रहेनन् कवि हमाल

कान्तिपुर संवाददाता

काठमाडौँ — वरिष्ठ कवि एवं गीतकार हेम हमालको ७७ वर्षको उमेरमा हृदयाघातबाट निधन भएको छ । बिहीबार राति पौने एक बजे मध्यबानेश्वरस्थित घरबाट केएसी अस्पताल लाँदै गर्दा उनको निधन भएको छिमेकी एवं राष्ट्रिय सूचना आयोगका आयुक्त किरण पोखरेलले जनाए ।

१६ वर्ष अघि किड्नी प्रत्यारोपण गरेका हमाल पछिल्लो समय घरमै आराम गरिरहेका थिए ।

सन् १९४१ मा काठमाडौं बानेश्वरमा जन्मिएका हमाल बीसको दशकदेखि नै साहित्यमा सक्रिय थिए । पोखरेलका अनुसार पञ्चायतको समयमा उनी व्यवस्थाविरोधी साहित्यिक गतिविधिमा समेत सामेल थिए । ‘२०४६ को जनआन्दोलनमा पनि उहाँ निकै सक्रिय हुनुहुन्थ्यो,’ आयुक्त पोखरेलले भने । हमालका ‘पहरामा बास बसी झरनाको पानी पिउँला....’ लगायत आधा दर्जन गीत बच्चु कैलाशले गाएका छन् ।

हिन्दी भाषामा समेत विभिन्न रचना अनुदित हमालको पहिलो कृति ‘यो सहर छाड्नुभन्दा पहिले’ (२०२९) हो । यसबाहेक उनका ‘गाउँ गाउँजस्तो छैन सहर सहरजस्तो छैन’ (कविता संग्रह २०३९) सँगै ‘मार्केटिङ फयामिली प्लानिङ इन नेपाल’, ‘पपुलेसन एजुकेसन फर नेपाल’ लगायत अन्य विधाका पुस्तक पनि प्रकाशित छन् ।

Yamaha

रत्नश्री स्वर्ण पदक, शुभ राज्यभिषेक पदकलगायतका सम्मान तथा पुरस्कारहरू पाएका उनले संयुक्त राष्ट्रसंघअन्तर्गत लामो समय युगान्डामा समेत बिताए । हमालका श्रीमती, एक छोरा र तीन छोरी छन् । शुक्रबार हमालको पशुपति आर्यघाटमा दाहसंस्कार गरियो ।

प्रकाशित : श्रावण २७, २०७५ ०८:२२
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

सिक्किमबाट सोनम

दीपक परियार

लेखनाथ — कलाकार डेनी डेन्जोङपादेखि निर्देशक उगेन छोपेलसम्म । संगीतकार रञ्जित गजमेर होऊन् या छायांकार विनोद प्रधान । अभिनेता उत्तम प्रधान र अभिनेत्री निरुता सिंहको जोडी । यी सबै नेपालीभाषी सिक्किमेली कुनैसमय नेपाली फिल्म उद्योगमा छाए ।

कहीँ कतै फिल्मका कलाकार साेनम बरफुड‍्पा र शिवानी गिरी ।

आफ्नो समयमा नेपाली फिल्म र गीतसंगीतमा गतिलो छाप छोडेर सबैको मनमस्तिष्कमा बसे । फेरि एक युवा आफ्नो भाग्य परिक्षण गर्न सिक्किमबाट नेपाल आएका छन् ।

गान्तोकका सोनम बरफुङपाले नेपाली फिल्म ‘कहीँ कतै’ बाट डेब्यु गरेका छन् । फिल्म शुक्रबारदेखि रिलिज भयो । उत्तम प्रधानपछि नेपाली फिल्म खेल्ने अभिनेता उनी भएका छन् । संयोग के छ भने, प्रधानको डेब्यु फिल्म ‘दर्पणछाया’ मा दिलीप रायमाझी को–एक्टर थिए । सोनमको डेब्यु फिल्ममा पनि रायमाझी नै छन् । प्रधानको पहिलो फिल्म सुपरहिट भयो । सोनमको के हुने हो, परिणाम आउन बाँकी नै छ ।

सोनम फिल्म खेल्नुअघि मोडलिङमा रमाइरहेका थिए । सन् २०१३ मा ‘मेगा मिस्टर नर्थ इस्ट’ मा फस्र्ट रनरअप र बेस्ट पर्सनालिटीको टाइटल जिते । ‘मिस्टर भाइब्स सिक्किम’ मा पनि सहभागी भए । उनले ‘साइनो’, ‘दर्पणछाया’ बारे सुनेका थिए । ‘लुट’ देखि नेपाली फिल्म पनि हेर्न थाले । पछिल्लो क्रममा अनमोल केसी, प्रदीप खडकाका फिल्महरू फलो गर्न सुरु गरे । एक दिन सिक्किमकै चेली उमा गिरी (बेबी) ले फेसबुकमा सोनमलाई म्यासेज गरिन्, जसमा फिल्मको अफर थियो ।

‘कहीँ कतै’ हालै पहिलोपल्ट सिक्किममा स्क्रिनिङ भयो । ‘मान्छे आउँछन् कि आउँदैनन् भन्ने खुब डर थियो,’ पोखरामा हालै सोनमले भने, ‘तर साथ मिल्यो ।’ फिल्म छायांकनका क्रममा उनलाई अप्ठेरो नपरेको होइन । सिक्किम र नेपालमा बोलिने लवजले उनलाई अप्ठ्यारो पार्‍यो । तर दिलीप रायमाझी, किशोर खतिवडा लगायतले उनलाई भरपूर सहयोग गरे ।

‘अभिनय गर्न काठमाडौं आउँदा उनले चिनेका मान्छे धेरै थिएनन् । अभिनयको अभ्यास गर्दै सिक्ने क्रममा छन् । ‘अभिनय गर्दा मलाई आनन्द लाग्छ,’ उनले भने, ‘आफूलाई जे उचित लाग्छ त्यही गर्नुपर्छ ।’ उत्तम प्रधानपछि सिक्किमलाई प्रतिनिधित्व गर्ने अर्को अभिनेता नभएकोले पनि नेपाली दर्शकलाई आफूलाई मन पराउनेमा उनी ढुक्क छन् । पहिलो फिल्म रिलिज हुने दिनमै उनले निर्देशक साजन श्रेष्ठको नयाँ फिल्ममा अनुबन्ध गर्दै छन् । निर्माता उमा बेबी सोनमको चकलेटी लुक्स दर्शकले मन पराउनेमा ढुक्क छिन् । फिल्ममा उनकी छोरी शिवानी गिरीले पनि डेब्यु गरेकी छन् । फिल्म विशुद्ध पारिवारिक प्रेमकथामा आधारित रहेको उनले बताइन् ।

प्रकाशित : श्रावण २७, २०७५ ०८:२१
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT