धनकुटा प्रतिभा पुरस्कार

पुरस्कार
कान्तिपुर संवाददाता

धनकुटा — साहित्य, गायन, खेलकुद र पत्रकारिता क्षेत्रमा संलग्न चार जनालाई धनकुटा प्रतिभा पुरस्कार कोषले सम्मान गरेको छ ।

वरिष्ठ कवि एवं संस्कृतिविद् तुलसी दिवस, लोकगायक तुलसी पराजुली, पत्रकार सञ्जय सन्तोषी राई र तेक्वान्दोमा अन्तर्राष्ट्रिय स्वर्णपदक विजेता सुनीता तामाङलाई ‘धनकुटा प्रतिभा पुरस्कार’ बाट सम्मान गरिएको हो । हालै आयोजित समारोहमा चारै जनालाई जनही १५ हजार रुपैयाँ र सम्मान पत्र हस्तान्तरण गरियो ।

२०६४ मा स्थापित कोषले प्रत्येक वर्ष विभिन्न क्षेत्रमा योगदान पुर्‍याएका जिल्लाका व्यक्तित्वलाई सम्मान गर्दै आएको छ । समारोहमा उच्च न्यायाधीशहरू श्रीमणकुमार गौतम र तेजनारायणसिं राई, प्रदेशसभा सदस्य निरन राई, प्रजिअ प्रेमप्रकाश उप्रेती, एसएसपी गणेश ठाडा मगर, धनकुटा सेवा समाज गोर्खा सैनिक बेलायत च्याप्टर अध्यक्ष पूर्णकुमार लिम्बू लगायत सहभागी कार्यक्रममा मुकुन्द प्रयास, केजी सुब्बा, रोशन परियार, रोजा नानु लगायतले कविता वाचन पनि गरे।

Citizen

प्रकाशित : चैत्र २६, २०७४ ०८:१८
ADVERTISEMENT
प्रतिक्रिया
पठाउनुहोस्

सिरिया द्वन्द्व: रासायनिक आक्रमणमा ७० को मृत्यु

बीबीसी/रोयटर्स

दमास्कस — सिरियाको पूर्वी गुटामा आइतबार गरिएको शंकास्पद रासायनिक हतियार आक्रमणमा कम्तीमा ७० जनाको मृत्यु भएको उद्धारकर्ताहरूले बताएका छन् ।

सिरियाको डोमा सहरमा आइतबार भएको रासायनिक आक्रमणमा घाइतेको उपचार गरिँदै । तस्बिर – एजेन्सी

पछिल्लो दुई साता केही शान्त रहेको विद्रोही नियन्त्रित पूर्वी गुटामा आइतबार रुसको सहयोगमा सरकारी सेनाले आक्रमण गरेको अधिकारकर्मीहरूले जनाएका छन् । यद्यपि, सिरिया तथा उसको प्रमुख सहयोगी रुसले रासायनिक हतियार आक्रमणको आरोप ‘मनगढन्ते’ भएको जनाएका छन् ।

उद्धार संस्था ‘हवाइट हेल्मेट्स’ ले ट्वीटरमार्फत सार्वजनिक गरेका तस्बिरहरूमा मृतकहरूको खात देखिन्छ । ‘हवाइट हेल्मेट्स’ ले मृत्यु हुनेमध्ये अधिकांश महिला तथा बालबालिका रहेको बताएको छ । मृतकहरूको संख्या बढ्न सक्ने जनाइएको छ ।

विभिन्न मेडिकल रिपोर्ट, निगरानी समूह र उद्धारकर्मीहरूले विभिन्न विवरण सार्वजनिक गर्दै रासायनिक हतियारको प्रयोग भएको दाबी गरेका हुन् । ‘हवाइट हेल्मेट्स’का प्रमुख रइद अल–सलेहले भने, ‘७० जना मानिसको श्वासप्रश्वासको समस्याले मृत्यु भइसकेको छ र हजारौंमा उक्त समस्या देखिएको छ ।’ उनले टवीटमार्फत १५० जनाको मुत्यु भएको दाबी गरेपछि उक्त ट्वीट हटाएको बीबीसीले जनाएको छ ।

विद्रोही समर्थित एक सञ्चार संस्थाले ट्वीट गर्दै आक्रमणमा परी कम्तीमा ७५ जनाको मृत्यु भएको जनाएको छ । गुटा मिडिया सेन्टरले आक्रमणका कारण कम्तीमा एक हजार जना प्रभावित भएको जनाएको छ । उसले हेलिकप्टरबाट ‘सरिन’ नामक विषालु ग्याससहितको बम प्रहार गरिएको दाबी गरेको छ । सिरियाली अस्पतालमा काम गर्ने सहयोगी संस्था ‘द युनियन अफ मेडिकल रिलिफ अर्गनाइजेसन’ ले दमास्कसस्थित एक अस्पताललाई उद्धृत गर्दै ७० जनाको मृत्यु भएको यकिन गरेको छ । उक्त संस्थाका प्रवक्ताले अस्पातल स्रोतलाई उद्धृत गर्दै उपचार भइरहेकाहरूमा मुखबाट पिँmज निकाल्ने समस्या देखिएको दाबी गरेको छ । उसले सरिन र क्लोरिन ग्यासले आक्रमण गरेको दाबी गरेको छ ।

यसअघि सन् २०१३ मा सिरियाको पूर्वी गुटामा गरिएको सरिन ग्यास आक्रमणमा सयौं मानिसहरूको ज्यान गएको थियो । संयुक्त राष्ट्रसंघीय नियोगले सरिन ग्यास आक्रमण भएको यकिन गरे पनि आक्रमण कसले गरेको हो भन्नेबारे केही उल्लेख गरेको थिएन ।

सन् २०१७ को विद्रोही नियन्त्रित खान शेइखौन सहरमा गरिएको आक्रमणमा अप्रिलमा भएको त्यस्तै आक्रमणमा ८० जना मारिएका थिए ।

राष्ट्रसंघ र रासायनिक हतियार प्रयोग विरोध संगठन (ओपीसीडब्लू) ले गरेको संयुक्त छानबिनमा उक्त आक्रमणका लागि सिरिया सरकारलाई जिम्मेवार ठहर्‍याएको थियो । त्यसैगरी सन् २०१८ को सुरुमा अधिकारवादी, स्वाथ्यकर्मी र अमेरिकाले सिरियाली फौजले क्लोरिन ग्यास आक्रमण गरेको दाबी गरेका थिए । तर सिरिया सरकारले बारम्बार आफूले कुनै पनि रासायनिक आक्रमण नगरेको दाबी गर्दै आएको छ ।

पछिल्लो आक्रमणपछि बेलायतको विदेशमन्त्रलायले अन्तर्राष्ट्रिय समुदायको जवाफ आवश्यक भएको जनाएको छ । अमेरिकी राष्ट्रपति डोनाल्ड ट्रम्पले गतवर्ष खान शेइखौनमा भएको आक्रमणपछि क्रुस क्षेत्रप्यास्त्र प्रहार गर्न आदेश दिएका थिए । गतमहिना ट्रम्पले सिरियामा अर्को क्षेप्यास्त्र आक्रमणबारे वरिष्ठ अमेरिकी अधिकारीसँग छलफल गरेको वासिङटन पोस्टले जनाएको थियो । त्यसको एक दिनपछि अमेरिकी रक्षामन्त्री जेम्स म्याटिसले सिरियाले रासायनिक आक्रमण गर्नु ‘मूर्खतापूर्ण कदम’ भएको बताएका थिए । फ्रान्सका राष्ट्रपति इम्यानुएल म्याक्रोंले पनि सर्वसाधारणमाथि रासायनिक आक्रमण नगर्न चेतावनी दिएका थिए ।

विद्रोहीको नियन्त्रणमा रहेको पूर्वी क्षेत्र गुटामा गत फेब्रुअरी १८ देखि रुसी सेनाको सहयोगमा सरकारी सेनाले आक्रमण सुरु गरेको हो आक्रमणका कारण १ हजार ६ सय भन्दा बढीको मृत्यु भइसकेको छ भने लाखौं विस्थापित भएका छन् । मृत्यु हुनेमध्ये एक चौथाइ बालबालिका रहेको निगरानी समूहलाई उद्धृत गर्दै अन्तर्राष्ट्रिय सञ्चार माध्यमले जनाएका छन् ।

राष्ट्रसंघले पूर्वी गुटामा करिब ४ लाख सर्वसाधारण आधारभूत आवश्यकताको पर्खाइमा रहेको जनाएको छ तर आक्रमण जारी रहेकाले उक्त स्थानमा कुनै पनि सहायता संस्था पुग्न नसकेको अन्तर्राष्ट्रिय सञ्चार माध्यमले जनाएका छन् ।

ट्रम्पले दिए चेतावनी
अमेरिकी राष्ट्रपति डोनाल्ड ट्रम्पले सिरियाको पूर्वी क्षेत्र गुटास्थित डोमा सहरमा सिरियाली सरकारी फौजले गरेको आक्रमणको भत्र्सना गरेका छन् । ट्रम्पले सिरियाली राष्ट्रपति बसर अल–असद उनका सहयोगी राष्ट्र रूस र इरानलाई चेतावनी दिँदै ‘ठूलो मूल्य चुकाउनुपर्ने’ बताएका छन् ।

सामाजिक सञ्जाल टीटरमा ट्रम्पले सिरियाली राष्ट्रपति असलाई ‘जनावर’ को संज्ञा दिएका छन् । उनले आक्रमणका लागि रुसी राष्ट्रपति भ्लादिमिर पुटिन र असद जिम्मेवार भएको बताए ।

सिरियाको सरकारी सेनाले करिब डेढ महिना यता पूर्वी सहर गुटामा गर्दै आएको आक्रमणमा रुसले सहयोग गर्दै आएको छ । रुस र सिरियाले रासायनिक आक्रमण गरेको अस्वीकार गरेका छन् ।

प्रकाशित : चैत्र २६, २०७४ ०८:१७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT