सेलायो चुनावी चर्चा

अमन कोइराला

सर्लाही — स्थानीय चुनाव हुन बाँकी प्रदेश २ मा केही दिनयता गर्मी बढे पनि राजनीतिक माहोल भने सेलाएको छ । उम्मेदवारी टिकट पाइसकेका र आकांक्षीहरू मौन बसेका छन् । यहाँ तेस्रो चरणका लागि असोज २ गतेलाई चुनाव तोकिए पनि हुने/नहुनेमा मतदाता अन्योलमा छन् ।

राष्ट्रिय जनता पार्टी (राजपा) नेपालले चुनावमा जाने घोषणा नगरुन्जेल अन्योल कायम रहने अवस्था छ । सबैको आ–आफ्नै विश्लेषण र अनुमान देखिन्छ । अधिकार प्राप्तिपछि मात्र निर्वाचन भन्दै आन्दोलित राजपाका नेता पनि चुनावको वातावरण बन्नेमा ढुक्क छैनन् । सत्तारूढ गठबन्धन, एमाले र राजपाबीच सहमतिले मात्र चुनाव निश्चित हुने धेरैको बुझाइ छ । राजपालाई मिलाउनकै लागि २ नम्बरमा तेस्रो चरणमा चुनाव गर्ने निर्णय भएको थियो । जनचाहना नबुझी राजनीतिक निर्णयका आधारमा चुनाव सारिँदा अन्योल अझ बढेको छ ।

‘चुनाव हुनुपर्छ भन्नेमा दुईमत नै छैन,’ धनगढाका किसान लक्ष्मण रायले भने, ‘नेताको आफ्नै स्वार्थ हुन सक्छ । छिटोभन्दा छिटो विवाद मिलाएर सबैलाई निर्वाचनमा सहभागी गराउनुपर्छ । स्थानीय चुनाव त गाउँका जनताका लागि हो ।’ दोस्रो चरणकै बेला कतिपय दलले यहाँ टिकटसमेत दिइसकेका थिए । आकांक्षीहरू पनि प्रतिस्पर्धामा थिए । कांग्रेसले भने अहिलेसम्म जिल्लाका कुनै स्थानमा उम्मेदवार तय गरेको छैन ।

दोस्रो चरणमा टिकटका लागि नेताकहाँ निकै पटक धाएकाहरू चुनाव सरेपछि असोजमा पनि हुनेमा ढुक्क छैनन् । टिकट पाउँदा पनि प्रचार अवधि लम्बिँदा खर्च बढ्ने देखेर उनीहरू सुस्ताएका हुन् । ‘टिकट लिनै खर्चिलो भयो,’ कांग्रेसका एक उमेदवार आकांक्षीले भने, ‘टिकट दिलाइदिन्छु भन्दै दैनिक खर्च गराइरहेका छन् । टिकट पाएपछि जित्नका लागि फेरि खर्च गर्नैपर्‍यो । त्यसैले सुस्ताएर बस्नुपर्ने बाध्यता भो ।’

राजपाका नेता एवं पूर्वसभासद शिवपूजन यादवले चुनावी चर्चा एकाएक सेलाएको बताए । बारम्बार चुनाव सर्दा नेता/कार्यकर्तामा शिथिलता आएको उनको भनाइ छ । ‘राजपा चुनावमा आउने घोषणा नहुन्जेल चुनावी चर्चा शिथिल नै रहन्छ,’ उनले भने, ‘पहिले जसरी चर्चा चुलिएको थियो, अहिले एक्कासि आकाशबाट झरेजस्तै भयो ।’ उनले नेता र जनता दुवै स्थानीय चुनावको पक्षमा रहेको तर त्यसअघि संविधान संशोधन गरेर वातवरण बनाउनुपर्नेमा जोड दिए ।

प्रकाशित : श्रावण १, २०७४ ०८:५६
प्रतिक्रिया
पठाउनुहोस्

खडेरीले मकै सुके

कान्तिपुर संवाददाता

रामेछाप — गाउँनजिकैबाट बग्ने तामाकोसी नदीमा भेल उर्लंदो छ । नदीकिनारका खेत डुबानमा परेका छन् । नदीभन्दा थोरै माथि भने खडेरीको धाप छ । वन बुटयान सुक्न थालेका छन् । हजारौं खर्चेर छरेका मकैसमेत बारीमै सुकेका छन् ।

‘असारको खडेरी यति लामो परेको यो पहिलो होला,’ मन्थली–२ का चोकबहादुर खड्काले भने । उनका अनुसार बारीमै मकै सुकेपछि किसान उखेल्न थालेका छन् । सुकेर डढ्नुभन्दा केही दिन भए पनि वस्तुलाई घाँस हुन्छ भनेर बारीको मकै उखेल्न थालेका हुन् । दक्षिणी रामेछापका सुनारपानी, मन्थली, भटौली, पकरवास, भलुवाजोर र कठजोरको ठूलीमदौ क्षेत्रमा खडेरीको असर धेरै छ । झन्डै एक महिनादेखि उक्त क्षेत्रमा पानी परेको छैन । भीरपानी, मझुवा, खनियापानी, गागल, माकादुम, राकाथुममा पनि खडेरीको असर छ । जिल्लाका उच्च पहाडी भेगमा भने वर्षा भइरहेको छ । आकाशमा बादल मडारिएको धेरै भयो तर अझै मनसुनले मन्थली देखेको छैन । वरिपरिका डाँडामा पानी परेको छैन । वर्षाको पानीका भरमा एक बाली लगाएर परिवार पाल्नेहरू चिन्तामा छन् । सालुका बासिन्दाले ‘देउता रिसाएको’ भनी केही दिनअघि पानी माग्दै कोटीहोम गरे ।

केहीले मन्दिरमा भाकल गरेका छन् । ‘यो वर्ष सुकायो,’ सुनारपानीका गोविन्दबहादुर सार्कीले भने, ‘भएको बीउ बारीमा फालियो, दिनको २ हजारका खेताला लगाइयो । खडेरी पर्‍यो ।’ मन्थली नगरपालिका प्रमुख रमेशकुमार बस्नेत आफ्नो क्षेत्रमा प्रकृतिले धोका दिएको बताउँछन् । ‘आकाशमा कालो बादल मडारिन्छ, पानी झर्दैन,’ उनले भने ।

नगरपालिकाले सुख्खा क्षेत्रमा कस्ता योजना ल्याउने भनेर छलफल चलाउन थालेको उनले बताए । थोरै पैसाले सुख्खा क्षेत्रमा योजना ल्याउन सम्भव छैन । कृषि विकास कार्यालयले खडेरीको प्रभाव जिल्लामा परेको जनाएको छ । वरिष्ठ कृषि विकास अधिकृत राजेन्द्रकुमार मल्लका अनुसार असार सकिन लाग्दा पनि जिल्लामा २३ प्रतिशत मात्र धान रोपाइँ भएको छ । किसानहरू पानी पर्ला र रोपौंला भनेर पर्खेका छन् ।

प्रकाशित : श्रावण १, २०७४ ०८:५६
पूरा पढ्नुहोस्
प्रतिक्रिया
पठाउनुहोस्