पारिजात स्मृति केन्द्रद्वारा सम्मान घोषणा, पारिजातको प्रतिमामा मार्ल्यापण
काठमाडौँ — पारिजात स्मृति केन्द्रले बिहीबार यस वर्षका विभिन्न सम्मान घोषणा गरेको छ । केन्द्रले 'पारिजात सिर्जन सम्मान' आनन्ददेव भट्टलाई, 'पारिजात संघर्षशील नारी सम्मान' सरिता डंगोललाई, 'पारिजात कला सम्मान' रामकृष्ण दुवाललाई तथा 'पारिजात बालसाहित्य सम्मान' खगेन्द्र संग्रौलालाई प्रदान गर्ने निर्णय गरेको हो ।
त्यस्तै, पारिजातको लेखन र जीवनका विषयमा विद्यावारिधि गर्ने कृष्णप्रसाद घिमिरे, चन्द्रमान श्रेष्ठ, नयना प्रधान, बद्रीविशाल पोखरेल, भवानीप्रसाद पाण्डे, हरिहर भण्डारी र सिर्जना शर्मालाई पारिजात सम्मान प्रदान गर्ने निर्णय गरेको केन्द्रका सदस्यसचिव स्नेह सायमीले जनाए ।
२६ औं स्मृति दिवसको अवसरमा बिहीबार राजधानीको म्हेपीमा आयोजित पारिजातको प्रतिमा माल्यार्पण समारोहमा सम्मान घोषणा गरिएको हो । समारोहमा नेपाल प्रज्ञा प्रतिष्ठानका कुलपति गंगाप्रसाद उप्रेती, नेपाल ललितकला प्रज्ञा प्रतिष्ठानका कुलपति केके कर्माचार्य, संगीत नाट्य प्रज्ञा प्रतिष्ठानका कुलपति रायनलगातयले पारिजातको साहित्यिका योगदानबारे प्रकाश पारे ।
