कला साहित्य उत्सवको मैझारो

कान्तिपुर संवाददाता

काँकडभिट्टा — समाजवादी चिन्तक प्रदीप गिरिको सम्भाषणसँगै काँकडभिट्टामा जारी ३ दिने कला साहित्य उत्सवको मैझारो भएको छ । अन्तिम दिनको अन्तिम सत्रमा मञ्च उक्लिएका गिरिले ‘प्र्रेम र यौन ः पहेंली अनेक’ शीर्षकमा अनुभव साटे ।

कला साहित्य उत्सवको अन्तिम दिन अनुभव बाँड्दै समाजवादी चिन्तक प्रदीप गिरि । तस्बिर : कान्तिपुर

खासगरी महात्मा गान्धी र रजनीशको यौनजीवनलाई उनले वर्णन गरे । ‘गान्धीमा पहिला यौनप्रति ज्यादै धेरै आशक्ति थियो,’ पाका चिन्तकले सुनाए, ‘तर ३५ वर्ष लागेपछि ब्रह्मचारी बन्ने घोषणा गरे ।’ ५० वर्षपछि पुनः सरलादेवी नामक महिलासँगको प्रेममा गान्धी परेका थिए ।

Citizen

पहिलो सत्रमा ‘समृद्धि यात्राको संकट’ देखि ‘पुरुष मुक्ति कसरी ?’ लगायत आधा दर्जन विषयमा गरमागरम बहस भयो । ‘समृद्धि यात्राको संकट’ बारे अर्थशास्त्री खगेन्द्र प्रसाइँ र विश्व पौडेलसँग विनोद तिम्सिना बहरमा उत्रे । प्रसाइँले सरकारले रेल र पानीजहाज ल्याउन लागेको एउटा प्रसंगमा भने, ‘रेल र पानी जहाज ल्याउनु ठूलो कुरा होइन । ठूलो कुरा त, नेपालले पानीजहाज रेलमा के पठाउने भन्ने हो ।’ पौडेलले भने, ‘संघको काम गराइमा इमानदारितासँगै दक्षतामा समस्या छ त्यही कारण प्रान्तीय सरकार
समस्यामा छ ।’

पत्रकारहरू शिव गाउँले, सुविना श्रेष्ठ र संगीतश्रोतासँग नारायण कडरियाले ‘समाचार, झूटा समाचार र खरिद समाचार’ शीर्षकमा बहस गरे । वक्ताहरूले सत्ता र स्वार्थको जन्जालमा फसेको नेपाली पत्रकारिताको चिरफार गर्न भ्याए । वक्ताहरूले ठूला मिडियाको निर्णायक तहमा एक समुदाय र एक लिंगको मात्रै बाहुल्य रहेको बताए ।

‘सत्ता र अभिव्यक्ति स्वतन्त्रता’ शीर्षकमा सीके लाल र खगेन्द्र संग्र्रौलाले विचार राखे । सीके लालले सत्ता असहिष्णु हुँदा त्यसको बेफाइदा कालान्तरमा सत्तालाई नै हुने बताए । ‘सत्यको खोजी निरन्तर भइरहनुपर्छ नत्र सत्ता कुहिँदै जान्छ,’ लालले थपे, ‘त्यसको प्राथमिक सर्त अभिव्यक्ति स्वतन्त्रता हो ।’ लालपछि मञ्चमा उक्लिएका संग्रौलाले इतिहासमा आफूले झेलेका अभिव्यक्ति स्वतन्त्रताका अनुभूति सुनाए ।

प्रकाशित : फाल्गुन २१, २०७५ ०८:२६
प्रतिक्रिया
पठाउनुहोस्

दोहोरीमा झुम्यो बुटवल

अमृता अनमोल

बुटवल — रामनगरस्थित बुटवल मण्डपमा जारी पाँचौं राष्ट्रिय खुला दोहोरी रनिङ सिल्ड प्रतियोगिता तथा सांस्कृतिक महोत्सवले दर्शक तताएको छ । राष्ट्रिय लोक तथा दोहोरी गीत प्रतिष्ठानले गरेको महोत्सवमा बिहानैदेखि साँझसम्म दोहोरी घन्कँदै छ ।

बुटवलमा आयोजित पाँचौं राष्ट्रिय खुला दोहोरी रनिङ सिल्ड प्रतियोगिता तथा सांस्कृतिक महोत्सवमा कलाकार । तस्बिर : अमृता/कान्तिपुर 

देशभरका लोकगायक–गायिकाको जमघट छ यहाँ । टेलिभिजनको पर्दामा देखिने गायक–गायिकालाई नजिकबाट देख्न र सुन्न पाउँदा दर्शक खुसीले झुमेका छन् । देशका चर्चित दोहोरी कलाकारबीचको घमासानले गाउने, नाच्ने र सुन्नेलाई पनि तताएको हो ।

प्रतियोगितामा सोमबार १५ समूहले भाग लिए । नगरकोट दोहोरी साँझ काठमाडौं र लोक दोहोरी प्रतिष्ठान दाङले पस्केको दोहोरी धेरैले मन पराए । उनीहरूले ‘सारै राम्री छ्यौ, तिम्रो जोवन राजीनामा देऊ...’ गाउँदा धेरै नाचे । महोत्सवमा नयाँ–पुराना दुवै भाकामा गीत पस्के । पुराना गीतमा ‘ऐना हेरेर...,’ ‘ससुरालीमा...,’ ‘कालीपारे दाइ...’, ‘पानी घट्टमा...,’ ‘बल्ल पर्‍यो निरमाया माकुरी जालैमा...’ सम्मका गीत गाए । नयाँमा ‘पछ्यौरी लेउ बैना, आजै टुंगो लगाइदेऊ माया छ कि छैन...’ भन्ने भाका पनि सुनाए । ‘लालुमै तिम्रो माया..., मागेजति वरदान पाको भा...’ गीत पनि गुन्जियो ।

प्रतियोगितामा ४० जिल्लाका ५६ समूह छन् । पुरुष/पुरुष र महिला/महिलाबीच पनि प्रतिस्पर्धा छ । केन्द्रीय सदस्य तथा दोहोरी गीत संयोजक प्रचण्ड जीसीका अनुसार प्रतियोगिता ७ चरणमाछनोट हुनेछ । सहभागीले सुरु चरणमा आफूले चाहेको लय र विषयमा गीत गाउनेछन् । दोस्रो चरणदेखि मूल्यांकनकर्ताले नै विषयवस्तु तथा लय तोक्नेछन् । त्यसका लागि ३० विषयवस्तु र ५० लय छनोट भएका छन् । बजारमा बढी चलेका लोकलयलाई प्राथमिकता दिएको संयोजक जीसीले बताए ।

राष्ट्रिय लोक तथा दोहोरी गीत प्रतिष्ठानका निवर्तमान अध्यक्ष चन्द्र शर्माको संयोजकत्वमा मूल्यांकन समिति बनेको छ । ‘दोहोरी प्रतियोगितामा सुर, ताल, लय, शब्द संयोजन, मौलिकता, हाउभाव सबैलाई आधार मानेर अंक गणना गरिनेछ,’ शर्माले भने । प्रतियोगिताको प्रथमलाई २ लाख, द्वितीयलाई १ लाख २० हजार र तृतीयलाई ७० हजार रुपैयाँ पुरस्कार दिइनेछ । सान्त्वनाले ३५ हजार र उत्कृष्ट गायक–गायिकालाई जनही १५ हजार नगद पाउनेछन् ।

प्रकाशित : फाल्गुन २१, २०७५ ०८:२५
पूरा पढ्नुहोस्
प्रतिक्रिया
पठाउनुहोस्