पुस्तकमा सहकारी अनुभव

कान्तिपुर संवाददाता

काठमाडौँ — लामो समय सहकारी आन्दोलनमा समर्पित पूर्वमन्त्री केशव बडालले विभिन्न देशको सहकारी आन्दोलन, उपलब्धि र समृद्धिका कथाहरू समेटेर नयाँ पुस्तक ‘दिगो विकास लक्ष्यका लागि सहकारी : अन्तर्राष्ट्रिय अनुभव’ ल्याएका छन् ।

पूर्व उद्योगमन्त्री बडालले पुस्तकमा अस्ट्रेलिया, क्यानडा, जापान, चीन, मलेसिया, फिलिपिन्स, भारत, क्युबा, अमेरिका, जर्मनी गरी देशको अनुभवलाई समेटेका छन् ।

उच्च स्तरीय भूमिसुधार आयोगका अध्यक्षसमेत रहिसकेका बडालले हाल सहकारी महासंघ नेपालका राष्ट्रिय अध्यक्षसमेत हुन् । उनले यसअघि ‘सहकारी सिद्धान्त र प्रयोग’, ‘भूमि र कृषिको अर्थराजनीति’, ‘भियतनाम, भूमिसुधार र औद्योगिक विकास’, ‘चीनको अर्थराजनीति र सहकारी’, ‘नेपालमा कृषि क्रान्ति भूमिसुधार र औद्योगिक विकास’, ‘समृद्ध अर्थतन्त्रका लागि सहकारी’ जस्ता खोजमूलक पुस्तकहरू निकालिसकेका छन् । पछिल्लो पुस्तक उनले विभिन्न मुलुक अध्ययन भ्रमणका क्रममा देखेका सहकारी सन्दर्भ समेटेका छन् ।

Yamaha

‘पुस्तकले विश्वव्यापी सहकारी आन्दोलन अहिले कसरी, कता र कुन दिशातिर निर्देशित भइरहेको छ भन्ने ज्ञान दिन्छ,’ पुस्तकबारे अर्थविद् पीताम्वर शर्मा भन्छन् । काभ्रे तेमाल–१ सस्र्युंखर्कमा जन्मेका बडालले ‘मुलुकको समृद्धिका लागि सहकारी मोडल उपयुक्त हुने’ दाबी गर्दै पुस्तकमार्फत विभिन्न देशको अनुभवलाई मुलुकको समृद्धिसित जोड्न चाहेको’ बताए ।

प्रकाशित : भाद्र २१, २०७५ ०८:३१
ADVERTISEMENT
प्रतिक्रिया
पठाउनुहोस्
ADVERTISEMENT

इडलिबबारे छलफल गर्न इरानमा शिखर बैठक

बैठकले विद्रोही लडाकुको भविष्यका बारेमा महत्त्वपूर्ण निर्णय लिने
एएफपी

तेहरान — रूसी सेनाको सहयोगमा सिरियाले विद्रोहीनियन्त्रित इडलिबमा आक्रमण गर्ने अन्तिम तयारी गरिरहेका बेला शुक्रबार इरानमा तीन मुलुकको शिखर बैठक बस्ने भएको छ ।

इरान, रूस र टर्कीका राष्ट्रपतिहरूको बैठक तेहरानमा बस्न लागेको हो । बैठकले विद्रोही लडाकुको भविष्यका बारेमा महत्त्वपूर्ण निर्णय लिने अपेक्षा गरिएको छ ।

सिरियाली विद्रोहीको मुख्य अखडा मानिएको इडलिबमा आक्रमण भए सात वर्षयताकै ठूलो मानवीय विपत्ति निम्तिने चेतावनी दिइएको छ ।

दमास्कस र मस्कोले इडलिबमा रहेका विद्रोहीलाई परास्त गर्ने बताइसकेका छन् । तेहरान बैठकले इडलिबमाथिको आक्रमणको समय निर्धारण गर्नेछ । ‘हामीलाई थाहा छ, सिरियाली सैनिक यो समस्या सुल्झाउन तयारी अवस्थामा छन्,’ रूसी राष्ट्रपति भ्लादिमिर पुटिनका प्रवक्ता दिमित्री पेस्कोभले भने ।

सरकारी फौजबाट सन् २०१५ मा कब्जा गरिएको इडलिब र त्यस वरपरका इलाका मात्र विद्रोहीको नियन्त्रणमा छन् । विद्रोहीको नियन्त्रणमा रहेको यो नै अन्तिम क्षेत्र हो । टर्कीले विद्रोही समूहलाई विगतमा मद्दत गर्दै आएको थियो । इडलिबसँग सीमा जोडिएको टर्कीले यहाँ १२ वटा सैनिक जाँच चौकी स्थापना गरेको छ ।

सिरिया सरकारले इडलिबमा सैनिक क्षमतालाई एकीकृत र सुदृढ गरिरहेको भए पनि हालैका सातामा कुटनीतिक पहल व्यापक बनाइएको छ । तेहरान बैठकमा सिरियाली सैनिक परिचालनका बारेमा प्रस्तुतीकरण पनि हुने बताइएको छ ।

संयुक्त राष्ट्रसंघ र दातृ समूहले इडलिबमा पूर्णक्षमताको आक्रमण भए यो सिरियाको इतिहासमै सबैभन्दा ठूलो मानवीय विपत्ति हुने बताएका छन् । सिरिया युद्धका सात वर्षमा हालसम्म साढे ३ लाखभन्दा बढीको ज्यान गइसकेको छ ।

रूसी विदेशमन्त्री सर्गेई लाभरोभले इडलिबमा रहेका सशस्त्र समूहले अझै पनि सिरियाली सरकारी कार्यालय र रूसी हवाई अखडामा आक्रमण गरिरहेको जानकारी दिँदै त्यस्तो समूहलाई जरैदेखि उखेल्नुबाहेक अर्को विकल्प नरहेको बताए ।

‘इडलिबमा नरसंहार हुन सक्छ’
टर्कीका राष्ट्रपति रेसेप तायिप इर्दोगानले इडलिब प्रान्तमा जथाभावी बम र क्षेप्यास्त्र प्रहार गरिए त्यहाँ नरसंहार हुने चेतावनी दिएका छन् । ‘त्यस्तो नहोस् भनेर भगवान्सँग मेरो प्रार्थना छ । बमबारी भएमा त्यहाँ नरसंहार अवश्य हुन्छ,’ इर्दोगानले किर्गिजस्तानको भ्रमणका क्रममा पत्रकारसँग भने ।

टर्कीका विदेशमन्त्री मेभ्लुट काभुसोग्लुले अझै पनि सम्झौताको सम्भावना रहेको बताए । ‘शिखर बैठकअघि हामी निरन्तर सम्पर्कको प्रयासमा छौं र राम्रो नतिजा निस्कियोस् भन्नेमा सचेत छौं ।’ रूसले मंगलबारदेखि नै २२ दिनको विश्रामपछि पहिलो पटक इडलिबमा आक्रमण सुरु गरेको छ ।

प्रकाशित : भाद्र २१, २०७५ ०८:२९
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT