कर्ण शाक्यको ‘कोष’ लोकार्पण

कान्तिपुर संवाददाता

काठमाडौँ — व्यवसायी एवम् सकारात्मक सोचका अभियन्ता कर्ण शाक्यको नयाँ पुस्तक ‘कोष : जीवनपछिको जीवन’ लोकार्पण गरिएको छ । काठमाडौंमा मङ्गलबार आयोजित कार्यक्रममा समता स्कुलका संस्थापक उत्तम सञ्जेल, समालोचक/साहित्यकार गीता त्रिपाठी र लेखक शाक्यले पुस्तक लोकार्पण गरे । 

कार्यक्रममा शिक्षासेवी सञ्जेलले नेपालमा उद्यमशीलताको विकास हुनुपर्नेमा जोड मात्र दिएनन्, कर्ण शाक्यका पुस्तकले उद्यमशीलता विकासमा सघाउने बताए । शिक्षाको विकासबाट मात्र कुनै पनि देशले समृद्धि हासिल गर्न सक्ने र विकासको बाटोमा अघि बढ्ने उनको भनाइ थियो ।

उक्त अवसरमा साहित्यकार त्रिपाठीले शाक्यको यो पुस्तकलाई ‘व्यवहार सिकाउने गीता’का रुपमा चित्रण गरेकी थिइन् ।कार्यक्रममा लेखक शाक्यले आफू सधैं कर्ममा विश्वास गर्ने व्यक्ति रहेको बताए । कुनै पनि देशको विकास फुस्रा भाषणबाट मात्र सम्भव नरहेको र त्यसका लागि कर्मयोगी व्यक्तिको अपरिहार्यता रहेको उनको भनाइ थियो ।सकारात्मक सोचले आफूलाई जहिल्यै अघि बढ्न सघाएको शाक्यले बताए । साथै चुनौतीबाट आफू कहिल्यै पछि नहट्ने उनको भनाइ थियो ।

कार्यक्रममा फाइनप्रिन्टका अजित बरालले नारायण वाग्लेको पल्पसा क्याफेले जसरी नेपाल आख्यानलाई लोकप्रिय बनायो, त्यसरी नै कर्ण शाक्यको सोचले नेपाली गैरआख्यानलाई पनि त्यस्तै बनाएको बताए ।

रङ्गकर्मी प्रकाश सायमीले कार्यक्रममा कर्ण शाक्यको बाहुआयामिक व्यक्तित्वका बारेमा चर्चा गरेका थिए । पुस्तकले व्यावहारिक ज्ञानमा जोड दिने र मानिसलाई उद्यमशील बनाउन सघाउने उनको भनाइ थियो ।

पुस्तक फाइनप्रिन्टले प्रकाशनमा ल्याएको हो ।

प्रकाशित : माघ २३, २०७५ ०९:२६
प्रतिक्रिया
पठाउनुहोस्

मान्छेको माया यहाँ...

कान्तिपुर संवाददाता

काठमाडौँ — अहिले नयाँ तथा पुराना गीतहरू युट्युबमा सजिलै भेटिन्छन् । मेला–महोत्सवदेखि अन्य कन्सर्टमा नयाँ गीतहरू जति प्रत्यक्ष सुन्न पाइन्छन्, पुराना त्यति सुन्न पाइन्नन् । गायिका ज्ञानु राणाहरूलाई सुन्न मञ्चमा तिनै हुनुपर्छ ।

गायिका ज्ञानु राणालाई सम्मान प्रदान गर्दै हिडन ट्ेरेजरका गोपालसुन्दरलाल कक्षपती । तस्बिर : बिजु महर्जन/कान्तिपुर 

नेपाल प्रज्ञा प्रतिष्ठानमा मंगलबार त्यस्तै संयोग जुर्‍यो । ‘अविरल यात्रा’ मा हिडन ट्रेजरले गायिका राणालाई मञ्च दिएको थियो । सर्जकहरूलाई सम्मान गर्ने यो पहलको तेस्रो संस्करणमा राणाका दर्जनभन्दा बढी सदाबहार गीत गुन्जिए ।

१४ वर्षको उमेरमा बुवा धर्मराज थापाको हात समातेर गीत गाउन रेडियो नेपाल छिरेको क्षण सम्झिँदै राणाले सुरुआतमा बुवाकै संकलन रहेको गीत ‘चौतारीमा मै बसेँ होला कि’ गाइन् । “बुवाको पाइलापछ्याउँदै जब मैले गाउन थालेँ, गाउँलेहरू ‘गाइनेकी छोरी गाइने नै बन्न लागी’ भनेर कुरा काट्ने गर्थे,” बीचबीचम राणा सुनाउँदै थिइन्, ‘तर मलाई बुवाको गीति व्यक्तित्वमाथि गर्व लाग्थ्यो । अनि आफूले पनि बुवाको नाम राख्नुपर्छ भन्ने लाग्थ्यो । यही निरन्तरताले मलाई यहाँसम्म ल्याइपुर्‍याएको हो ।’

राणाले बुवाकै ‘आज फेरि काफल पाक्यो...’ पनि गाइन् ।

कार्यक्रममा अन्य गायकगायिकाले समेत राणाकै गीत गाए । सरिता शाही र विकासजंग थापाले ‘शिरीमा शिरी,’ महेन्द्र श्रेष्ठ र मीना निरौलाले ‘मान्छेको माया यहाँ’, प्राश्ना शाक्य र सुरजकुमार थापाले ‘च्याङ्बा होइ च्याङ्बा’ सुनाए । सरिताले ‘कसैले बुझेन मेरा मनको बहलाई’ र ‘मेरो लोभी आँखाले..’, मीनाले ‘मायालु छोडी नदेऊ मेरो हात’, ‘पीरै पर्‍यो कत्तिको’ र ‘आशाको दियो’ समेत सुनाए । महेन्द्र र प्राश्नाले ‘हीरा के हो चिन्नलाई’, प्राश्नाले ‘अब त जाउँक्यारे घर...’ पनि गाए ।

संगीतकार राजु सिंहले कन्डक्ट गरेको कन्सर्टमा दिनेशराज रेग्मी, रबिन कार्कीढली, कुमार महाराज, दीपक थापा, सुरज श्रेष्ठ प्रधान, सौखिन सिंह, अनुप दास, रूपेश सिंह, सुन्दरकुमार महर्जन, भुवन गन्धर्व, सुधीर चौधरी, मोहनकृष्ण ढली, नारायणदास कार्कीढली, केशव सुनाम, मनोहर सुनाम, किशोर कार्कीढली, विनीता कार्कीढली, निरोज कार्कीढली, अभिषेक कार्कीढली, रत्न विश्वकर्मा र धर्म गन्धर्वले बाजागाजामा साथ दिएका थिए ।

गायिका राणालाई हिडनट्रेजरका अध्यक्ष गोपालसुन्दर लाल कक्षपतीले सरस्वतीको मूर्ति र एक लाख रूपैयाँसहित सम्मान अर्पण गरेका थिए ।

प्रकाशित : माघ २३, २०७५ ०९:१३
पूरा पढ्नुहोस्
प्रतिक्रिया
पठाउनुहोस्
ADVERTISEMENT