नेपाली गजलकारहरुको गजल मुसायरा

पहिलोपटक दक्षिण अष्ट्रेलियामा एकजुट बनेका नेपाली गजलकारहरुको ‘गजल मुसायरा’ मा गजलकार जीतेन्द्र मल्लले माथिको गजल सुनाउँदा सहभागीहरु मन्त्रमुग्ध बनेका थिए ।

देशप्रेम, मानवीय भाव, सम्बन्धका उतारचढाव लगायतका विभिन्न शीर्षकहरुमा १ दर्जनबढी साहित्यकारहरुको गजलले सबैलाई भावुक बनाएको थियो ।

नेपाली भाषा र साहित्यलाई जर्गेना गर्ने उद्देश्यका साथ आयोजित कार्यक्रममा सिड्नी मेलबर्न लगायतका साहित्यकारहरुले सहभागिता जनाएका थिए ।

सिड्नीका गजलकार मल्लले मानवीय संवेदनासहितको गजल वाचन गरी नसक्दै सफल देवकोटाको अर्काे गजलले वाहवाही बटुलेको थियो ।

‘ऊ जिउँदो हो की अवशान छानविन हुनुपर्छ,

ढुंगा हो कि भगवान छानविन हुनुपर्छ ।’

अर्का गजलकार प्रेम पाण्डेको प्रेमिल गजलले साँझको वातावरणलाई रमाइलो बनाइदिएको थियो ।

‘पत्र लेख्न नजान्नेलाई खामको के मूल्य

सुनसान रात रोज्नेलाई घामको के मूल्य’

अन्तर्राष्ट्रिय नेपाली कलाकार समाज इनासको आयोजना सम्पन्न उक्त कार्यक्रममा १ दर्जन बढी गजलकारहरुले गजल वाचन गरेका थिए । रामकृष्ण निरौला, आरसी थापा, रोहित अधिकारी र लक्ष्मण गुरुङले गजल गायन प्रस्तुत गरेका थिए भने विष्णु तामाङ र पुजा गुरुङको नृत्यले दर्शकलाई थप मनोरञ्जन दिएको थियो ।

आयोजक संस्थाका अध्यक्ष मीलन दहालले कार्यक्रमको मुख्य उद्देश्य यहाँ रहेका दोस्रो पुस्तालाई नेपाली भाषा र साहित्यप्रति अभिरुची जगाउने रहेको बताए ।

अष्ट्रेलियामा नेपाली साहित्य र गजललाई प्रवद्र्धन गर्नका लागि स्थानीय साहित्यकारहरुको पहलमा ४ वर्षअघिदेखि गजल मुसायरा सुरु गरिएको हो ।

यो साहित्यिक कार्यक्रम अहिलेसम्म सिड्नी, ब्रिसबन र एडिलेड लगायतका शहरहरुमा सम्पन्न भइसकेको छ भने अन्य शहरहरुमा समेत आयोजना हुँदैछ ।