काठमाडौंमै करिब ६० हजारले नयाँ मतदाता नामदर्ता गराए

काठमाडौं — सिन्धुपाञ्चोक तातोपानीका जाङ्गु लामाले बबरमहलस्थित क्षेत्रीय निर्वाचन कार्यालयले सञ्चालन गरेको मतदाता नामावली संकलन केन्द्रमा गई फोटोसहितको मतदान परिचय पत्रमा नाम दर्ता गराए ।

पहिलोपटक फोटोसहित नामावलीमा नाम दर्ता गराएपछि उहाँ अब हुने सङ्घ र प्रदेश तहको निर्वाचनमा मतदान गर्न पाउने भएका छन् । 

काठमाडौँ बस्दै आएकी गोरखा तान्द्राङकी मायादेवी खनालले गोरखामा रहेको आफ्नो मतदाता नामावली यहाँ सारिन् । जाङ्गु र मायादेवीजस्ता मतदाता नामावलीमा नाम छुटेका, नामावली सार्ने र नामावलीमा त्रुटि भएकाले नाम दर्ता गराउने, नामावली सार्ने र त्रुटि सच्याउने कार्य गरिरहेका छन् । 

अहिले काठमाडौँमा रहेका तीन संकलन केन्द्रबाट आगामी सङ्घ र प्रदेश निर्वाचनका लागि देशभरिका मतदान गर्न योग्य नागरिकको नाम दर्ता, ठाउँ सार्ने र त्रुटि सच्याउने कार्य भइरहेको क्षेत्रीय निर्वाचन कार्यालयका प्रमुख चन्द्र गौतमले बताए । उनले ती ठाउँमा अहिले मतदाता नामावलीमा नाम दर्ता गराउनका लागि भीड नै लाग्ने गरेको बताए । 

कान्तिपथस्थित निर्वाचन आयोगको कार्यालय, बबरमहलस्थित जिल्ला समन्वय समिति र राष्ट्रिय सभागृहमा मतदान नामावलीमा छुट भएका नागरिकले गई फोटोसहितको मतदाता परिचय पत्र बनाइरहेका छन् । तीबाहेक साउन १६ गतेदेखि काठमाडौँ जिल्लाका १० नगरपालिकाबाट मतदाता परिचय पत्र बनाइरहेका छन् । 

जिल्ला समन्वय समितिमा ११ वटा स्थान र सभागृहमा १० वटा स्थानमा फोटोसहितको नामावली संकलन गर्ने कार्य भइरहेको छ । 

बबरमहलस्थित संकलन केन्द्रमा खट्नुभएका कार्यालयका अधिकृत शान्ति बोगटीले फोटोसहितको नामावली दर्ताका लागि सर्वसाधारणको भीड रहेको बताउनुभयो । उहाँले दैनिक करिब एक हजार पाँचसय मतदाताको नाम दर्ता गर्ने कार्य भइरहेको बताए । 

केन्द्रमा १७ जना कर्मचारीले बिहान ७ देखि साँझ ६ बजेसम्म फोटोसहितको नामावली दर्ता गराउने गराउँछन् । उनका अनुसार सबभन्दा बढी रामेछाप, सिन्धुली, सिन्धुपाञ्चोक, बारा, पर्सा, सर्लाही जिल्लाका अधिकांश मानिस मतदाता नामावलीमा नाम दर्ता गराउन आएका छन् । उनले दुईदेखि पाँच मिनेटभित्रमा फोटोसहितको नामावली दर्ता गराउने गरेको बताइन् । 

अहिलेसम्म काठमाडौँस्थित सो केन्द्रमा करिब ६० हजारले नाम दर्ता गराएका छन् । तीमध्ये ४२ हजार काठमाडौँ बाहिरका जिल्लाका रहेको गौतमले बताए । उहाँका अनुसार दुई हजार पाँचजनाको ठाउँसारी र पाँचसयजनाको त्रुटि सच्याउने काम सम्पन्न भएको छ । 

साउन १ गतेदेखि मसान्तसम्म केन्द्रबाट नामावली संकलन भइरहेको छ भने साउन १६ गतेदेखि भने देशभरिका स्थानीय तहबाट पनि नामावली संकलन गर्ने कार्य थालिएको छ । रासस 

प्रकाशित : श्रावण २९, २०७४ १०:४८
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

तनाव नबढाऊ : चीन

अमेरिका–उत्तर कोरिया विवाद
एजेन्सी

बेइजिङ — चिनियाँ राष्ट्रपति सी चिनफिङले अमेरिका र उत्तर कोरियालाई तनाव बढ्ने ‘बोली र व्यवहार नियन्त्रण’ गर्न आग्रह गरेका छन् । उत्तर कोरियाको एक प्रमुख मित्र चीनका राष्ट्रपतिले शनिबार दुवै देशलाई ‘शान्त रहन’ आग्रह गरेका हुन् ।

चिनियाँ सञ्चारमाध्यमका अनुसार चिनफिङले अमेरिकी राष्ट्रपति डोनाल्ड ट्रम्पसँगको टेलिफोन वार्तामा ‘सम्वद्ध सबै पक्ष’ लाई संयमित हुन आग्रह गरेका छन् । उनले कोरियाली प्रायद्वीपमा शान्ति स्थापना अत्यावश्यक भएको बताए । चिनफिङले ट्रम्पसँग उत्तर कोरियालाई परमाणु हतियारविहीन बनाउनु दुई देशको ‘साझा स्वार्थ’ भएको बताए । 

अमेरिकी राष्ट्रपति कार्यालय ह्वाइटहाउसले भने चीन र अमेरिका उत्तर कोरियाले ‘तनाव बढाउने व्यवहार’ नियन्त्रण गर्नुपर्नेमा सहमत भएको जनाएको छ । तर टेलिफोन वार्ताका क्रममा चिनियाँ राष्ट्रपतिले ट्रम्पलाई लक्षित गरी केही नबताएको ह्वाइटहाउसले जनाएको छ । 

ह्वाइटहाउसद्वारा जारी विज्ञप्तिमा भनिएको छ, ‘दुई राष्ट्रपतिले अभ्यास गरेको निकट सम्बन्धले उत्तर कोरियाको समस्या समाधानमा सम्झौता हुने आशा छ ।’ 
शत्रुतापूर्ण व्यवहार गर्दै आएका उत्तर कोरिया र अमेरिकाबीच हालैका दिनमा वाक्युद्ध चलिरहेको छ । गत महिना उत्तर कोरियाले दुई अन्तरमहादेशीय क्षेप्यास्त्र परीक्षण गरेपछि दुई देशबीच तनाव उत्कर्षमा पुगेको हो । परीक्षणपछि उत्तर कोरियाले अमेरिकाका मुख्य स्थानहरू आफ्नो क्षेप्यास्त्रको पहुँचमा पुगेको प्रतिक्रिया दिएको थियो । 

त्यसलगत्तै अमेरिकी पहलमा संयुक्त राष्ट्रसंघको सुरक्षा परिषद्ले नाकाबन्दी कडा पारेपछि उत्तर कोरिया थप आक्रोशित भएको हो । गत साता उत्तर कोरियाले गुआमस्थित अमेरिकी सेनाको बेसमा केही दिनमा आक्रमण गर्ने चेतावनी दिएको थियो । 

यसअघि राष्ट्रपति ट्रम्पले उत्तर कोरियालाई क्षेप्यास्त्र परीक्षणमा चीन दोषी भएको आरोप लगाएका थिए ।

प्रकाशित : श्रावण २९, २०७४ १०:४८
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT