चुनावले परिवारभित्रै वैरभाव

कान्तिपुर संवाददाता

बाजुरा — जिल्लाका स्थानीय तहमा विजयी उम्मेदवारभन्दा हार्नेको संख्या कैयौं बढी छ। जित्नेहरू आ–आफ्नो जिम्मेवारी सम्हाल्दै नगर, गाउँ र वडाहरूमा विकासका खाका कोर्न जुटिसके। तर, निर्वाचित केही पदाधिकारी भने चुनाव जितेर पनि बेचैन छन्।

  चुनावी प्रतिस्पर्धाका क्रममा आफन्त र नातागोताबीच बढेको मनोमालिन्य अझै सकिएको छैन। बरु सम्बन्ध झन्–झन् टाढिँदै छ। 

बडिमालिका नगरपालिका–७ मा फरक–फरक पार्टीबाट वडाध्यक्ष उम्मेदवार बनेका साला–भिनाजु, सोही नगरको २ नम्बर वडाध्यक्षका उम्मेदवार ज्वाइँ–जेठान र पाण्डव गुफा गाउँपालिका–१ मा वडाध्यक्ष लडेका काका–भतिजाको मुद्दा उच्च अदालत दीपायलमा अझै चलिरहेको छ।
बडिमालिका–७ को अध्यक्षमा एमालेबाट धर्मराज पाध्यायले टिकट लिए। कांग्रेसबाट उनका भिनाजु विजयराज पण्डित प्रतिस्पर्धामा उत्रिए। नतिजामा पाध्यायले भिनाजुलाई ४ मतले उछिने। तर, भिनाजुले हार स्वीकारेनन्। सालाको जितविरुद्ध उच्च अदालत पुगे। मुद्दा मामिला सुरु भएपछि पारिवारिक दरार झन् बढ्यो। दिदी पनि बोल्न छाडिन्।

भान्जाभान्जी पनि टाढिए। ‘म जन्मेको ९ महिनामै आमाको निधन भयो, उनै दिदी–भिनाजुको सहारामा हुर्कें–बढें,’ पाध्यायले भने, ‘चुनावअघिसम्म गाह्रोसारो पर्दा सहारा दिने दिदी–भिनाजुको नजरमा अहिले बैरीसरह ठहरिएँ। चुनावसँगै पारिवारिक खुसी पनि हरायो।’ अघिल्लो तिहारमा दिदीसँग टीका लगाएको फोटो देखाउँदै उनले चाडबाड नजिकिँदै गर्दा मन झन् भारी हुन थालेको बताए। 
उता पाण्डव गुफा गाउँपालिका–१ को वडाध्यक्षमा प्रतिस्पर्धा गरेका रामलाल बोगटीका काका–भतिजाको सम्बन्ध पनि चुनावसँगै धमिलिएको छ। रामलालसँग भतिजा डबल बोगटी २ मतले हारे। उनी पनि न्यायालयको ढोका ढकढक्याउन पुगे। 

‘पारिवारिक सम्बन्ध पूरै बिग्रियो। बोलचाल बन्द भएको मात्र होइन, पारिवारिक वैरभावको अवस्था आयो,’ रामलालले भने, ‘सहोदर दाइको छोरा हो, दाइ ऊ जन्मेको दुई वर्षमै बित्नुभयो। मैले खेलाएर हुर्काएको हुँ, ऊ मसँग हुँदा दाइको सम्झना मेटाउँथें, आजभोलि बाटो काटेर हिँड्छ, मन सारै पोल्छ।’ बडिमालिका–२ मा अध्यक्ष लडेका ज्वाइँ–जेठानको सम्बन्ध पनि चुनावी परिणामसँगै टाढिएको छ। ज्वाइँ डम्मर महतले जेठान गोपाल कार्कीलाई ६ मतले पराजित गरे। उक्त चुनावी नतिजासँगै उनीहरूबीचको पारिवारिक सम्बन्ध पनि चुँडियो। 

प्रकाशित : भाद्र २७, २०७४ ०८:४५
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

मत खसाल्न स्थानीय आतुर

शंकर आचार्य

बगही (पर्सा) — ६८ वर्षीय बन्ती राउत कुर्मी गाउँकै पाकामध्येका एक हुन्। किसानबाटै उनको दैनिकी चलेको छ। मुलुकका थुप्रै राजनीतिक व्यवस्था र परिवर्तनका साक्षी उनी नजिकिएको स्थानीय तह चुनावको प्रतीक्षामा छन्।

‘२० वर्ष पछिको अवसर हो, म त असोज २ को व्यग्र प्रतीक्षामा छु,’ उनले भने, ‘२० वर्षसम्म गाविस सचिवले मनपरी गरे, गाउँको विकास ठप्पझैँ भयो, धेरै दु:ख पाइयो।’ उनी शिक्षित र जनताको अधिकारका लागि पैरवी गर्न सक्ने उम्मेदवारलाई मत दिने बताउँछन्। जनप्रतिनिधि जस्तोसुकै भए पनि सचिवभन्दा जिम्मेवार हुने उनको तर्क छ।

‘जनप्रतिनिधि जनताप्रति जिम्मेवार हुन्छन्,’ उनले भने, ‘खोज्या बेला भेट्टाउने, गाउँ ठाउँकै हुने भएकाले सचिवले भन्दा बढी बुझ्छन्।’ गोरखामा फर्निचरको ठेक्कापट्टा गर्ने ५१ वर्षीय इन्द्रासन ठाकुर कामविशेषले घर आएका छन्। अब उनी भोट हालेर मात्र फर्कने योजनामा छन्। ‘चुनाव आउनै लागिसक्यो, भोट नहाली जान मनले मानेन,’ उनले भने, ‘२० वर्षपछि अवसर जुरेको छ, फेरि कहिले आउने हो?’ गाविस सचिवले चलाउँदा मनपरी र भ्रष्टाचार बढेको उनी बताउँछन्। उनी दलीय समर्थक मात्र नभएर विकासप्रेमी, जनताको भलो चाहनेलाई मत दिने बताउँछन्। गाउँकै २४ वर्षीय हरिओम साह आफ्नै ट्रयाक्टर चलाउँछन्। पहिलोपटक स्थानीय चुनावमा मतदान गर्ने भएकाले उनी पनि उत्साही छन्। ‘यो मेरो पहिलो अवसर हो,’ उनले भने, ‘शिक्षित र व्यावहारिक उम्मेदवारलाई मत दिन्छु, अनपढ नेताले हाम्रा कुरा बुझ्दैनन्।’

हरपतगन्जका बासिन्दा पनि चुनावलाई लिएर उत्साही छन्। जिल्ला मालपोत कार्यालयमा लेखनदासी गर्ने ४६ वर्षीय हरिशंकरप्रसाद यादव स्थानीय निर्वाचन अत्यावश्यक रहेको बताउँछन्। ‘जनप्रतिनिधि नहुँदा सचिवले मनपरी गरे, जनताका नाममा आएको विकास रकममा सधंै उनीहरूले हालीमुहाली गरे,’ उनले भने, ‘अब शिक्षित, राजनीति बुझेका अनुभवी, जनप्रतिनिधि चुन्नपर्छ।’

स्थानीय धु्रवप्रसाद यादव पनि चुनावको प्रतीक्षामा रहेको बताउँछन्। ‘स्थानीय चुनाव एकदमै आवश्यक भइसकेको थियो,’ उनले भने, ‘सचिवहरूले मनपरी गरे, विकासको छनकसमेत पाइएन, अब जनप्रतिनिधि आएपछि उनीहरूसँग नियमित भेटघाट हुन्छ,विकासको काममा हाम्रो पनि सहभागिता हुन्छ।’ उनी पनि जनप्रेमी र विकासप्रेमी उम्मेदवारलाईमत दिने बताउँछन्। चुनाव नजिकिएसँग गाउँगाउँमा चहलपहल बढेको छ। चोक, चियापसलमा पनि अहिले चुनावकै चर्चा छ। गाउँघर विभिन्न दलका रंगीचंगी झन्डाले सिँगारिएका छन्।

प्रकाशित : भाद्र २७, २०७४ ०८:४५
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT