भिन्न आँखामा महेश्वर

कान्तिपुर संवाददाता

काठमाडौँ — उमेरको खास चासो छैन उनलाई । नौ दशक पुग्नै लाग्दा पनि जोस उस्तै छ । ८८ वर्षीय साहित्यकार एवं विश्लेषक महेश्वर शर्मा हप्तैपिच्छे पत्रपत्रिकामा लागि नियमित स्तम्भ लेख्छन्, बर्सेनि पुस्तक निकाल्छन् ।

तीन दर्जन कृति प्रकाशित भइसकेका छन् भने केही उपन्यास, कथा, निबन्ध, लेख र कविता संग्रह प्रकाशनको पर्खाइमा । उनै महेश्वरको व्यक्तित्व र कृतित्वमाथि विश्लेषणात्मक एवं संस्मरणात्मक कृति तयार भएको छ । राजधानीको महाराजगन्जस्थित चुनदेवी गणेशबस्तीमा आख्यानकार धु्रवचन्द्र गौतम र साहित्यकार रोचक घिमिरेले ‘भिन्न भिन्न आँखामा महेश्वर शर्मा’ पुस्तक सार्वजनिक गरे ।

समारोहमा कलमले आफूलाई निष्क्रिय हुन नदिएको महेश्वरलेबताए । ‘लेख्नबाहेक अन्य केही गर्न आउँदैन,’ उनले भने, ‘तास खेल्न आउँदैन, रक्सी खान जानेको छैन । यही लेख्न आउँछ, लेखिरहन्छु ।’ उनी विभिन्न पत्रपत्रिकाकालाई स्तम्भ पनि लेख्छन् । कहिलेकाहीँ स्तम्भ रोक्न सम्पादकलाई आग्रह गर्छन् । पाठक प्रतिक्रियाले उर्जा दिइहाल्छ । भन्छन्, ‘यस्तो मायाले लेखिरहन उर्जा मिल्छ ।’

कृति सार्वजनिक गरिसकेपछि धुव्रचन्द्रले महेश्वरलाई ‘अथक साधक’ को उपमा दिए । ‘उमेर ढल्कँदै गएपछि कतिपय स्रष्टालाई अरूले लेख भनेर झक्झकाउनुपर्छ,’ उनले भने, ‘उहाँलाई कसैले भनिरहनै पर्दैन ।’ महेश्वरको लेखनमा युवा उर्जा रहेको उनले थपे । वृद्ध उमेरमा साधनारत र सिर्जनात्मक जीवन बाँचिरहने स्रष्टा कमै रहेको रोचक घिमिरेले बताए ।

कृतिमा महेश्वरबारे ३६ स्रष्टाको संस्मरणसँगै उनका कृतित्व र व्यक्तित्वको विश्लेषणात्मक लेख समावेश रहेको रमेश शुभेच्छुकले जनाए । महेश्वर लामो समय नेपाल सरकारको निजामती सेवा र केही समय चिकित्सा सेवा र राजनीतिमा समेत लागेका थिए । रमेशले भने, ‘नेपालको प्रशासकीय र राजनीतिक समस्याका विश्लेषणसँगै उनका लेखमा कलात्मक पाटो पनि निकै मिठासयुक्त हुन्छन् ।’ पूर्व सांसद एवं महेश्वरका साथी सुबसेन ओलीले महेश्वर सच्चा देशभक्त रहेको दाबी गरे । महेश्वर लोभ, लालच, मोह र भावनामा बगेर लेख्न लेखक नभएको समेत उनले बताए ।

कार्यक्रममा राजनीतिज्ञ नरहरि आचार्यले पञ्चायती व्यवस्थामा पत्रकारिता गर्दा महेश्वरले साथ दिएको क्षण सम्झिए । त्यति बेला उनीहरू पत्रिका निकाल्थे । पत्रिकामा छापिएका खबरहरू हेर्दा पत्रिकै प्रतिबन्धित होला भन्ने डर पनि उनीहरूलाई लाग्थ्यो । ‘उहाँ त्यस बेला जिल्ला प्रशासन कार्यालयको प्रमुख जिल्ला अधिकारी हुनुहुन्थ्यो । सरकारको कर्मचारी भएर पनि अप्रत्यक्ष रूपमा हाम्रो पत्रिकाको संरक्षक उहाँ नै हुनुहुन्थ्यो,’ नरहरिले महेश्वरतर्फ हेर्दै भने, ‘त्यति बेलै मैले उहाँको जीवनबाट गम्भीर ज्ञान पाएको थिएँ ।’ महेश्वरका ‘पञ्चायती राजकाज’, ‘रन्थमोल’, ‘कालखण्ड’, ‘उन्माद’ लगायत कृतिहरू चर्चित छन् । ‘भिन्न भिन्न आँखामा महेश्वर शर्मा’ कृति गण्डकी साहित्य परिषद् स्याङ्जाले छापेको हो ।

प्रकाशित : माघ १३, २०७५ ०९:१३
ADVERTISEMENT
ADVERTISEMENT
प्रतिक्रिया
पठाउनुहोस्

अमेरिकी संघीय सरकार खुल्यो 

एजेन्सी

वासिङ्टन — अमेरिकी इतिहासकै सबभन्दा लामो सरकारी खर्चबन्दी अन्त्य गर्न राष्ट्रपति डोनाल्ड ट्रम्प सहमत भएका छन् । डेमोक्रयाट नेताहरूसँगको छलफलपछि हाउस अफ रेप्रिजेन्टेटिभ्स र सिनेटले सरकारी निकायलाई ३ सातासम्म कोष उपलब्ध गराउने कानुन एकमतले पारित गरेका थिए ।

अमेरिकी संघीय निकायलाई खर्च उपलब्ध गराउन विधेयकमा हस्ताक्षर गरेपछि कलम दिँदै सभामुख नान्सी पेलोसी । तस्बिर : रोयटर्स

त्यसलगत्तै राष्ट्रपति ट्रम्पले उक्त विधेयकमा हस्ताक्षर गरेका हुन् । अमेरिकी सञ्चारमाध्यमका अनुसार दुई दलबीच सीमा सुरक्षाबारे भने वार्ताजारी रहनेछ ।

पाँच साता लामो खर्चबन्दी अन्त्य गर्दै ट्रम्पले संघीय निकायका लागि खर्च उपलब्ध गराउन तयार भएका हुन् । तर उनले माग्दै आएको मेक्सिकोको सीमा क्षेत्रमा पर्खाल निर्माणका लागि बजेट भने पाएनन् ।

यसअघि राष्ट्रपति ट्रम्पले तल्लो सदन ‘हाउस अफ रेप्रिजेन्टेटिभ्स’ पर्खाल निर्माणका लागि ५ अर्ब ७ करोड डलर बजेट नदिएसम्म सरकारी खर्चबन्दी अन्त्य नगर्ने चेतावनी दिएका थिए । तर डेमोक्रयाटहरूले उक्त प्रस्ताव अस्वीकार गर्दै आएका छन् ।

बजेट अभावमा ८ लाख संघीय कर्मचारी ३५ दिनसम्म तलबविहीन भएका थिए भने कतिपयलाई बेतलबी घरबिदामा पठाइएको थियो । बजेट अभावमा संघीय जाँच ब्युरो, एयर ट्राफिक कन्ट्रोलर, होमल्यान्ड सेक्युरिटी, यातायात, कृषि, गृह, न्याय, संग्रहालय, वन तथा राष्ट्रिय निकुञ्ज लगायतका निकाय बढी प्रभावित भएका थिए । अत्यावश्यक बजेटमा पनि राजनीति गरिएको भन्दै संघीय कार्यालयमा कार्यरत कर्मचारीले विरोधसमेत सुरु गरेका थिए । समाचार संस्था रोयटर्सका अनुसार राष्ट्रपति ट्रम्प संघीय सरकार बन्दीका कारण जारी तनाव सुनेपछि खर्च पारित गर्न सहमत भएका हुन् ।

कानुन पारित भएलगत्तै ट्वीटरमार्फत राष्ट्रपति ट्रम्पले ‘आफू पर्खाल बनाउने अडानबाट नहटेको तर तत्कालका लागि संघीय सरकार बन्दका कारण प्रभावित दसौं लाख मानिसका लागि उक्त निर्णय गरेको’ बताए ।

अमेरिकी राष्ट्रपति कार्यालय ह्वाइटहाउसमा बोल्दै ट्रम्पले ‘सम्झौताको घोषणा गर्न पाउँदा आफूलाई गर्व लागेको’ बताए । तर उनले अमेरिका र मेक्सिको सीमाक्षेत्रमा भरपर्दो पर्खाल वा स्टिल बार लगाउनुको विकल्प नरहेको दोहोर्‍याए । उनले भने, ‘यदि त्यसका लागि हामीले बजेट पाएनौं भने फेब्रुअरी १५ देखि फेरि सरकार बन्द हुनेछ ।’

पेलोसीको जित
जनमत सर्वेक्षणहरूमा अधिकांश अमेरिकीले खर्चबन्दी लम्बिनुमा ट्रम्प दोषी रहेको उल्लेख गरेको देखिएको थियो । त्यसैले पछिल्लो सहमतिका लागि ट्रम्प तयार भएको आंकलन गरिएको छ । ट्रम्प आफ्नो अडानबाट पछि हटेपछिको परिणामलाई विपक्षी नेता तथा हाउस अफ रेप्रिजेन्टेटिभ्सकी सभामुख नान्सी पेलोसीका लागि विजय मानिएको छ ।

ट्रम्पका सामु अडान नछाडेको भन्दै डेमोक्रयाट पार्टीभित्र पेलोसीको निकै प्रशंसा भएको छ । उनी क्यालिफोर्नियाबाट निर्वाचित सदस्य हुन् । ट्रम्पसँग सार्वजनिक रूपमा विवादमा उत्रेपछि राष्ट्रपतिले उनको विदेश भ्रमणसमेत रोकिदिएका थिए । त्यसको बदलामा उनले पनि खर्चबन्दी जारी रहेको बताउँदै राष्ट्रपतिको ‘स्टेट अफ द युनियन’ सम्बोधन पछि सार्न भन्दै स्थान दिइनन् ।

अस्थायी रूपमा खर्च पारित भएपछि यसले संघीय कर्मचारीलाई केही राहत भएको छ । तर फेब्रुअरी १५ भित्र कुनै विस्तृत सम्झौता नभए थप समस्या हुन सक्नेछ किनकि ट्रम्पले त्यसपछि पुन: सरकार बन्द गर्ने चेतावनी दिइसकेका छन् । पर्खाल निर्माणको विकल्पका रूपमा राष्ट्रपतिले यसअघि देशमा राष्ट्रिय संकट घोषणा गर्नेसमेत चेतावनी दिएका थिए ।

प्रकाशित : माघ १३, २०७५ ०९:१२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT