योञ्जनका कथा

कान्तिपुर संवाददाता

काठमाडौँ — तामाङ मातृभाषी साहित्यमा बुद्ध योञ्जनको उलेख्य योगदान छ । कविता, उखानटुक्कादेखि गीत र आख्यानसम्म उनले कलम चलाएका छन् । उनको सातौं कृति कथा संग्रहका रूपमा शनिबार राजधानीमा लोकार्पण गरियो ।

तामाङ सांस्कृतिक–सामाजिक सन्दर्भका कथा समेटिएको ‘ह्रुङा’ लाई सञ्चारकर्मी मायालु ङेसुर, धावासाङ लामा, निष्णु थिङलगायतले लोकार्पण गरे । तामाङ डाजाङले प्रकाशन गरेको ‘ह्रुङा’ मा १४ वटा कथा छन् ।

लोपोन्मुख बन्दै गइरहेको मौलिक ज्ञान र पुस्तान्तरणको समस्यालाई कथामा समेटिएको मायालु ङेसुरले बताइन् । दुई पुस्ताबीचको बुझाइको भिन्नतादेखि वैदेशिक रोजगारीको सामाजिक/आर्थिक प्रभावलाई पनि कथाहरूमा समेटिएको छ ।


प्रकाशित : जेष्ठ २७, २०७६ ०८:११
ADVERTISEMENT
प्रतिक्रिया
पठाउनुहोस्
ADVERTISEMENT

भिटेन र मेलिनाले नचाए

कान्तिपुर संवाददाता

(सुनसरी) — युवा पुस्ताले मन पराएका कलाकार हुन्, र्‍यापर समीर घिसिङ (भिटेन) र गायिका मेलिना राई । यी दुईले धरानको पब्लिक स्कुलको मैदानमा शनिबार बेलुका दर्शकश्रोतालाई लगातार तीन घण्टा नचाए । 

धरानमा आयोजित कन्सर्टमा गीत गाउँदै गायक भिटेन । तस्बिर : प्रदीप मेन्याङ्बो/कान्तिपुर 

करिब ८ हजारभन्दा बढी दर्शकले भरिएको धरानको पब्लिक स्कुलको मैदानमा गायिका राईले ‘तिमीले बाटो फेर्‍यौ अरे...’, ‘असारे महिना...’, ‘चरी जस्तै...’, ‘माछीले खाने खोलीको लेउ...’, ‘कम्मर माथि पटुकी...’, ‘गोजीमा दाम छैन...’, ‘दारी फुल्यो बैंसमा...’, ‘कुटुमा कुटु...’ लगायत लोकप्रिय गीत सुनाइन् । यसअघि पनि मेलिनाले धरानमा कन्सर्ट दिएको भए पनि यति धेरै दर्शकश्रोताको साथ मिलेको थिएन ।

उनीपछि भिटेन स्टेजमा आए । धरानमा तेस्रो पटक झुल्किएका भिटेन युवामाझ लोकप्रिय छन् । उनले गाउन थालेपछि दर्शकश्रोताले भरिएको मैदानमा बेग्लै माहोल सिर्जना भएको थियो । उनले ‘कोही साथी प्रहरी बने कोही साथी गुन्डा मचाहिँ आफ्नै धुनमा...’, ‘यता पनि चुरोट उता पनि चुरोट...’, ‘र्‍यापको बाटो...’, ‘हालखबर...’, ‘म मान्छे खत्तम...’, ‘लाहुरेको रेलिमाई...’, ‘सिमसिमे पानी जिस्कने बानी...’, ‘सही हो सही हो...’ लगायत गीत सुनाए ।

उनको गीत सुन्न १० वर्षमुनिका केटाकेटीसमेत आफ्ना अभिभावकसँग आएका थिए । सिल्भर इन्टरटेनमेन्टले गरेको ‘सात्विक मनोरञ्जन धमाका’ मा डेनी थलङ लिम्बू र सुनयना श्रेष्ठले भिटेन र मेलिनालाई साथ दिएका थिए ।

प्रकाशित : जेष्ठ २७, २०७६ ०८:०८
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT