण प्रतिष्ठान नेपालले पुरस्कारको घोषणा गरेको छ । साहित्य, पत्रकारिता, समाजसेवा, धर्मसंस्कृति र ललितकला विधामा महत्वपूर्ण योगदान पुर्‍याउनेलाई पुरस्कृत गर्दै आएको प्रतिष्ठानले यस वर्ष पुरस्कृत हुने व्यक्तिहरुको नाम सार्वजनिक गरेको हो । 

समाजसेवी हरिभक्त सिटौलाद्वारा आफ्ना आमाबुवाको सम्झनामा स्थापित धर्मानन्द रामप्यारी सिटौला साहित्य चेतना पुरस्कार वरिष्ठ समालोचक लक्ष्मण गौतमलाई प्रदान गरिने भएको छ । यस्तै, ‘बालकिसन /नर्वदादेवी मुन्धडा सनातन मानवीय धर्म–संस्कृति चेतना पुरस्कार’धर्मसंस्कृतिको क्षेत्रमा योगदान पुर्‍याएका मणिराज जोशीलाई प्रदान गर्ने भएको प्रतिष्ठानले जनाएको छ । उक्त पुरस्कार समाजसेवी देवकिशन मुन्धडा र देवेनरा परिवारले स्थापना गरेको हो ।

Yamaha


समाजसेवी दीनबन्धु गोयल र उषादेवी गोयलले आफ्ना दाजुको सम्झनामा स्थापना गरेको ‘ओमप्रकाश गोयल समाजसेवा चेतना पुरस्कार’समाजसेवी एवं एबीसी नेपालका अध्यक्ष दुर्गा घिमिरेलाई, वरिष्ठ टेलिभिजन पत्रकार दुर्गानाथ शर्मालाई ‘नरेश सुवेदी साहित्यिक पत्रकारिता पुरस्कार’ प्रदान गर्ने निर्णय भएको प्रतिष्ठानका अध्यक्ष गंगा सुवेदीले बताइन् । साहित्यकार गंगा सुवेदीले आफ्ना आमाबुवाको सम्झनामा स्थापना गरेको ‘भूपेन्द्र–शोभा रिजाल ललितकला चेतना पुरस्कार’वरिष्ठ कलाकार यादवचन्द्र भुर्तेललाई प्रदान गरिने भएको छ । पुरस्कार प्रतिष्ठानको वार्षिकोत्सवका अवसरमा माघमा समारोह गरी प्रदान गरिने अध्यक्ष सुवेदीले बताइन् ।

पाँचवटै विधाका पुरस्कारको राशि ५१/५१ हजार रुपैयाँको छ ।

२०६१ सालमा स्थापना भएको प्रतिष्ठानले मासिक रुपमा साहित्यिक कार्यक्रम, त्रैमासिक रुपमा ‘चेतना सन्देश’ साहित्यिक पत्रिका प्रकाशन र स्थानीय टेलिभिजनको सहकार्यमा साप्ताहिक कार्यक्रम ‘चेतना प्रवाह’५ वर्षदेखि सञ्चालन गर्दै आएको छ भने पाँच विधामा पुरस्कारसमेत प्रदान गर्दै आएको हो ।

Esewa Pasal

प्रकाशित : पुस १६, २०७४ १३:५३
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

तत्काल प्रतिनिधिसभा समानुपातिकतर्फको नतिजा सार्वजनिक गर्न आयोगलाई आग्रह

घनश्याम गौतम

गुल्मी — एमाले केन्द्रीय सचिव प्रदीप ज्ञवालीले राष्ट्रियसभा निर्वाचन नभएसम्म ३३ प्रतिशत महिला सहभागिताको बाहनाबाजी गरेर निर्वाचन सकिएको एक महिना पुग्दा समेत निर्वाचन आयोगले परिणाम सार्वजनिक नगर्नु चिन्ताको विषय भएको बताएका छन् । 

प्रेस चौतारी गुल्मीले आइतबार तम्घासमा गरेको पत्रकार भेटघाट कार्यक्रममा नेता ज्ञवालीले सरकार, प्रधानमन्त्री, केही कानुनविद् र केही विश्लेषकले दिएको सल्लाह नेपालको लोकतन्त्रका लागि बिडम्बनापूर्ण भएको बताए । उनले निर्वाचन आयोगलाई तत्काल प्रतिनिधिसभा समानुपातिकतर्फको परिणाम सार्वजनिक गर्न आग्रह गरे । ‘हामी चिन्तित छौं, अन्योलमा पनि परेका छौं,’ नवनिर्वाचित सांसद ज्ञवालीले भने, ‘निर्वाचन आयोग किन अलमलिएको छ, आयोगलाई के कुराले प्रभावित गरिरहेको छ ।’ निर्वाचन आयोगलाई आयोग जस्तै बन्न उनले सुझाव दिए । ‘उ स्वतन्त्र र संवैधानिक अंग हो,’ उनले थपे, ‘उसको स्वतन्त्रता, स्वायत्तता र स्वतन्त्र निर्णय क्षमतामाथि कतैबाट प्रश्न उठने अवस्था आउनु हुँदैन । तर पछिल्ला दिनमा आयोग आफैंले गरेका निर्णयबाट पछि हट्ने गरेकाले शंका र भ्रम बढेको छ ।'
सरकारले अहिले गरिरहेको अनेक बहानाबाजी ताजा जनादेश माथिको अपमान र संविधानको अपव्याख्या भएको उनको भनाइ छ । ‘अहिले राष्ट्रियसभा निर्वाचन नभइ प्रतिनिधिसभाको रिजल्ट निकाल्न मिल्दैन र प्रतिनिधिसभा रिजल्ट नआई नयाँ सरकार गठन हुन सक्दैन भनेर जे बाहनाबाजी गरिंदैछ, यो ताजा जनादेशविपरीत हो,’ उनले भने, ‘संविधानको अपव्याख्यामार्फत अन्योलता बढाउने काममा सरकार, प्रधानमन्त्री, केही सल्लाहकार र विश्लेषक लाग्नु बिडम्बनापूर्ण छ ।’

सत्ता लम्ब्याई रहन र यो बीचको संक्रमणकालको फाइदा उठाउँदै आफ्ना निहीत स्वार्थ पूरा गर्ने खालका अलोकतान्त्रिक काममा नलाग्न उनले सरकारलाई आग्रह पनि गरे ।

५० लाख जनताले मतदानबाट अनुमोदन गरिसकेकाले अब पार्टी एकता हुने नहुने भन्ने कुरा दुई पार्टीका अध्यक्ष र दुई पार्टीको विषय मात्र नभएको उनले जिकिर गरे । ‘प्रकृया अघि बढिसकेको छ,’, उनले भने, ‘केही काम भइसकेका छन, बाँकी टुङ्गिदैछन्, कसैले शंका नगरे हुन्छ, पार्टी एकता हुन्छ ।’ सरकार गठनअघि पार्टी एकताको पुरै खाका सार्वजनिक हुने उनले बताए ।

प्रकाशित : पुस १६, २०७४ १३:३८
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT