आँबुखैरेनी वाङ्मय पुरस्कार यज्ञशको 'भुइयाँ' लाई प्रदान

हरिराम उप्रेती

गोरखा — आँबुखैरेनी  स्रष्टा समाजद्वारा हरेक वर्ष प्रदान गरिने आँबुखैरेनी  वाङ्मय पुरस्कार-२०७४ यज्ञशको गैर आख्यान कृति 'भुइयाँ' लाई प्रदान गरिएको छ । शनिवार तनहुँको आँबुखैरेनीमा भएको कार्यक्रममा गण्डकी प्रदेशका आन्तरिक मामिला तथा कानुनमन्त्री हरिबहादुर चुमानले कृतिका लेखक यज्ञशलाई सम्मान गरेका हुन् ।  

पत्रकारिता र साहित्यिक लेखनको क्षेत्रमा आफ्नो अलग पहिचान स्थापित गर्दै सशक्त लेखनको माध्यमबाट दलित, उपेक्षित, सीमान्तकृत, भुँइमान्छेको कथा र उनीहरूको अधिकारको स्वरहरूलाई साहित्यमा उठाउँदै आएकाले साहित्यिक लेखनको उच्च सम्मान गर्दै गैर आख्यान कृति 'भुइयाँ'लाई पुरस्कृत गरिएको आयोजकले जनाएको छ ।

त्यस्तै हास्य कलाकार उत्तम केसीलाई हास्य व्यंग्यतर्फको 'इन्द्रासन हास्य व्यंग्य पुरस्कार-२०७४' प्रदान गरिएको छ । प्रदेशका मन्त्री चुमानले दुवैलाई नगद १० हजार र प्रमाणपत्रले सम्मान र पुरस्कृत गरे । सोही अवसरमा २०७४ को 'महेश कुमार श्रेष्ठ प्रतिभा पुरस्कार' आँबुखैरेनी बहुमुखी क्याम्पस व्यवस्थापन संकायतर्फको २०७४ की उत्कृष्ट विद्यार्थी विमला सारु मगर पाएकी छन् ।

२०७० सालमा स्थापना भएको आँबुखैरेनी स्रष्टा समाजले २०७१ सालमा अक्षयकोष स्थापना गरी सोही वर्षबाट साहित्यको क्षेत्रमा योगदान पुर्‍याउने उत्कृष्ट कृति वा व्यक्तित्वलाई पुरस्कार प्रदान गर्दै आएको छ ।

२०७३ सालबाट भने हास्यकलाकारलाई सम्मान थालिएको स्रष्टा समाजका अध्यक्ष श्रेष्ठले बताए । 'आँबुखैरेनीको साहित्यिक पहिचानलाई स्थापित गर्न यस्ता कार्यक्रमले सघाउने विश्वास लिएका छौँ,' उनले भने ।

प्रकाशित : वैशाख २८, २०७६ १७:०८
प्रतिक्रिया
पठाउनुहोस्

बर्दिया राष्ट्रिय निकुञ्जमा एक महिनायता लागेको डढेलो नियन्त्रणमा आएन 

कमल पन्थी

बर्दिया — एक महिनायता बर्दिया राष्ट्रिय निकुञ्जको बबई उपत्यका र कर्णाली तटीय क्षेत्रमा फैलिएको डढेलो नियन्त्रणमा आएको छैन । पूर्वपश्चिम राजमार्ग वरिपरि लागेको डढेलो नियन्त्रण गर्ने प्रयास भइरहेपनि पूर्ण रूपमा नियन्त्रणमा नआएको निकुञ्जले जनाएको छ । 

निकुञ्जको कर्णाली र बबई तटीयक्षेत्रको अम्रेनी, घुम्ना, रम्मापुर सेक्टर सैनावारदेखि बनखेत र चुरेको गोठी, बबई उपत्यका, तरंगा लगायत दर्जनौँ ठाउँमा डढेलो लागेको हो ।

डढेलो नियन्त्रणमा नआएपछि विगत तीन सातायता धुवाँको मुस्लोले मध्यवर्ती क्षेत्र समेत प्रभावित भएको छ । ठाकुरबाबा-१ का शंकर थारुका अनुसार डढेलोको मुस्लोले गाउँमा धुवाँले ढाकेको बताए ।

डढेलोका कारण बालबालिका र वृद्धलाई बढी असर परेको उनको भनाई छ । बबई उपत्यकाको विकट चुरे क्षेत्र भएकाले नियन्त्रणमा लिन सकिएको छैन ।' डढेलोसँगै चलेको हावाले निकुञ्जको उत्तरी भाग अझै डढेलोको जोखिममा रहेको रेन्जर पुष्पदेव श्रेष्ठले बताए ।

निकुञ्जभित्र मह काढ्ने, घाँस, दाउरा गर्ने र चोरी सिकारीले आगो लगाएका कारण डढेलो सल्केको आशंका निकुञ्जका कर्मचारीले गरेका छन् । डढेलो लगाउनेलाई निकुञ्जले पहिचान गर्न सकेको छैन ।

शनिवार सुर्खेत तरंगाकी पद्मा उपाध्यायलाई वनको सुखेको घाँसमा आगो लगाएको आरोपमा निकुञ्जले नियन्त्रणमा लिएको छ ।

चुरे क्षेत्रमा हावाहुरी र तातो लुसँगै आगोको मुस्लो नियन्त्रण गर्न निकुञ्ज सुरक्ष्ााका लागि तैनाथ नेपाली सेना, कर्मचारी लगायत संरक्षणकर्मीलाई हम्मे हम्मे परेको छ ।

वर्षेनी गर्मीयाम मौसममा हुने डढेलोले निकुञ्जमा क्षति पुर्‍याउँदै आएको छ । दमकल नपुग्ने विकट चुरे क्षेत्रमा डढेलो नियन्त्रण गर्ने अवस्था नरहेको निकुञ्जले जनाएको छ । डढेलो उत्तरको चुरे पहाडबाट सुरु भई दक्षिण क्षेत्रमा बढी फैलिने गरेको छ ।

हालसम्म डढेलोका कारण जंगली जनावरलाई पुगेको क्षतिको विवरण नआएपनि वन्यजन्तुले बासस्थान फेर्दै अन्यत्र जाने गरेको निकुञ्जले जनाएको छ ।

प्रकाशित : वैशाख २८, २०७६ १६:४८
पूरा पढ्नुहोस्
प्रतिक्रिया
पठाउनुहोस्