द्वन्द्वले एक्लिएकी महिला बनिन् जनप्रतिनिधि

कान्तिपुर संवाददाता

रोल्पा — द्वन्द्वको समयमा पति गुमाएकी धबाङकी धनमाया पुन रोल्पा नगरपालिका–१० बाट वडा सदस्यमा निर्वाचित भएकी छन् । माओवादी पृष्ठभूमिकी धनमाया कांग्रेसबाट निर्वाचित भएकी हुन् । १५ वर्षसम्म माओवादी राजनीतिमा लागेकी उनी कांग्रेसबाट जनप्रतिनिधि बनिन् ।

माओवादी राजनीतिमा लागेका उनका पति गंगालाल पुन: सुरक्षा फौजको आक्रमणमा २०५८ मा मारिएका थिए । पति मारिएको अर्को वर्ष उनी माओवादी बनेर भूमिगत भइन् । गंगालाल एरिया कमिटी इन्चार्ज थिए । पतिको सपना पूरा गर्न उतिबेला माओवादीमा लागेको उनी बताउँछिन् । धनमाया ०७३ मा माओवादी छाडेर कांग्रेस प्रवेश गरिन् ।

पार्टीभित्र सोझा कार्यकर्तालाई पाखा लगाउने प्रवृत्ति बढेपछि पार्टी छाड्नुपरेको उनको भनाइ छ । गाउँघरमा समाजसेवीका रूपमा परिचय बनाइसकेकी धनमायाले गाउँको विकासका लागि आफू सधैं प्रतिबद्ध रहने बताइन् । धनमायालाई कांग्रेस प्रवेश गराएका वडा नं. १० का वडा अध्यक्ष मानबहादुर खत्रीले उनको स्वयंसेवी सोचाइका कारण वडा सदस्य निर्वाचित भएको बताए । उनका चार सन्तानमध्ये तीन छोरा साउदी, मलेसिया र दुबईमा छन् ।

छोरीको बिहे भइसकेको छ । श्रीमानको मृत्युपछि सन्तानलाई हुर्काउन निकै दु:ख गर्नुपरेको बताउँदै धनमायाले सबैलाई शिक्षा दिने चाहना हुँदाहुँदै परिस्थितिले साथ नदिएको दुखेसो पोखिन् ।

गाउँघरमा महिलाका समस्या ज्यादै रहेको र लैङ्गिक विभेदले समाजलाई अघि बढ्न नदिएको निष्कर्ष निकाल्दै धनमायाले सडक, सञ्चार, शिक्षा र स्वास्थ्यको विकासले समाजलाई अघि बढाउन सकिने सुनाइन् । उनी भन्छिन्, ‘अब म यही समाजलाई बदल्न लागिपर्छु ।’ विकासले समाजलाई बदल्न सकिने उनको ठहर छ ।

प्रकाशित : असार ३१, २०७४ ०९:५५
प्रतिक्रिया
पठाउनुहोस्

वडाध्यक्षको शरीरमा गोली

कान्तिपुर संवाददाता

गुलरिया — बारबर्दिया नगरपालिका ११ का वडाअध्यक्ष विजयकुमार थारू १४ वर्षदेखि शरीरमा गोली बोकेर बसिरहेका छन् । ३६ वर्षीय थारूको अप्रेसन गर्न चिकित्सकीय प्रयास असफल भएपछि शरीरमा गोली बोकेरै हिँडडुल गर्न बाध्य भएका हुन् । उनको पेट, कलेजो, खुट्टा र पाखुरामा चार गोली छन् ।

लामो समय माओवादी सशस्त्र युद्धमा लागेका थारू भर्खरै वडाध्यक्षमा चुनिएका हुन् । उपचारका लागि विभिन्न सहर पुगे पनि असम्भव भएपछि गोली ननिकालिएको हो । थारू २०५४ सालमा तत्कालीन नेकपा माओवादीमा आबद्ध भई भूमिगत बनेका थिए । उनी बिग्रेड कमान्डरसम्म बनेको बताउँछन् । द्वन्द्वका बेला दर्जन पटक सुरक्षा फौजसँग जम्काभेट भए पनि ज्यान जोगाउन सफल भएको उनले बताए । बर्दियाको रम्मापुरस्थित सेनाको पोस्टमा आक्रमण गर्दा पेटमा गोली लागेर उनी घाइते भएका थिए । घाइते उनलाई पार्टीले आराम गर्न भनेको थियो । तर मानेनन् । ०६१ सालमा बाँकेको कुसुम आक्रमणमा उनको पाखुरामा गोली लाग्यो । बेनी आक्रमणमा कलेजो र खुट्टामा पनि गोली लागेको उनले जानकारी गराए । अप्रेसन गर्ने अवस्था नरहेको चिकित्सकले बताउँदै आएका छन् । उनको कलेजोको दायाँ भागमा प्लास्टिकको फोक्सो राखिएको छ । खुट्टा र पाखुरामा दुखाइ नभए पनि पेट र कलेजोमा बेलाबेलामा समस्या हुने उनी बताउँछन् । ‘श्वासप्रश्वासमा बेला–बेला समस्या आउने गरेको छ,’ उनले भने, ‘उपचारका लागि विभिन्न अस्पताल गए पनि चिकित्सकले समस्या हुने बताएपछि उपचार गरिनँ । सधैं पार्टी र सामाजिक काममा लागिरहेको छु । यसपटकको स्थानीय तह निर्वाचनमा उनी माओवादी केन्द्रका तर्फबाट उम्मेदवार बनेका थिए ।

चुनावमा निकटतम प्रतिद्वन्द्वी एमालेका झनप्रसाद थारूलाई ७ सय २१ मतले पराजित गर्दै उनी वडाअध्यक्ष निर्वाचित भए । उनले १ हजार २ सय ४७ मत प्राप्त गरे । विजयी भएपछि थप हौसला बढेकाले मतदाताकै काममा लागिरहने उनले बताए ।

प्रकाशित : असार ३१, २०७४ ०९:५५
पूरा पढ्नुहोस्
प्रतिक्रिया
पठाउनुहोस्