मोरङको मतगणनाको रोचक पक्ष

जितेन्द्र साह

विराटनगर — मोरङको सदरमुकाम विराटनगरलगायत विभिन्न नगर एवं गाउँपालिकामा सुरुवाती चरणमा मत गणना सुस्त देखिए पनि दलबीच किचलो भने भएन । आदर्श माध्यमिक विद्यालय परिसरमा अन्तिम गणना चलिरहेकै बेला प्रतिस्पर्धी दलका उम्मेदवारले सहर्ष हार स्वीकारेर एक अर्कालाई बधाई दिइरहेको देखिन्थ्यो । गुट-गुटमा बसेर उम्मेदवारहरुले हारको कारण र भावी रणनीतिबारे छलफल गरिरहेका भेटिन्थे ।

यहाँ १५ असार बेलुकी साढे चार बजेबाट मत गन्न सुरु गरिएको थियो । प्रमुख पदहरुमा भारी मतान्तरले कांग्रेसले जिते पनि १९ वडामध्ये ७ मा मात्र कांग्रेस, ६ वटामा संघीय समाजवादी फोरम, ३ वटामा एमाले, एक वटामा माओवादी र २ वटामा स्वतन्त्र उम्मेदवारले जित्यो । १९ नम्बर वडामा कांग्रेसका बागी उम्मेदवारको प्यानलै जित्यो । यहाँ कांग्रेसले वडाध्यक्षमा अरुलाई उठाएपछि सदस्य पदका ४ आधिकरिक उम्मेदवारले पनि दलको टिकट परित्याग गरी वडाध्यक्षमा उठेका बागी उम्मेदवारको पक्षमा उभिएका थिए ।

१० नम्बरको वडाध्यक्षमा एमालेको बागी उम्मेदवार र चार सदस्य पदमा कांग्रेस विजयी भयो । यहाँ एमालेले वडा समितिबाट सिफारिस भएकालाई उपेक्षा गर्दै अन्यलाई टिकट दिएपछि बागी उम्मेदवार उठेका थिए । कांग्रेसबाट दलित महिला सदस्य पदमा उठाइएकी २१ वर्षीया पिंकी पासवानले विराटनगर ९ मा सबैभन्दा बढी ९ सय ७ मत प्राप्त गरेर जितिन् । उनले विजयी वडाध्यक्ष भन्दा १ सय ८४ मत बढी पाएकी छन् । श्रमिककी छोरी पासवान बालअधिकार अभियानमा सक्रिय छिन् । भर्खरै माध्यमिक शिक्षा परीक्षा उत्तीर्ण गरेकी उनी पढाइबाट बचेको समयमा स्थानीय गुद्री हाटमा तरकारी बेच्छिन् ।

हिन्दु बहुल मोरङको धनपालथान गाउँपालिकाको उपाध्यक्षमा मुस्लिम समुदायकी नसिमा बानो विजयी भएकी छन् । कांग्रेसबाट टिकट पाएकी उनले हिन्दु समुदायको समेत मायाका कारणले उठेको हुनाले जितप्रति पहिलेदेखि ढुक्क रहेको बताएकी छन् । यहाँ मुस्लिमको पनि राम्रै बसोबास छ । पहिलाको दादरबैरिया, सोराभाग, अमाहिवरियाती, नोचा र कदमाहा गाविस समावेश गरेर यो गाउँपालिका निर्माण भएको हो ।

मोरङको बेलबारी नगरपालिकामा एमाले नेतृ, शिक्षक एवं चर्चित युवाकवि ढाका (तारा) कुमारी पराजुली उपप्रमुखमा विजयी भएकी छन् । स्वच्छ छविकी पराजुली जनस्तरमै सर्वाधिक लोकप्रिय अनुहार पनि हुन् ।

रंगेली नगरपालिकाबाट उपप्रमुखमा विजयी माओवादी केन्द्रकी केशवकुमारी खराल स्वास्थ्य स्वयंसेविका एवं सामाजिक कार्यकर्ता हुन् । मधेसी बहुल रंगेलीमा स्थानीय निकायमा उच्च पदमा पुग्ने पहाडी मुलकी उनी पहिलो महिला भएकी छन् । उल्लेखनीय के छ भने माओवादी केन्द्रले मोरङको यही एकमात्र नगरपालिकामा प्रमुख एवं प्रमुख हात पारेको छ ।

विराटनगर १२ को महिला वडा सदस्यमा जित्ने झुमा पोखरेल पाठक र झापाको मेची नगरपालिकाको उपप्रमुखमा विजयी मीना पोखरेल उप्रेती सहोदर दिदी बहिनी हुन् । दुवै एमालेबाट उठेका थिए । संवैधानिक प्रावधानका कारण मोरङमा पनि उल्लेखीय संख्यामा महिला र दलित जनप्रतिनिधिको रुपमा चुनिए । ‘बाजेको पालादेखि कांग्रेस पार्टीमा आवद्ध छु तर टिकट पाएर चुनाव जितेको पहिलो पटक हो,’ विराटनगर ८ बाट विजयी दलित सदस्य सेवकीदेवी पासवानले भनिन्, ‘प्रमुख दायित्व वडाको विकास हो ।’ उनी दलित महिला सदस्य पदका पाँच उम्मेदवारलाई उछिनेर जितिन् ।

मोरङमा उपप्रमुख पदमा १० जना जनजाति, दलित, आदिवासी र मुस्लिम महिला विजयी भएका छन् । उनीहरु स्वास्थ्य स्वयंसेविका, राजनीतिक, सामाजिक कार्यकर्ता र गृहिणी हुन् । अतिपिछडिएको जाती मानिने बाँतर समुदायकी सामान्य गृहिणी मञ्जिता सरदार मोरङको कटहरी गाउँपालिकाको उपाध्यक्ष बनेकी छन् । कांग्रेसबाट टिकट पाएकी उनी स्थानीय तहको चुनावमा पूर्वको तीनवटै जिल्ला मोरङ, सुनसरी र झापामा दलित समुदायबाट यति ठूलो पदमा पुग्ने पहिलो महिला हुन् । उनीहरु सबैले स्थानीय विकाससँगै महिला सम्बद्ध मुद्दामा काम गर्ने प्रतिबद्धता जनाएका छन् ।

मतगणनास्थल पनि यहाँ सुरुदेखि रोचक गतिविधिसँगै चर्चामा रह्यो । राजधानीस्थित निर्वाचन आयोग कार्यालयबाट गत सोमबार बेलुकीसम्म अधिकृतस्तरका कर्मचारीहरु नआउन्जेल विराटनगरको मतगणना सुस्त रहेको थियो । निद्रा लाग्यो भन्दै भोट गन्न छाडेर कर्मचारी र उम्मेदवारका प्रतिनिधि मुख्य निर्वाचन अधिकृतलाई खबरै नगरी हिँड्थे । अनि नित्यकर्मका लागि बिहान ५ बजे निस्केका कर्मचारी एवं प्रतिनिधि बिहान ९ बजेसम्म फर्केर नआउने गरेको देखियो । उनीहरु रातिपख लामखुट्टेले सतायो भन्दै बाहिर हावा खान निस्कन्थे ।

गत सोमबार साताभरिमा गणना सक्ने आयोगको कडा निर्देशनपछि कर्मचारी त सक्रिय भए तर उम्मेदवारका प्रतिनिधिहरुको उही मस्त ताल रहेको थियो । अन्तिम गणना चलिरहेको बेला चियाखाजाकालागि बाहिर निस्केका दलका प्रतिनिधिहरुलाई मतगणना अधिकृतले पटकपटक माइकिंग गरीगरी उपस्थित हुनलाई अनुरोध गरिरहेको सुनिन्थ्यो । उनीहरु भने बोलाहट आयो भन्दै चियाको चुस्की एवं पान चपाउँदै बसिरहेका हुन्थे ।

‘सुरुवाती गणनाले एक महिनामा पनि नसकिएला भन्ने चिन्ता बढाएको थियो, आयोगका कर्मचारीको आवागमनपछि गति लियो,’ उक्त विद्यालयका प्राचार्य दूर्गाप्रसाद चूँडालले भने,‘अन्यत्रजस्तो विवाद नहुनु र सबै समस्याको समाधान छलफलबाट खोजिनु यहाँको सुखद पक्ष रह्यो ।’

मतगणना सकिएसँगै उक्त विद्यालय पनि आर्थिक वर्षको समापनसम्बन्धी हिसाबकिताब एवं नियमित पठन पाठनको तयारीमा जुटिसकेको छ । मतपेटिका भने अझैं विद्यालयको वरन्डामा राखिएको हुनाले सुरक्षाकर्मीको पहरा कायमै छ । ती मतपेटिकाहरुलाई दोहोर्‍याएर मतदानकै लागि प्रयोग गर्न नमिल्ने रहेछ । ती बाकसहरुलाई बिरुवा रोप्न र फोहोर फाल्ने भाडो बनाउन सकिने हुनाले उक्त विद्यालयले मुख्य निर्वाचन अधिकृतको कार्यालयसँग यही छाडिदिन आग्रह पनि गरेको छ ।

प्रकाशित : असार २८, २०७४ १३:१६
प्रतिक्रिया
पठाउनुहोस्

बूढीगण्डकी आयोजना चिनियाँ कम्पनीलाई दिने निर्णय खारेजीको माग

कान्तिपुर संवाददाता

काठमाडौं — नयाँ शक्ति पार्टीले बूढीगण्डकी जलविद्युत् आयोजना निर्माणको जिम्मा चिनियाँ कम्पनीलाई दिने निर्णय तत्काल खारेज गर्न माग गरेको छ । संयोजक बाबुराम भट्टराईले बुधबार प्रधानमन्त्री शेरबहादुर देउवालाई ज्ञापन पत्र बुझाउँदै चिनियाँ कम्पनीसँगको समझदारी खारेज गरेर अन्तर्राष्ट्रिय प्रतिस्पर्धा गराएर यथाशीघ्र सुपरभिजन कन्सल्ट्यान्ट र आयोजना निर्माण कन्ट्रयाक्टर छनोट गरी निर्माण सुरु गर्न माग गरे ।

नयाँ शक्ति पार्टीले बूढीगण्डकी जलविद्युत् आयोजना निर्माणको जिम्मा चिनियाँ कम्पनीलाई दिने निर्णय तत्काल खारेज गर्न माग गरेको छ ।

संयोजक बाबुराम भट्टराईले बुधबार प्रधानमन्त्री शेरबहादुर देउवालाई ज्ञापन पत्र बुझाउँदै चिनियाँ कम्पनीसँगको समझदारी खारेज गरेर अन्तर्राष्ट्रिय प्रतिस्पर्धा गराएर यथाशीघ्र सुपरभिजन कन्सल्ट्यान्ट र आयोजना निर्माण कन्ट्रयाक्टर छनोट गरी निर्माण सुरु गर्न माग गरे । गत जेठ ९ गते बसेको मन्त्रिपरिषद् बैठकले १२ सय मेगावाट क्षमताको बूढीगण्डकी आयोजना निर्माणका लागि चीनको गेजुवा ग्रुप कम्पनी लिमिटेडलाई दिने निर्णय गरेको थियो । चिनियाँ कम्पनीसँगको सम्झौता राष्ट्रिय स्वाभिमान विपरीत, प्राविधिक रुपले गलत तथा आर्थिक–सामाजिक दृष्टिकोणबाट मुलुकलाई दीर्घकालीन असर पर्ने नयाँ शक्तिको ठहर छ । ६० मे.वा.को त्रिशुली ३ए को कार्य समयमा सम्पन्न नगर्ने, चिलिमे जलविद्युत आयोजनाको निर्माण गर्न नसकेर ठेक्का तोडी धरौटी रकम जफत गरिएको, माथिल्लो साञ्जेन जलविद्युत् आयोजनामा कालोसूचीमा परेको, ३० मे.वा.को चमेलिया जलविद्युत् आयोजना निर्माण गर्न १० वर्षभन्दा बढी समय लगाएको, एक अर्ब १६ करोड करछली गरेको गेजुवा ग्रुप कम्पनीमाथि आरोप छ ।

उक्त पार्टीले बूढीगण्डकी आयोजना नेपाल सरकारको लगानी, देशभित्रका बैंकहरू, कर्मचारी सञ्चय कोष, नागरिक लगानी कोष, नेपाली सेनाको कल्याणकारी कोष र सर्वसाधारणको शेयर र आवश्यक परेमा अन्य देशका एक्जिम बैंकहरुसँग न्यून ब्याजदरमा ऋण लिएर नेपालीद्वारा नै निर्माण गर्न पनि माग गरेको छ ।

प्रकाशित : असार २८, २०७४ १३:१६
पूरा पढ्नुहोस्
प्रतिक्रिया
पठाउनुहोस्